Pago Pago - AMERIKA SAMOA

O lo’o ta’ua i faamaumauga a le malo, le o’o atu o se valaau i le Ofisa a Leoleo i Tafuna, mai i se tina loto mafatia, ma ia ripotia atu ai lana uo tama, sa faia ni uiga taufa’amata’u i sona alo e 14 tausaga le matua, ma se agaese.

Sa ta’ua e lenei tina le fa’asuaava o lana uo tama i le taimi na ia taumafai ai e fa’afefe lona alo, i le agaese.

(O lo’o taofia e le Samoa News/Lali ia le lomiga o suafa o i latou na a’afia ma molia, i lenei faalavelave, aua le puipuiga o fanau iti.)

Ina ua taunu’u leoleo i le nofoaga na tupu ai le faalavelave sa molimauina ia le pisapisa o o le ua molia ma na faapea loa ona avefaapagotaina o ia ma tu’uina i totonu o le taavale leoleo.

Ina ua mae’a lea, sa amataina loa su’esu’ega a leoleo, i le tina lea na valaau atu i le ofisa a leoleo.  Ma na faamaonia e lenei tina i leoleo, o le alii lea ua lokaina e leoleo, o lana uo tama lea.

Ma na fa’amatala e le tina e faapea, e le o malamalama o ia i le mafuaaga ua so’ona pisa ai lana uo tama, ae o lo’o fa’asuaava o ia ma na amata lava ona fa’apisa o ia, talu mai se fe’ese’eseaiga i le va o le ua molia ma le alo a le tina.

O lo’o ta’ua foi i totonu o faamaumauga a le malo, le fa’asuaava o le tina ma sa faatonuina o ia e leoleo, e latou te mlaga faatasi i le ofisa a leoleo, mo le fa’aauauina o su’esu’ega a leoleo.  Ma sa faapena ona faia.

Ina ua fa’atalanoaina e leoleo ia le alo a le tina (le tamaititi 14 tausaga), sa ia ta’ua e faapea, na alu i totonu o le fale e fufulu ona lima ae alu atu le ua molia, ma fesiligia o ia pe aisea ua susu ai le potu malolo.  Ina ua tali mai le tamaititi, o le ta’ifau, sa le’i talitonu le ua molia ma fa’aauau pea ona ia tu’ufesili i le tamaititi, i le mafuaaga ua susu ai le potu malolo.  Ae peitai, e le’i suia ai le tali a le tamaititi.  Lea na i’u ai lava ina u’u mai e le ua molia ia le ua a le tamaititi.

Ma o le taimi lena na oso atu ai le tina lea na valaau i le ofisa a leoleo ma taumafai e taofi le ua molia ina ne’i o’o ni manu’a i le tamaitititi.  Ma na avea lea ma tulaga na le fiafia ai le ua molia, i le tina ma faapea atu ai le ua molia i le tina, ua leaga le faiga o lana fanau ma o le mafuaaga lea o le le fa’aaloalo o ona alo.

Ona savali lea o le ua molia, ma u’u mai se agaese ma fa’afefe ai le tamaititi ma palau leotele.

O lo’o ua ta’ua foi i totonu o fa’amaumauga a le malo, le fa’aauau ona ‘e’e o le ua molia, i le tina ma lana fanau, ma palauvale iai.  Ma na’e’e le ua molia, ua uma ona ia faia mea uma mo i latou, ae faapea ona fai o ia.

Ona taumafai lea o le ua molia, e ta le tamaititi i le agaese, ae oso atu le tina ma u’una’i ese oia.  O iina lea na valaau ai loa e le tina ia le Ofisa a Leoleo mo se fesoasoani.

Na fa’amaonia e le tina ia le molimau a lona alo ma ia talosagaina se auaunaga a le EMS ona o se ma’osia i le lima a lona alo, mai i atigilima o le ua molia.

Ua molia nei lenei alii i faitauga e lua, e aofia ai:

Faitauga 1:  O le fa’ao’olima i lona tulaga e tolu (sauaga i totonu o aiga), o se vaega ‘A’ o soligatulafono mama, e mafai ona faafalepuipui ai i le o’o atu i le tausaga atoa, po o se sala tupe e $1,000; po o faasalaga uma e lua.

Faitauga 2:  Faia o se gaioiga e ono a’afia ai le saogalemu o fanau iti (sauaga i totonu o aiga), o se vaega ‘A’ o solitulafono mama, e mafai ona nofosala ai i le tausaga atoa, i le falepuipui, po o se sala tupe e $1,000; po o faasalaga uma e lua.

E $5,000 se vaegatupe sa faatulagaina e tatalaina ai le ua molia mai i le falepuipui, e faatalitali ai lona faamasinoga.