Pago Pago - AMERIKA SAMOA

E tusa ai ma fa’amaumauga a le malo, o le aso 31 o Iulai, 2024, na fa’afeso’ota’i ai e le pule o se pisinisi fale taavale ‘rental’, ia le Ofisa a Leoleo i Fagatogo, e ripotia ai se tasi o ana taavale ‘rent’, na su’e mai lava i le aso 19 o Iulai.

Ma sa ta’ua e le pule o le fale ‘rental’, le suia o le laisene o le ta’avale, ae na mafai ona ia fa’amaonia o lana taavale lea (RAV-4), ona o le ma’osia i luga o le faamalama ma le leai o se vaega o le pa’u i le itu tauagavale pito i tua.

Sa faamatalaina foi e le pule o le fale ‘rental’, le moe ai i totonu o le taavale ia se alii, a’o tu le taavale i le pakaga taavale a le faleoloa a Aveina, i Nu’uuli.

Na mafai ona fa’amaonia e leoleo, o le laisene lea o lo’o pipi’i i le ta’avale (RAV-4), o se laisene a se taavale 2002 Toyota Tacoma lanu uliuli, ma e ese le igoa o le tagata o lo’o lesitala i le laisene lea.

Sa faapea loa ona aga’i atu leoleo i le nofoaga na iai le pule o le fale ‘rental’ ma sa fa’amaonia e le pule o le fale ‘rental’ i leoleo, o lana taavale lea o lo’o tu i luma o le faleoloa, ae e ‘ese le laisene o lo’o pipi’i ai.

Na ta’ua e le pule o le fale ‘rental’, o le aso 19 na tatau ona toe fa’afo’i atu ai lana ‘rental’, ae peitai, na toe suia le aso e toe fa’afo’i atu ai le taavale i le aso 20.

O le aoauli o lea lava aso, na aveina ai e leoleo ia le ta’avale (RAV-4) ma lokaina i lo latou laumua i Fagatogo.  Ae amataina su’esu’ega i le ua molia, le susuga ia Viiga Phillip Taala, lea sa maua atu o moe i totonu o le taavale.

Ae e le’i amataina ona su’esu’eina le ua molia, sa ia talosagaina le auai atu o sana loia.  Ma e ui ina sa musu e fai sana faamatalaga, ae peitai, sa ia fa’ailoa atu i leoleo lona faatauina o le taavale mai i se tasi e masani ai i Faga’alu, ma ia suia le laisene.

O lo’o ta’ua i fa’amaumauga a leoleo, le faia e le pule o le fale ‘rental’ ia se ripoti i le aso 29 o Iulai, 2024 e tusa ai ma le le toe fa’afo’i ina atu o lana taavale talu mai le aso 20 o Iulai.  Ma na ta’ua ai e le pule o le fale ‘rental’, le le toe va’aia o le taavale i aso e 9 ma ua ia masalomia le suia o le laisene o le taavale.

 O le aso lava lea e tasi, sa salalau ai se fa’aaliga a leoleo ina ia nofouta mo le taavale, pe a va’aia i luga o le alatele, ia ave sa’o atu i le laumua.

Ua molia nei Ta’ala i moliaga e tolu, e aofia ai;

Faitauga 1:  Gaoi – o se vaega ‘C’ o solitulafono mamafa, e mafai ona faafalepuipui ai i le le silia ma le fitu tausaga, po o se sala tupe e le sili atu ma le $5,000; po o faasalaga uma e lua.

Faitauga 2:  Suia o le laisene, i lona vaega e lua – o se vaega ‘A’ o solitulafono mama, e mafai ona nofosala ai i le falepuipui i le le sili atu ma le tausaga, po o se sala tupe e le sili atu ma le $1,000; po o faasalaga uma e lua.

Faitauga 3:  Laisene sese – o se vaega ‘B’ o solitulafono mama, e mafai ona nofosala ai i le falepuipui, i le le sili atu ma le ono masina, po o se sala tupe e le silia ma le $500; po o faasalaga uma e lua.

E $15,000 na fa’atulagaina e mafai ona tatalaina ai le ua molia, mai i le falepuipui, e faatalitali ai lona faamasinoga.