Pago Pago - AMERIKA SAMOA

Ua molia nei ia le alii e 20 tausaga, o Alefosio Laumoli mai i le afioaga o Leone, i le Fa’ao’olima i lona tulaga e tolu, ona o se faalavelave na tupu i le aso 26 o Aukuso, e pei ona ta’ua i fa’amaumauga a le malo.

O lenei moliaga, o se vaega ‘A’ o solitulafono mama, e mafai ona nofosala ai se tasi i le falepuipui, i le tausaga atoa, po o se sala tupe e $1,000; po o faasalaga uma e lua.

E $500 le vaegatupe sa faatulagaina, e mafai ona tatalaina ai le ua molia, mai i le falepuipui, e faatalitali ai lona faamasinoga.

E tusa ai ma faamaumauga a le malo, o le po o le aso 26 o Aukuso, na o’o atu ai se vala’au i le Ofisa Leoleo i Tafuna, e tusa ai ma le sauaina o se tama matua, i tua o le pamu kesi a le Alamai, i Leone.

Ina ua taunu’u leoleo i le nofoaga na tupu ai le faalavelave, na fa’afetaui mai i latou e le alii na valaau i le ofisa a leoleo faapea ma le tama na a’afia.  Sa ta’uina ifo e le alii na valaau i leoleo, o Laumoli, e nofo i tua o le pamu kesi a Alamai.

Sa faapea loa ona aveina faatopetope atu le tama matua i le EMS i Tafuna, e nisi o leoleo, ae aga’i atu isi, e saili le eria mo le ua molia.  

Na maua atu e leoleo ia le ua molia, o lo’o i totonu o le latou fale lea e i tua o le pamu kesi, ma lokaina mai ai loa o ia, ma aveina atu i le ofisa a leoleo i Tafuna, mo le fa’aauauina o a latou suesuega.

Sa faamatalaina e le tama matua na a’afia, i leoleo e faapea, sa faigaluega o ia, ae ona vaaia le ua molia o savali atu ma ‘e’e ma ina ua latalata atu le ua molia, sa ia lagonaina le manogi pia.

Na ta’ua e le tama matua lona otegiaina o le ua molia, ae liliu mai ai le ua molia, ma tu’i o ia. 

Ae i le faamatalaga a Laumoli, o le faalavelave so’o atu o le tama matua ia te ia ma lona tama, ma lafo atu ni igoa ia i la’ua ma ta’u la’ua o tagata e ‘ai ‘aisa.

Sa faamaonia e le ua molia, lona ita tele ma ia taumafai e talanoa filemu ma le tama matua, ae peitai, na tu’i faalua o ia e le tama matua.  Ma na faamaonia e le ua molia, lona tu’i fa’afa o le tama matua, ma pa’u ai i lalo le tama matua.  Ae toe fo’i o ia i lona aiga.