Pago Pago - AMERIKA SAMOA

O le aso 28 o Aukuso, 2024 na ripotia ai e se tamaitai, ia lana uo tama, i le fa’ao’olima, a’o si’i e le tamaitai lana pepe e tasi tausaga.

Ua molia nei ia le susuga ia Pulou Moors i moliaga;

Faitauga 1:  Fa’ao’olima i lona tulaga e tolu (sauaga i totonu o le aiga), o se vaega ‘B’ i soligatulafono mama, e mafai ona faafalepuipui ai se tasi i le o’o atu i aso e 30, po o se sala tupe i le va o le $150 ma le $500; po o faasalaga uma e lua.

Faitauga 2 & 3:  Faatupu Vevesi i totonu o aiga (sauaga i totonu o le aiga), o se vaega ‘B’ i soligatulafono mama; ma e tutusa ona fa’asalaga ma le Faitauga 1.

Faitauga 4:  Faia o se gaioiga e ono a’afia ai fanau îți (sauaga i totonu o le arga).  O se vaega ‘D’ i soligatulafono mamafa, e mafai ona faafalepuipui ai i le o’o atu i le lima tausaga, po o se sala tupe e $5,000; po o faasalaga uma e lua.

E $5,000 se vaegatupe na fa’atulagaina e mafai ona tatalaina ai le ua molia, e faatalitali ai lona faamasinoga.

E tusa ai ma fa’amaumauga a le malo, o lo’o ta’ua ai le tupu o lenei fa’alavelave i totonu o le aiga a Moors ma lana uo teine.  Ma o lo’o tatua ai foi le futiina e le ua Moors o le ulu a lana uo teine, ma tatu’i o ia, a’o si’i e lana uo teine le la pepe e tasi le tausaga.

Sa taumafai le uso a le ua molia ma lana uo teine, e toso ese le ua molia ma taofia lona fa’ao’olima i lana uo teine, ae fa’asaga mai le ua molia, mă taumafai e fasi le uo teine a lona uso, ae o lo’o ma’itaga 6 masina.

O lo’o ta’ua ai foi i fa’amaumauga a le malo, le fufusu foi o le ua molia ma lona uso.

E foliga mai e nonofo fa’atasi uma le auuso nei ma a la uo teine, i le fale e tasi.

Na o’o atu leoleo i le taeao o le aso lava lea, i le fale na tupu ai le faalavelave ma talatalanoa ma le uso o le ua molia.  Ma na fa’amatalaina e le uso i leoleo, le taumafai o le ua molia, e fasi lana uo teine ma i’u ai ina o la fufusu.

Sa faatalanoaina foi e leoleo ia le uo teine a le ua molia, ma na ia fa’amatalaina i leoleo le ița o le ua molia ma fa’aolima ia te ia, a’o si’i le la pepe, ona o lana fesili i le ua molia, pe aisea ua le alu ai e su’e sana galuega.

Ina ua mae’a ona fa’atalanoa e leoleo ia le uo teine a le ua molia, sa o latou faatalanoaina loa le uo teine a le uso o le ua molia.  Ma na faamatalaina e lea tamaitai e faapea, na iai o ia i totonu o lona potu faatasi ma le uso a le ua molia, ae o la fa’alogoina mai le valaau atu a le uo teine a le ua molia, ua manaomia se fesoasoani.

Sa ta’ua e le uo teine a le uso a le ua molia, lo la tamomo’e mai ma taumafai e taofiofi le ua molia, ae peitai, na taumafai le alii ua molia e tu’i o ia (uo teine a le uso) ma na oso atu ai loa lona uso ma taumafai e taofiofi lona uso, ma i’u ai ina amata ai se la fusuaga.

Na mafai ona tamo’e le uso o le ua molia, i le fale o le la Aunty e fa’aaoga ai le telefoni, e valaau ai leoleo.

Ina ua maua le avanoa e fa’atalanoaina ai e leoleo le ua molia, sa ia fa’amaonia ia lona fa’ao’olima i lana uo teine, ae peitai, sa ia ta’ua lona le manatua, pe na tupu le faalavelave ae o lo’o si’i e lana uo teine le la pepe.