Pago Pago - AMERIKA SAMOA

I le aso 3 o Iuni, 2024 na fa’afeso’ota’i ai e se tamaitai ia le Ofisa a Leoleo i Fagatogo ona o se fa’alavelave sa ia molimauina mai i luga o le pasi na malaga atu ai i lana galuega.

E tusa ai ma fa’amaumauga a le malo, o le 7:39 i le taeao, lea na valaau atu ai lenei tamaitai i le Ofisa a Leoleo mo se fesoasoani, ina ua na va’aia se alii o fa’ao’olima i se teineitiiti a’oga, i se fale faatali pasi.

(O le a le lomia suafa o i latou ua a’afia i lenei mataupu faapea le ua molia, ona o le talavou o le teineititi aoga o lo’o a’afia.)

Ina ua taunu’u leoleo i le nofoaga na tupu ai le fa’alavelave, sa va’aia ai se teineititi a’oga o lo’o la’ei lona toniga a’oga, ma o lo’o tagi.  Faapea ma se tamaitai o lo’o taumafai e fa’ato’ato’a le teineititi talavou.

Sa fa’apea loa ona aveina atu e leoleo ia le tamaitai matua ma le teineititi talavou, i lo latou ofisa i Fagatogo.  O iina sa faamatalaina ai e le tamaitai matua, le fa’ate’ia o ia, a’o aga’i atu le pasi sa alu atu ai i lana galuega, i lea taeao, ina ua na va’aia se alii o fasi mai le teineititi a’oga.

Sa faamatala e le tamaitai matua i leoleo, le tu’iina e le ua molia, ia foliga ma vae, o le teineititi a’oga, faapea lona fatafata ma le itu o lona manava.  Ma ina ua pa’u i lalo le teineititi ma tagi, sa kikiina o ia e le ua molia.  O lea na ia taofi ai loa le pasi ma tamoe atu e fesoasoani i le teineititi.

Na vala’auina ia le vaega a le EMS mo le siakiina o le teineititi, ae sa ia te’ena le aveina o ia i le falemai mo le fa’aauauina o le siakiina o ia.

Ina ua taunu’u le ‘guardian’ a le teineititi a’oga, sa mafai loa ona fa’atalanoaina o ia e leoleo.  Ma sa ta’ua e le teineititi a’oga, a’o fa’atalitali lana pasi e alu ai i le a’oga i Samoana i luma o le falesa Mamona i Pago Pago, na savali atu le ua molia ma tu’uina atu lona lima e po mai e le teineititi (high-five).

Ae ina ua so so atu le ua molia, sa ia tu loa i luga ona ua oso lona fefe.  Ae tu’i (faalima) ai loa o ia e le ua molia.  Ma ina ua pa’u o ia i lalo, sa tago loa le ua moli, i le kiki ona vai.

E tolu moliaga ua fa’asaga i le ua molia, e aofia ai:

Faitauga 1:  Faia o se tulaga e a’afia ai le saogalemu o se tamaititi/teineititi talavou – o se vaega ‘A’ o solitulafono mama, e nofosala ai i le falepuipui, i le le sili atu ma le tausaga e tasi (1) po o se sala tupe e le sili atu ma le $1,000; po o fa’asalaga uma e lua.

Faitauga 2:  Fa’ao’olima i le tulaga e tolu – o se vaega ‘A’ o solitulafono mama, e mafai ona nofosala ai i le falepuipui, i le le sili atu ma le tausaga e tasi (1), po o se sala tupe e le silia ma le $1,000; po o faasalaga uma e lua.

Faitauga 3:  Faatupu vevesi i nofoaga faitele – o se vaega ‘B’ o solitulafono mama, e mafai ona nofosala ai i le falepuipui e o’o atu i le ono masina, po o se sala tupe e $500; po o faasalaga uma e lua.

E $1,000 le vaegatupe faatulagaina mo le tatalaina i tua o le ua molia, e faatali ai lona faamasinoga.