Ads by Google Ads by Google

Molia se ali’i faia uiga mataga i se tamaitai na sola ese ma lona aiga


[ata: SN]
ausage@samoanews.com

Pago Pago, AMERIKA SAMOA

 

O le vaiaso na te’a nei na pu’e faapagota ai e Leoleo se ali’i mai le  afioaga o Amouli ona o tu’uaiga i lona faia lea uiga mataga i se tamaitai e 16 tausaga le matua na sola ese mai lona aiga ina ua tula’i mai se vevesi i lo la va ma lona Tina.

 

O  le ali’i na pu’e faapagota e Leoleo ma molia i lenei mataupu, o le susuga lea a Rene Finau, o se ali’i sa ta’usala fo’i e le Fa’amasinoga Maualuga i le 4 tausaga talu ai i lona ulufale faamalosi i le fale o se aiga ma ia taumafai e fai uiga mataga i se tamaitai e 13 tausaga le matua sa moe i totonu o lona potu.

 

O le vaiaso na tea nei na tula’i ai Finau i luma o le Fa’amasinoga Faaitumalo mo lana ulua’i iloiloga. Ua molia o ia i le moliaga o le faiaiga faamalosi ma se tamaitai e talavou i lalo o le tulafono, o se solitulafono mamafa o le vaega B e mafai ona faasala ai se tasi i le Toese mai le 5 e oo atu i le 15 tausaga, faapea ai ma moliaga e tasi o le faia o amioga faasotoma ma le moliaga e tasi o le tagofia o itutinosa o se tamaitai, o le vaega D lea o solitulafono mamafa e mafai ona faasala ai se tasi i le Toese i le umi e oo atu i le 5 tausaga, pe faasala foi i le salatupe e oo atu i le $5,000, pe faasala foi i faasalaga uma ia e 2; atoa ai ma le moliaga e tasi o lona faia o ni gaioiga e ono lamatia ai le saogalemu o fanau laiti, o le vaega A o solitulafono mama e mafai ona faasala ai se tasi i le Toese mo le umi e oo atu i le tasi le tausaga, pe faasala foi i le salatupe e oo atu i le $1,000, poo le faasala fo’i i faasalaga uma ia e 2.

 

E $20,000 le vaega tupe lea ua fa’atulaga e totogi ona faatoa mafai lea ona tatala le ua molia i tua mai le Toese i Tafuna.

 

Afai ae tatala Finau i tua, ua poloaina o ia e le Fa’amasinoga e aua ne’i toe taumafai e faafesoota’i le tamaitai na aafia i lenei mataupu poo lona aiga fo’i i soo se auala, pe taumafai fo’i e alu i lona fale, a ia avea o ia ma tagatanu’u lelei e tausi i tulafono a le malo i taimi uma lava ma ia auai i soo se taimi e valaau ai lana mataupu i luma o le Fa’amasinoga

 

TAGI A LE MALO

 

E pei ona taua e le malo i le latou tagi e faapea, i le aso Tofi o le vaiaso na te’a nei, aso 8 o Aperila, 2021 na aga’i atu ai se Tina i le Ofisa o Leoleo i Tafuna e faila lana ripoti e faatatau i lana tama teine e 16 tausaga le matua ua le iloa poo fea ua aga’i i ai.

 

Na taua e le Tina i Leoleo e faapea, o le aso aoauli o le aso Lulu ua tuana’i, aso 7 o Aperila na tuua ai e lana tama teine lo la aiga e le i toe fo’i atu lava.

 

Na maua le avanoa e fesiligia ai e Leoleo Suesue le Tina e tusa ai o le mataupu e pei ona ia taua. 

 

Sa ia faamatala i Leoleo e faapea, sa i ai se feeseeseaiga na tula’i mai i le va o ia ma lana tama i le aso Lulu e pei ona ia taua, e mafua mai i le uaea e fafaga ai le ma’a o le telefoni. Na umi se taimi o fai le la tauga upu ma i’u ai loa lana faaiuga, o le a ia tuua le fale ae aga’i atu i se isi nofoaga e nofonofo ai e faato’a filemu loa mafaufau ona toe sau ai fo’i lea i le fale.

 

Ae ina ua toe fo’i mai i lo la aiga i le itula e 3:20 i le afiafi, na te le i maua mai lana tama i le fale, sei vagana ai se tusi sa tusia e lana tama sa i luga o le Laulau, lea sa faailoa atu ai, o ia o loo alu i le Maketi i Fagatogo e eva ai ona toe fo’i atu lea i le fale. 

 

Ina ua po le aso e le i toe fo’i atu lana tama i le fale, sa amata loa ona popole le Tina ma ta’amilo solo i vai ‘aai e saili lana tama poo nisi fo’i sa latou te silafia se mea o loo i ai lana tama. 

 

O se ripoti na maua e le Sifi Po a le Ofisa o Leoleo i Tafuna i le po o le aso Tofi, na mafai ona latou faasoa i le Sifi Ao o le aso Faraile na sosoo ai, na taua ai se faasalalauga na tusia e le Tina o le tamaitai na aafia ma tuu i luga o fesootaiga faaonapo nei (Facebook), o loo talosaga ai le Tina i soo se tasi aemaise lava i uo ma aiga latou te silafia ni faamatalaga e uiga i lana tama teine, ina ia faafesoota’i atu o ia i soo se taimi.

 

I lea faasalalauga na taua ai e se tamaitai mai Amouli i le Tina lona vaaia o lana tama teine i le fale o le susuga a Rene Finau i Amouli. Na taua atili e le tamaitai lea i le Tina o le tamaitai na aafia, o loo i ai pea lava lana tama i le fale o Finau i le taimi lea o le aso Faraile.

 

Na logo e Leoleo Suesue a le Ofisa o Leoleo i Tafuna le Taitai Uati o le Ofisa o Leoleo i Fagaitua ma faailoa i ai le tulaga o le mataupu, ma aga’i atu ai loa Leoleo i Amouli i le fale o Finau e saili pe moni o loo i ai le tamaitai na aafia. Na maua atu e Leoleo ia Finau ma le tamaitai na aafia i lona fale i Amouli, ma logo ai loa le Tina o le tmaitai na aafia e tusa ai o lenei mataupu, mulimuli ane auina atu i laua i le Ofisa o Leoleo i Tafuna mo le faaauauina o suesuega.

 

Ina ua fesiligia e Leoleo le tamaitai na aafia, sa ia faamatala ai loa le mea atoa sa tupu, e afua mai i le la taugaupu ma lona Tina e mafua mai i le uaea e fafaga ai le ma’a o le telefoni, ma ia manatu ai loa e tuua le la aiga ae aga’i atu i le maketi i Fagatogo e tafao ai. Sa ia taua fo’i lona tusia o se tusi ma tu’u i luga o le laulau e faailoa atu ai i lona Tina le mea o loo i ai.

 

E taunu’u loa le tamaitai na aafia i le maketi i Fagatogo i le afiafi lea o le aso Tofi, na fetaui fo’i ma le vili ane o lana uo tama (Finau) e asi ane o ia, ma faailoa ai loa e le tamaitai na aafia i lana uo tama le mea ua tupu i le va o ia ma lona Tina, ma faatonu ai loa e Finau le tamaitai na aafia e vaai le pasi mulimuli e alu atu ai i lona fale i Amouli la te tafafao ai.

 

Na usita’i le tamaitai i le faatonuga ma aga’i atu ai loa i le vaega e pu’e ai le pasi mulimuil ma aga’i atu ai loa i le fale o Finau i Amouli. 

 

Na taua e le tamaitai na aafia i Leoleo e faapea, na ona taunuu lava i Amouli, aga’i atu loa ma Finau ma faafetauli o ia, ma la aga’i atu ai loa i totonu o le potu a Finau ma la feusua’i ai loa.

 

A o le i fesiligia e Leoleo ia Finau e uiga i lenei mataupu, na muamua faitau i ai ona aia tatau faaletulafono, ma fa’aalia ai e Finau lona malamalama i ona aia tatau, ma ua ia sauni fo’i e tuuina atu lana faamatalaga i Leoleo e tusa ai o le mea sa tula’i mai.

 

Na taua e  Finau i Leoleo Suesue le la talanoaga ma le tamaitai na aafia i le telefoni, ma faailoa atu ai loa e le tamaitai na aafia ia te ia le mea ua tupu ia te ia ma lona Tina, ma ia faatonuina ai loa o ia e alu atu i Amouli la te eva ai mo le po.

 

Na ioe Finau i Leoleo e faapea, ina ua taunuu le tamaitai na aafia, sa alu ane ma faatali, ma la aga’i atu ai loa i totonu o lona potu ma la feusua’i ai.

 

Na faamanino atili e Finau i Leoleo Suesue, na te lei faamalosia le tamaitai na aafia la te fai’aiga, ae na malie ai lava o ia la te fai’aiga.

 

SOLITULAFONO MUAMUA

 

O le tausaga e 2017 na faasala ai e le Faamasinoga Maualuga le susuga a Finau e nofosala i le Toese i Tafuna mo le 28 masina, o se tasi lea o tuutuuga o lana nofovaavaaia e 7 tausaga, ina ua ta’usala o ia i le moliaga o le taumafai e faamalosi se tamaitai e 13 tausaga le matua.

 

O se faalavelave na tula’i mai i le 2016 na mafua ai ona nofosala Finau i le Falepuipui, ina ua ia ulufale faamalosi i totonu o le fale o se aiga i le po e aunoa ma se faatanaga, ma ia taumafai ai e faia uiga mataga i le tamaitai e 13 tausaga na aafia i lenei mataupu sa moe i lona potu.

 

Na taua e le malo i le latou tagi e faapea, na ee le tamaitai na aafia ina ua ia faalogoina se tagata o taoto faamamafa atu ia te ia ma tago atu i ona itutinosa. Na alu i le atoa i fafo Finau ma le fale ina ua ee le tamaitai na aafia ae tuliloa atu e tagata o le aiga.

 

I le aso na lau ai lona faasalaga i le tausaga e 2017, sa ia faatoese i le Faamasinoga ma ta’utino, na te le toe faia ni uiga mataga i fanau teine talavou, na te le toe solia fo’i se tulafono a le malo, ae laa avea o ia ma tagatanu’u e tausisi i soo se tulafono i taimi uma.