Pago Pago - AMERIKA SAMOA

Ua molia nei le susuga ia Albert Fano i le faaoolima i lona tulaga e tolu ma le faatupu vevesi i nofoaga lautele, ona o se faalavelave na tulai mai i le vaveao o le aso 28 o Oketopa, 2023, i le va o ia ma lona to’alua, o Shana Malau’ulu, i le nofoaga e paka ai taavale i le faleaiga a le McDonalds.

E tusa ai ma faaupuga a le tagi a le malo, o lo o ta’ua ai e faapea, i le 2 i le vaveao o Oketopa 28, 2023, na amata ai se tauga upu a Fano ma lona to’alua i le fale kalapu a le Flames i Tafuna, ae na faai’u ma fa’ateteleina i le pakaga ta’avale a le McDonalds.

I suesuega a leoleo na faaalia ai le fa’aleagaina e Fano o le ta’avale a Malau’ulu ona faasaga lea ua faao’olima ia Malau’ulu, ma sulufa’i atu ai loa Malau’ulu i le ofisa leoleo i Tafuna, mo se fesoasoani.

I le fa’atalatalanoaga a leoleo ma Malau’ulu, sa faamatala ai e Malau’ulu e faapea, na amata mai le la vevesi ma Fano i le falekalapu, ina ua futi e Fano lona lauulu, ma fa’aauau atu ai lava i le McDonalds – lea na tu’ufesili atu ai lava Fano ia te ia.  Ina ua o latou taunuu i le McDonalds, na fesili ai Malau’ulu ia Fano pe aisea na ia futia ai lona lauulu.  Ae peitai na ita Fano ma tu’i le tv lea sa i totonu o le ta’avale, ma nuti ai.

Na ta’ua e Malau’ulu lona fai atu ia Fano e alu i fafo mai i le ta’avale, ae ina ua oso i fafo ia Fano mai i le ta’avale, na amata ona ia tatu’i ina le itu tauagavale o le ta’avale ma omo ai.  Ina ua savali Fano agai i lume o le faleaiga i le mea o iai fale’ie, sa valaau atu iai Malau’ulu e faatali o la ua o mai leoleo, ma sa taumafai Malau’ulu e taofi Fano se’ia o’o atu leoleo, ae peitai, na amata ona tatu’i o ia e Fano.

Sa ta’ua e Malau’ulu le alu atu o seisi ta’avale ma oso ai Fano ma alu ese atu ai.

Sa faamatala e se molimau lea sa i totonu o le taavale ina ua taunuu i le fale’aiga, na feosofi i fafo isi o a latou uo ae na iai pea o ia i totonu o le taavale, ina ua fesiligia e Malau’ulu ia Fano pe aisea na ia fatuia ai lona lauulu.  Sa faamaonia foi e lea molimau le faamatalaga a Malau’ulu, e aofia ai ma le tatu’i e Fano o Malau’ulu.

Ina ua maua e leoleo ia Fano sa o latou aumaia loa o ia i le ofisa a leoleo mo se faatalanoaga, ae e le o ma’oti mai i faamaumauga a le malo le aso ma le taimi na maua ai Fano.  

Sa faamatalaina e le ua molia i leoleo e faapea, sa o la tau upu ma Malau’ulu ae na te le i futia lona lauulu, pe tu’i foi o ia.  Sa te’ena e Fano ia tu’uaiga a Malau’ulu ua faia faasaga ia te ia ma sa ia ta’ua foi, o le tv lea sa i totonu o le ta’avale, ua leva ona leaga.  Sa ta’ua foi e Fano na ia tu’ua le McDonalds ma agai atu i Faga’alu, ae o lo o iai pea Malauulu i le pakaga a le McDonalds.

O le moliaga o le faatupu vevesi i nofoaga faitele, e ono falepuipui ai se tasi i le ono (6) masina po o se sala tupe e $500 po o faasalaga uma e lua; o le faaoolima i lona tulaga e tolu, e mafai ona nofosala ai se tasi i le falepuipui mo le 12 masina, po o se sala tupe e $1,000 po o faasalaga uma e lua.