Pago Pago - AMERIKA SAMOA

O le taeao o Ianuari 31, 2025 na fa’afeso’ota’i ai e se alii ia le Ofisa a Leoleo i Fagatogo, e ripotia ai lana uo, e suafa ia Hunter, i le faatupu vevesi i se pati a le latou aiga.  Na ta’ua e le alii na valaau i leoleo, le fa’asuaava o lana uo ma sa palauvale leotele ia te ia ma lona tuafafine.

E taunu’u atu leoleo ua sola ese Hunter ae na mafai ona lokaina o ia i se taimi mulimuli ane ma lokaina ai o ia.

Na fa’ailoa atu e le alii na valaau i leoleo, lona mana’o e faila sa fa’atonuga faaletulafono e fa’asa ai le na molia, mai i le toe alu atu i le latou fale.

Sa taumafai leoleo e saili ia Hunter, ae peitai, e le’i mauaina o ia.  Ae o le taeao na soso’o ai, na toe vala’au mai ai le alii na valaau muamua i leoleo, e fa’ailoa mai i leoleo, ua toe fo’i atu Hunter i le latou fale ma toe fa’aauau ona faatupu vevesi.

Na ta’ua e le alii na valaau i leoleo le taumafai o Hunter e tu’i o ia, ae na mafai ona o latou taofiofia o ia, ma ana tuafafine.

Sa faamatala e se tasi o molimau, na valaaulia atu Hunter i se pati a le latou aiga, ona e uo ma lona tuagane.  Ae peitai, na fa’asuaava le na molia ma amata ona laulauvavale solo.  Na ta’ua e le molimau le taumafai o lona tuagane e fa’afilemu ia Hunter, ae na taumafai le na molia, e tu’i lona tuagane.  Ae ina ua vala’au e lona tuagane ia leoleo, na sola ese ai Hunter.

O se taimi mulimuli ane, na toe fo’i atu ai le na molia ma toe amata ona palauvale i tagata ma fa’aleagaina meatotino o le fale, e pei o ipu i luga o le laulau ma se ‘laptop’ a le molimau, e $300 lona tau.

Ina ua taunuu leoleo, na va’aia le toe taumafai o le na molia, e sola ese ae peitai, sa mafai ona taofia o ia ma lokaina mai ai loa e leoleo ma aveina atu i le to’ese i Tafuna.

O moliaga na faia e faasaga i le na molia, na aofia ai le moliaga i le Faatupu Vevesi i totonu ole aiga, o se vaega ‘C’ i solitulafono mama, e mafai ona nofosala ai i le falepuipui mo aso e 15, po o se sala tupe e $300; po o faasalaga uma e lua.

O isi moliaga, na aofia ai le Fa’ao’olima i lona tulaga e tolu faapea ma le Fa’aleagaina o meatotino a isi, i lona tulaga e lua.

O nei moliaga, o ni vaega ‘A’ i solitulafono mama, e mafai ona nofosala ai i le ta’I tausaga, po o se sala tupe e ta’i $1,000; po o faasalaga uma e lua.

E $600 se vaegatupe na fa’atulagaina e tatalaina ai le na molia, e fa’atalitali ai lona fa’amasinoga.