Pago Pago - AMERIKA SAMOA

Ua taofia nei i le Toese i Tafuna le ave ta’avale o se pikiapu na taofi e Leoleo i le masina na te’a nei i lona le usitaia o tulafono i luga o le alatele, ae alia’e ai ma isi solitulafono mamafa e pei o le umia faasolitulafono lea o vaega o fualaau faasaina, ina maua e Leoleo fualaau faasaina i totonu o le ta’avale.

O le masina na te’a nei na tula’i ai loa le ave ta’avale i luma o le Faamasinoga Faaitumalo, o ia lea o Eddie Talalelei 

Ua molia e le malo le susuga a Talalelei i le moliaga e tasi o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000, pe faasala foi i faasalaga uma ia e lua, atoa ai ma le ave ta’avale ‘ona, o le vaega A o solitulafono mama, lea e mafai ona faasala ai se tasi i le Toese mo le umi e oo atu i le tasi le tausaga, pe faasala foi i le salatupe e le silia i le $1,000, poo le faasala foi i faasalaga uma ia e lua.

E $5,000 le vaega tupe lea ua faatulaga e totogi ona faatoa mafai lea ona tatala i tua le susuga a Talalelei mai le Toese i Tafuna. 

Afai ae tatala o ia i tua, ua fautuaina o ia e le Fa’amasinoga ina ia auai i soo se taimi e faatulaga ai lana mataupu; e le mafai ona ia tuua le atunuu pe taumafai fo’i e sola ese mai le atunu’u, a ia fesoota’i vava lalata ma lana loia fautua, ma aua ne’i ona toe tagofia le ava malosi poo ni fualaau fa’asaina. 

Ua poloaina fo’i e le Fa’amasinoga le susuga a Talalelei e aua ne’i ona toe solia se tulafono a le malo, ma ia usita’i fo’i i soo se tulafono tau taavale afi i soo se taimi na te faafoeina ai se ta’avale. 

O le aso Tofi o le vaiaso fou i le itula e 1:30 i le afiafi, lea ua fa’atulaga e faia ai le ulua’i iloiloga o lenei mataupu.

TAGI A LE MALO

E pei ona taua e le malo i le latou tagi e fa’apea, o le tagi faasaga i le susuga a Talalelei na alia’e mai i se faalavelave na tula’i mai i le afiafi o le aso 19 o Mati, 2022 pe tusa o le itula e 7:14 i le afiafi, ina ua vaaia e ni alii Leoleo se to’alua sa tiute i luga o le alatele a le malo i se vaega o le alatele a le malo i Utulei se ta’avale o lo o aga’i mai i luga o le alatele e tasi le moli o loo ola i le pito i luma. 

Talu ai puipuiga o le saogalemu i luga o le alatele na manatu ai loa ali’i Leoleo nei e to’alua e taofi le ta’avale ma fesiligia le ave ta’avale. Na taofi e Leoleo le ta’avale i luma tonu lava o le Malae o le Su’iga’ula a le Atuvasa i Utulei ma iloa ai, o le ave ta’avale o le ta’avale lea, o le susuga lea ia Eddie Talalelei, o ia fo’i lea ua molia i lenei mataupu. 

Na aga’i atu Leoleo ma faamatala i le susuga a Talalelei le mafua’aga ua taofia ai lana ta’avale, ona o lona le usitaia o tulafono tau ta’avale afi, e mafua mai i le tasi o le moli pito i luma o lana ta’avale o loo ola. ina ua fesiligia le susuga a Talalelei i lona laisene ave ta’avale, na fai le au molia i Leoleo, e leai sona laisene ave ta’avale o ia te ia. E leai fo’i se isi lava ituaiga pepa faamaonia na tuu atu e le susuga a Talalelei i Leoleo e faamaonia ai o ia.

A o fesiligia e Leoleo le susuga a Talalelei, sa latou lagona le malosi o le manogi pia o lo o sau mai totonu o le ta’avale faapea ai ma le tino o le ave ta’avale. Na ta’utino le ua molia, sa ia tagofia le ‘ava malosi i le fale o lana uo ina ua manava galuega i lea aso.

Talu ai le faigata i Leoleo ona faamaonia poo ai tonu le ua molia, na fautuaina ai loa o ia e Leoleo, o le a taofia lana ta’avale i le Ofisa o Leoleo i Fagatogo, ae se’i faafesootai nisi o lona aiga pe maua mai ai se pepa faamaonia e faamaonia ai lona tagata.

A o le i auina atu le ta’avale a le alii ua molia, faatasi ai ma ia i le Ofisa o Leoleo i Fagatogo, na muamua siaki e Leoleo le tino o le ua molia faapea ai ma lana ta’avale, ina ia mautinoa e le o i ai ni aupega poo nisi mea faasaina. 

Ina ua saili e Leoleo le taga o le ofu a le alii ua molia sa faia, na maua i ai se paipa tioata o loo tumu i vaega o le pauta faasaina o le aisa. Na fesili Leoleo i le ali’i ua molia poo le a lea paipa tioata ma mea papa’e o loo i ai i totonu, ae na faamanino e Lemusu, o le paipa e ula ai lana aisa. Sa ia faamaonia fo’i i Leoleo, o pauta papa’e o loo i totonu o le paipa tioata, o vaega ia o le pauta faasaina o le aisa.

O le mae’a ai ona maua o fualaau faasaina i le tino o le alii ua molia, na loka ai loa e Leoleo ona lima ma ta’ita’i atu o ia e nofo i le nofoa o le pasese a lana ta’avale, ae ave e le ali’i Leoleo lana ta’avale ma latou aga’i atu i le Ofisa o Leoleo i Fagatogo.

A o aga’i atu le ta’avale a le alii ua molia ma le Leoleo, na faateia le Leoleo ina ua talanoa atu le alii ua molia ia te ia, e faatatau i isi fualaau faasaina o loo i totonu o le taga o lona ofu o loo faia. Na fesili le Leoleo sa ia aveina le ta’avale a le alii ua molia, poo a ituaiga fualaau fa’asaina o loo ia te ia, ae na tali le ua molia, o le straw e tasi o loo tumu i vaega o le pauta paepae o le aisa, faapea ai ma le pepa iila laititi o loo i ai fo’i vaega o le pauta paepae o le aisa.

Na laga e Leoleo le taga o le ofu a le alii ua molia sa faia ma maua mai ai le straw e tasi ua uma ona ta tipi tulimanu, ae o loo tumu i vaega o le pauta faasaina o le aisa. I lalo o le nofoa o le ave taavale na maua ai e Leoleo se pepa iila laititi o loo tutumu fo’i i vaega o le pauta faasaina o le aisa. Na faia se suega faapitoa i vaega o le pauta paepae sa i totonu o straws nei e 2 faapea ai ma paipa tioata e 2 ma faamaonia ai, o vaega ia o le pauta faasaina o le aisa.

A o le i fesiligia e Leoleo le alii ua molia e tusa ai o lenei mataupu, na muamua faitau i ai ona aia tatau faaletulafono, ma faaalia ai e le alii ua molia lona malamalama atoatoa i ona aia tatau, ae ua ia manatu fo’i e talanoa ma tali fesili e uiga i lenei mataupu. 

Sa ia taua i Leoleo ina ua fesiligia o ia e fa’apea, o fualaau faasaina na maua ia te ia, na faatau mai i se alii mai le nu’u o Iliili i le tau e $20 i le straw, faapea ai ma le paipa tioata atoa ai ma le pepa iila laititi sa i ai vaega o le pauta o le aisa

Na taua atili e le ua molia i Leoleo e fa’apea, o le alii lea lava e masani ona faatau mai ai ana fualaau fa’asaina, pe a ma le faa 2 i le vaiaso. O fualaau faasaina a le alii lea e faatau sa’o mai lava i totonu o le fale o le ali’i lea. Na ta’utino le alii ua molia, o fualaau faasaina na maua ia te ia sa faamoemoe e fa’aaoga mo ia lava.

O le mae’a ai ona maua e Leoleo o faamatalaga mai le alii ua molia, na latou talosagaina ai loa se faatanaga mai le Fa’amasinoga e su’e ai le fale o le alii lea na taua e le alii o Talalelei na faataumai ai fualaau faasaina.

E leai ni fualaau faasaina na maua i lea osofaiga a Leoleo, se’i vagana ai pepa iila e masani ona fa’aaoga e utu ai le aisa e tusa ma le 14 na maua i luga o le laulau, atoa ai ma se tinoitupe e $520 sa i totonu o le ato tupe a le ali’i lea.

O le tausaga e 2012 na ta’usala ai e le Faamasinoga Maualuga le alii o Talalelei i le moliaga o lona talia o ni oloa sa ave faagaoi e se tasi tagata faapea ai ma le umia faasolitulafono o vaega o le laau faasaina o le mariuana.

Na osofa’i e Leoleo le fale o Talalelei ma maua ai oloa sa ave faagaoi e se tasi o ali’i ma faatau atu i le fale o Talalelei. Ina ua saili e Leoleo le tino o Talalelei, na maua i ai se pepa iila o loo i ai lau mamago o le mariuana.

O se tasi o tuutuuga o le nofovaavaaia e 5 tausaga a Talalelei e aofia ai lona tuliina lea o masina e 20 i le Toese i Tafuna, atoa ai ma lona totogi o le salatupe e $1,000. O le tausaga na te’a nei na mae’a ai le nofovaavaaia a le ua molia, a o lea fo’i ua toe tu’uaia o ia i ituaiga solitulafono lava ia e tasi e aofia ai le umia faasolitulafono o fualaau fa’asaina.