Ads by Google Ads by Google

Molia se alii i le faaoolima i lona to’alua ma le umia o fualaau faasaina


[ata: SN]
ausage@samoanews.com

 

Pago Pago, AMERIKA SAMOA - Ua molia nei e le malo se ali’i e 46 tausaga le matua i le faia o sauaga faasaga i lona to’alua atoa ai ma lona umia faasolitulafono o vaega o fualaau fa’asaina, ina ua saili e Leoleo lona tino i le taimi na pu’e faapagota ai i le masina na te’a nei, ae maua i ai vaega o le pauta faasaina o le aisa, atoa ai ma lau o le laau faasaina o le mariuana.

 

Talu ai puipuiga i le ono mafai lea ona iloa le Tina sa faia faasaga i ai sauaga, o le a le mafai ai e le Samoa News ona faalauiloa le suafa o le ua molia i lenei mataupu.

 

E pei ona taua e le malo i le latou tagi e fa’apea, o le afiafi o le aso 16 o Tesema o le tausaga na te’a nei na alia’e mai ai lenei mataupu, ina ua faafesootai ele Tina na aafia le Ofisa o Leoleo i Tafuna mo se fesoasoani e mafai ai ona aveese le Tama o lana fanau mai le latou fale, ona o lona popole i le saogalemu o ia ma lana fanau.

 

Na taua e le Tina na aafia i Leoleo e fa’apea, i le po o le aso 15 o Tesema pe tusa o le itula e 12:12 i le leva o le po, na faafuase’i ai ona fesootai atu se tagata i lana telefoni e ala i le lafo atu o se fesootaiga (text). Na ia iloa i le telefoni ma le fesootaiga sa avatu, o le Tama o lana fanau lea ua tele masina o la nonofo eseese lea o lo o fesootai atu ia te ia, ma fesili atu e faatatau i le la mafutaga pe mafai ona toe sosoo ma faaauau.

 

E le i umi se taimi talu ona fesootai atu le ua molia i lana telefoni, ae faafuasei loa ona matala le faitoto’a o le potu ma ia vaaia ai le ua molia ua ulufale faamalosi atu i totonu ma se’i ese mai le telefoni o loo uu i lona lima ma togi i lalo o le foloa sima o le fale. Na toe savali le ua molia i fafo ma le fale ae o le taimi lea na ia tago atu ai loa ua loka le faitoto’a o le potu ina ia le mafai ai ona toe ulufale atu le ua molia i totonu.

 

I ni nai minute, na ia faalogoina ai se pao leotele, ua talepe e le ua molia le faitoto’a o le potu ae ulufale faamalosi atu i totonu ma faaoolima loa ia te ia e ala i lona tu’i o ona foliga ma toso lona ulu. Na faafetaia o ia ina ua tago le ua molia i le taga o lona ofuvae ma se’i mai se naifi ma tuu i lona ua ma faapea atu ia te ia, “o lou afu lea pe afai e te le taliaina a’u ina ia ou toe fo’i mai i lo ta aiga”.

 

Na taofi e le ua molia le Tina na aafia ma lana fanau e toatolu e aua ne’i alu ese se isi ma le fale, ae i le taeao na sosoo ai, o le aso Sa lea, Tesema 16 na alu ai loa le Tina na aafia e momoli lana fanau teine e to’alua i le fale a ona matua, faatoa alu ai loa lea e faigaluega.

 

A o le i tuua e le Tina le fale, na faatonu e le ua molia ina ia tuu lona atalii la te faamuli. E ui i le popole o le Tina i le saogalemu o lana tama, ae na malie lava e tuu e nonofo ma le ua molia, ona o lona fefe ina ne’i toe faia e le ua molia se isi gaioiga ia te ia.

 

A o le i tuua e le Tina na aafia le fale, na fai i nai le folafolaga a le ua molia, ina ia aua nei ona taua i se tasi poo Leoleo fo’i le mea sa tupu i le fale, ina nei i ai se isi mea e sili atu ona matuia e tupu ia te ia.

 

O le avanoa na maua e le Tina na aafia na ia faafesootaia ai loa le Ofisa o Leoleo mo se fesoasoani, peita’i e taunu’u atu Leoleo i le fale ua sola ese le ua molia. Na agai Leoleo i le Fale Faigaluega a le ua molia peita’i latou te le i maua i ai. E atoa le vaiaso o tuu asiasi pea lava Leoleo i le Fale Faigaluega peita’i latou te le i maua ai le ua molia.

 

Ae i le 2 vaiaso talu ai, na maua ai e Leoleo se ripoti ua sui le Kamupani ua faigaluega ai le ua molia. E taunu’u Leoleo i le nofoaga fou lea ua faigaluega ai le ua molia, ae o le taimi fo’i lea o lo o i ai le ua molia i totonu o le Kamupani mo le faatinoina o ana galuega, ma pu’e faapagota ai loa o ia.

 

A o le i auina atu le ua molia i le Ofisa o Leoleo i Tafuna mo suesuega, na siaki e Leoleo lona tino mo ni aupega poo ni fualaau faasaina. I le taga o le ofu a le ua molia, na maua ai e Leoleo ni pepa iila laiti se 2. O leisi pepa iila o lo o i ai vaega o le pauta pa’epa’e o le aisa, ae o le isi pepa iila o loo i ai sikaleti mariuana e 2 ua ua ona taai.

 

Ina ua fesiligia le ua molia e tusa ai o fualaau fa’asaina, sa ia ioeina ai i Leoleo, o ia e ana fualaau faasaina sa maua i lana taga, o mea sa ia faatau mai i le isi alii ave taxi e faapasi ai lona taimi i le fale.

 

Ae ina ua fesiligia e tusa ai o le faalavelave na tula’i mai i le masina o Tesema o le tausaga na te’a nei, lea na ia faaoolima ai i le Tina o lana fanau atoa ai ma lona tuu o se naifi i lona ua, na ta’utino le ua molia, e faamaonia uma tu’uaiga faasaga ia te ia.

 

O le 2 vaiaso talu ai na tula’i ai le ua molia i luma o le Faamasinoga Faaitumalo mo lana ulua’i iloiloga, i le mae’a ai lea ona faila e le malo o tagi e 2 faasaga ia te ia.

 

I le tagi muamua a le malo, o lo o tuuaia ai le ua molia i moliaga mamafa e 3 e aofia ai le faaoolima i le tulaga lua; taofia faapagota o se tagata i se auala e le tusa ma le tulafono; ma le faaaoga o se aupega mata’utia i se auala e le tusa ma le tulafono; o solitulafono mamafa uma ia o le vaega D, lea e mafai ona faasala ai se tasi i le Toese mo le umi e le sili atuile 5 tausaga, pe faasala i le salatupe e le silia i le $5,000, poo le faasala fo’i i faasalaga uma ia e lua.

 

I le tali lona lua a le malo, o loo tu’uaia ai le ua molia i le moliaga e tasi o le umia faasolitulafono o le pauta o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le toese mai le 5 e oo atu i le 10 tausaga, pe faasala foi i le salatupe e oo atu i le $20,000 le maualuga, poo le faasala fo’i i faasalaga uma ia e lua.

 

E $20,000 le tupe lea ua faatulaga e tatala ai le ua molia i tua ao faagasolo ai taualumaga o lana faamasinoga. 

 

Afai ae tatala o ia i tua, e le mafai ona toe nofo i le fale o lo o nonofo ai lona to’alua ma lana fanau; e le mafai ona toe taumafai e faafesoota’i lona to’alua ma lana fanau, a ia saili se isi nofoaga e nofo ai. E le mafai fo’i ona ia tuua le atunuu i soo se taimi, se’i vagana o se poloaiga a le fa’amasinoga.

 

O le vaiaso nei lea na tula’i ai le ua molia i luma o le Fa’amasinoga Maualuga, ma ia teena ai tuuaiga uma faasaga ia te ia. O le masina fou o Me lea ua faatulaga e toe tula’i ai le ua molia i luma o le Fa’amasinoga Maualuga mo le isi ana iloiloga.

 

Sa fautuaina e le Faamasinoga le loia a le ua molia, susuga Rob McNeill, ina ia mautinoa e malamalama le ua molia i tuutuuga pe a tatala o ia i tua, e aofia ai ma le tuutuuga faaopoopo na tuuina atu e le Faamasinoga, o le faasa lea ona ia toe tagofia le ‘ava malosi poo fualaau fa’asaina, e mafai fo’i ona faia se suega i lona tino i so o se taimi e iloa ai, o lo o ia tausisia poloaiga a le Fa’amasinoga.