Pago Pago - AMERIKA SAMOA

O le vaveao o le aso 18 o Setema, e tusa ai ma faamaumauga a le malo, na maua ai e le Ofisa Leoleo i Tafuna, ia se valaau mai i se tamaitai, o lo’o ripotia maia le susuga ia Setu San, o lo’o palauvale solo ma fa’aumu i lo latou pitonu’u.

Na agai atu leoleo i le nofoaga na tupu ai le faalavelave, ma ina ua latalata atu i le nofoaga o iai le aoga a Alataua, sa va’aia ni sima o paepae i luga o le alatele.  Ma sa fa’atuina e se alii ia le taavale a leoleo, ma fa’ailoa atu i leoleo, o lo’o ia taumafai e la’u ese ia sima mai luga o le auala ina ia mafai ona sao atu le taavale a leoleo.

Sa faapea loa ona faasinoina e lenei alii, i leoleo, i le itu sa agai atu ai le ua molia.

Na maua atu e leoleo ia le ua molia, o lafi i lalo o ni pu pu vao i tafatafa o le latou fale.  Ma sa lokaina mai ai loa o ia e leoleo, ma aveina atu i le ofisa a leoleo i Tafuna, mo le fa’aauauina o su’esu’ega a leoleo.

Sa faapea foi ona fa’atalanoaina e leoleo ia le alii sa molimauina le faalavelave ma na ia ta’ua lona lagonaina mai i totonu o lona fale, ia se leo o se alii o laulauvale ma fa’aumuumu solo.

Ina ua sau i fafo o lona fale, sa ia va’aia le ua molia, o tau’aia ia poloka sima, sa i tafatafa o le faleaoga, i luga o le alatele.  Ma ina ua iloa atu o ia e le ua molia, sa sola loa agai i le latou fale.

Sa faapea ona faamaonia e le ua molia, ia faamatalaga uma a le molimau, ina ua faatalanoaina o ia i le ofisa a leoleo.  Sa ia ta’ua le taumafaina o ni ana pia i luma o le faleoloa, ae e le’i amataina lana sauniga, lea ua molia ai nei o ia.

Ua molia ai nei San i le Faatupu Vevesi i Nofoaga Faitele, o se vaega ‘B’ o solitulafono mama, e mafai ona loka ai i le ono masina, po o se sala tupe e $500; po o faasalaga uma e lua.

E $500 le vaegatupe sa ffaatulagaina, e mafai ona tatalaina ai le ua molia mai i le falepuipui, e faatalitali ai lona faasalaga.