O le ali’i lea na tu’uaia e le malo i lona faaoolima lea i se tagata faigaluega i totonu o se Faleoloa, e le gata ua molia i le faaoolima i le tulaga lua, ae ua tu’uaia fo’i o ia i lona umia faasolitulafono o fualaau fa’asaina.

O le vaiaso na te’a nei na tula’i ai Adam Nikolao i luma o le Fa’amasinoga Faaitumalo mo lana ulua’i iloiloga.

E 2 tagi ua faila e le malo fa’asaga ia Nikolao. I le tagi muamua, o lo o tu’uaia ai o ia i le faaoolima i le tulaga lua, o le vaega D lea o solitulafono mamafa, lea e mafai ona faasala ai se tasi i le toese mo le umi e oo atu i le 5 tausaga, faapea ai ma moliaga mama e 2 o le faatupu vevesi i nofoaga faitele atoa ai ma le faaleaga meatotino.

I le tagi lona lua a le malo, o lo o tu’uaia ai Nikolao i le moliaga e tasi o le umia faasolitulafono o le vaega o le pauta faasaina o le aisa, atoa ai ma le moliaga e tasi o le umia faasolitulafono o vaega o le laau faasaina o le mariuana, o vaega uma ia o solitulafono mamafa, lea e mafai ona faasala ai se tasi i le toese mo le umi e mafai ona oo atui le 10 tausaga, pe faasala foi i le salatupe e mafai ona oo atu i le $20,000, poo le faasala fo’i i fa’asalaga uma ia e lua.

E $10,000 le vaega tupe lea ua fa’atulaga e le Fa’amasinoga e tatala ai Nikolao i tua mai le Toese i Tafuna.

Na teena e le afioga i le ali’i Faamasino ia Elvis P. Patea le talosaga a le alii loia ia Stuart mo se avanoa e faaitiitia ai le tupe e tatala ai Nikolao i le $2,000.

O le aso Lua o le vaiaso fou lea ua fa’atulaga e faia ai le ulua’i iloiloga o lenei mataupu.

TAGI A LE MALO

Na taua e le malo i le latou tagi e fa’apea, o le afiafi o le aso 25 o Ianuari pe tusa o le itula e 8:40, na logo ai e se alii faipisinisi Asia le Ofisa o Leoleo mo se fesoasoani, ona o se tasi o ana tagata faigaluega ua manu’a ina ua faaoolima i ai se tagata na alu atu i totonu o le faleoloa e ‘ona.

E to’atele Leoleo na tali atu i lea valaau ma maua ai loa le avanoa e fesiligia ai le alii faipisinisi atoa ai ma molimau sa i ai e faatatau i lenei fa’alavelave. E fetaui le taunuu atu o Leoleo e aga’i ese loa se pikiapu lanu uliuli sa paka i luma o le Faleoloa ma aga’i atu i le itu i i Ottoville.

E tusa ai o faamatalaga sa tuuina atu i Leoleo e uiga i lenei fa’alavelave, na taua ai e molimau e fa’apea, pe tusa o le itula e 5:20 i le afiafi o le aso lava, ae amata loa se inugapia a ni alii se to’atolu i tua o le latou pikiapu lea sa paka i luma o le Faleoloa.

Ina ua tuana’i itula e 2 talu ona faia lea inugapia, sa amata loa ona faalogoina le pisapisao o alii e to’atolu atoa ai ma le latou lafo o faaupuga le manuia i tagata e aga’i atu i le faleoloa e fa’atau.

Sa i ai se taimi na togi ai e se tasi o i latou nei sa inupia i luma o le faleoloa se atigi fagu pia ma ta’e ai i luga o le vaega e paka ai ta’avale a le faleoloa.

O le taimi lea na alu ane ai loa se tagata faigaluega o le faleoloa ma talosaga i alii nei ina ia tuua loa le nofoaga ma o ese ona ua fai i latou ma faalavelave i tagata fa’atau. O le alii faigaluega o le faleoloa lea na savali ane i le au alii sa inupia, o ia tonu lea na aafia i lenei faalavelave.

Na faatonu e le susuga a Nikolao le alii  na aafia e sili pe a toe savali i totonu o le faleoloa manu e lei oo ni puapuaga ia te ia. Na lafo mai e le alii faigaluega ni upu palauvale ia Nikolao, ae sa faapea fo’i ona tali atu i ai Nikolao i ana upu palauvale.

I se taimi o le po, na aga’i atu ai loa Nikolao i totonu o le faleoloa e faatau mai nisi a latou fagupia. A o savali atu Nikolao i tua i le pusa aisa e aumai ai pia, sa ia vaaia le alii lea na palauvale atu ia te ia o loo teu oloa mai i le isi itu o le faleoloa.

E le i toe faatali Nikolao ae ua aga’i atu loa i le vaega tonu o loo galue mai ai le alii lea, ma fesili i ai i le mafua’aga na valaau atu ai ia te ia. A o taumafai le alii na aafia e tau faamanino ia Nikolao le mafua’aga na alu atu ai ma tutuli ese latou, na faafuase’i ona tu’i e Nikolao o ia ma pau ai i lalo.

Na ta kiki e Nikolao foliga ma le tino o le alii na aafia i ona seevae ao taatia ai o ia i lalo o le fola o le fale ua manu’a ona foliga. Na aapa atu Nikolao i se apa meaai sa i luga o le fata ma aumai ae tu’i ai le ulu o le alii na aafia ma manu’a tigaina ai o ia.

E lata i le itula talu ona taamilo Leoleo e saili le pikiapu a Nikolao ma ana uo, ae latou maua loa o loo paka i luma o se faleaiga i totonu lava o Tafuna pe tusa o le itula e 11:00 i le po lava lea.

Na molimauina e Leoleo le onana o alii e to’atolu o loo i totonu o le pikiapu, lea o lo o aofia ai ma Nikolao.

Na pu’e faapagota e Leoleo ia Nikolao faatasi ai ma ana uo e to’alua ma auina atu loa i latou i le Ofisa o Leoleo i Tafuna mo suesuega. A o le i auina atu i latou nei i le Ofisa o Leoleo i Tafuna, sa muamua saili e Leoleo o latou tino ina ia iloa ai poo latou tauaveina ni aupega malolosi.

E leai ni aupega poo ni fualaau faasaina na maua i alii e to’alua na o atu ma Nikolao. Ae ina ua saili e Leoleo le tino o Nikolao, sa latou maua i ai se pepa iila o lo o i ai vaega o le laau faasaina o le mariuana i le isi taga o lona ofu, ae o le isi taga sa maua i ai se tama’i ato uliuli o loo i ai paipa tioata e 2 o lo o tutumu i vaega o le pauta o le aisa.

Na faia se suega faapitoa i vaega nei ma faamaonia ai, o vaega ia o le laau faasaina o le mariuana atoa ai ma le pauta faasaina o le aisa.

Ina ua fesiligia Nikolao e faatatau i fualaau fa’asaina sa maua ia te ia, na ia taua ai e fa’apea, o fualaau fa’asaina na faatau mai i sana uo ave taxi e nofo i Vaitogi.

Na toe tatala i tua uo e to’alua a Nikolao ae taofia faapagota le ua molia i le toese i Tafuna.