Ads by Google Ads by Google

Molia se alii i lona faatau faagaoi o ni taavale e le patino ia te ia


Le Fa’amasinoga Faaitumalo [ata: SN]
ausage@samoanews.com

Pago Pago - AMERIKA SAMOA

 

O le alii inisinia mai Ottoville lea na ia faatau faagaoi ni taavale se 2 e le patino ia te ia i nisi tagata i se auala faasolitulafono, ua taofia nei o ia i le Toese i Tafuna ina ua mae’a ona pu’e faapagota o ia e Leoleo i le vaiaso na te’a nei ma molia i le tulafono.

 

O le vaiaso na te’a nei na tula’i ai le susuga a Keiti Lisala i luma o le Fa’amasinoga Faaitumalo. 

 

E 2 tagi ua faila e le malo faasaga ia Lisala.

 

I le tagi muamua, o lo o molia ai o ia i le solitulafono o le gaoi, atoa ai ma le solitulafono o le ave faagaoi o ni meatotino sa tuuina atu i lalo o lana vaavaaia, o le vaega C lea o solitulafono mamafa, lea e mafai ona faasala ai se tasi i le Toese i le umi e le sili atu i le 7 tausaga, pe faasala foi i le salatupe e le sili atui le $5,000, pe faasala foi i faasalaga uma ia e lua.

 

E $15,000 le tupe ua faatulaga e le Fa’amasinoga e totogi ona mafai lea ona tatala le ua molia i tua mai le Toese i Tafuna.

 

I le tagi lona 2, ua molia ai le ua molia i le solitulafono o le ave faagaoi o ni meatotino sa tuuina atu i lalo o lana vaavaaia, atoa ai ma le solitulafono o le gaoi, o le vaega C lea o solitulafono mamafa.

 

E $15,000 lea ua faatulaga e le Fa’amasinoga e totogi ona mafai lea ona tatala Lisala i tua mai le Toese i Tafuna i le tagi lona lua ua faila faasaga ia te ia.

 

TAGI MUAMUA

 

E pei ona taua e le malo i le latou tagi muamua, o le aso 16 o Fepuari na aga’i atu ai se Tina ma lana tama i le Ofisa o Leoleo i Tafuna ma la talosagaina le fesoasoani a Leoleo faasaga i se alii na ia faatau atu se taavale ia te i laua, a o lea ua maua ane e le o sana ta’avale lea na ia faatau atu i le tau e $10,000.

 

Na taua atili e le Tina i Leoleo Suesue e faapea, o lea faatoa manino le mata o le vai, e ese le tagata e ana le taavale, o ia fo’i lena o loo i ai pepa o le ta’avale.

 

Na taua e le Tina i Leoleo Suesue e faapea, i le aso 31 o Tesema o le tausaga na te’a nei, na la o ai ma lana tama teine i le fale o le alii inisinia o Keiti Lisala i Ottoville e faatau mai lana taavale, le ituaiga o le ‘Nissan Rogue 2015’.

 

I le mae’a ai o se latou talanoaga ma Lisala, na malie ai loa Lisala la te faatauina lana ta’avale i le $10,000, ae togi togi atu le tau o le ta’avale, fuafua lava i le tupe la te maua.

 

E $3,000 le tupe na totogi muamua e le Tina ma lana tama teine ia Lisala ae avatu le ta’avale mo laua. Ina ua mae’a ona tauaao e le Tina le $3,000 ia Lisala, na faailoa atu e Lisala ia te i laua, e le o ia te ia pepa o le ta’avale, ae sei uma lona pisi ona alu atu lea e momoli atu pepa o le ta’avale.

 

I le tuana’i ai o aso e 4 ia Ianuari 3, 2022, na toe o ai le Tina ma lana tama teine i le fale o Lisala i Ottoville ma totogi le isi $3,000 mo le tau o le ta’avale. O le taimi lea na faia ai loa ma le latou maliliega, seiloga lava e avatu e Lisala pepa o le ta’avale ona faatoa totogi faamae’a atu loa lea e le Tina ma lana tama le paleni o lo o totoe mo le tau o le ta’avale e $4,000.

 

E silia ma le masina o faatali pea le Tina ma lana tama i pepa o le ta’avale, o le mafua’aga lea na la toe o ai loa i le fale o Lisala i le aso 16 o Fepuari 2022 e fesiligia o ia i pepa o le ta’avale.

 

E fetaui le taunu’u o le Tina ma lana tama teine i le fale o Lisala, ae o lo o i ai fo’i ma se alii Asia i le taimi lea. Na vaaia e le alii Asia lea le Tina ma lana tama teine o lo o tietie atu i le ta’avale, ona alu ane lea ma faailoa i ai, o le ta’avale o loo la tietie atu ai, o le ta’avale a ia, na avatu ia Lisala e faafou nisi o vaega sa moomia le faaleleia, ae ua fiu e faatali mai le taimi e toe faafo’i atu ai e Lisala le ta’avale.

 

Na faaali e le alii Asia lea i le Tina ma lana tama teine pepa o le taavale e faamaonia ai, o ia e ana le ta’avale.

 

O le mae’a ai o le talanoaga a le alii Asia ma le Tina ma lana tama teine, na aga’i sa’o atu ai loa le Tina ma lana tama teine i le Ofisa o Leoleo i Tafuna ma faila loa le la tagi faasaga ia Lisala.

 

Na maua le avanoa e fesiligia ai fo’i e Leoleo Suesue le tama teine a le Tina na aafia e tusa ai o lenei mataupu.

 

Na faamaonia e le tamaitai lea i Leoleo, sa i ai fo’i i le fale o Lisala i le taimi na osia ai le maliliega i le va o lona Tina ma Lisala e faatatau i le ta’avale.

 

Na taua e le tamaitai e faapea, i le aso 31 o Tesema 2021, na telefoni atu ai Lisala i lona Tina ma faailoa atu, e i ai lana taavale, le ituaiga o le Nissan Titan, o le pikiapu o lo o fia faatau, pe mana’o i ai.

 

Ina ua tali ioe le Tina ia Lisala, na fai atu ai loa Lisala i le Tina e faatali mai, o lea laa alu atu e piki mai o ia e sau e faataitai le ta’avale pe mana’o ai. 

 

Ina ua latou taunuu i le fale o Lisala i Ottoville, na toe sui ai iina le tala a Lisala, ma ia faailoa i le Tina ma lana tama teine, e le o faatauina lana pikiapu, le ituaiga o le ‘Nissan Titan’, se’i vagana ai le isi ana ta’avale, le ituaiga o le ‘Nissan Rogue 2015’ e $10,000.

 

Na taua e le tamaitai i Leoleo Suesue le malie o lona Tina i le ta’avale lea ua ofa atu e Lisala, ma totogi ai loa e lona Tina le $3,000 mo le tau amata o le ta’avale.

 

Na faamaonia e le tamaitai le faamatalaga a lona Tina, e tusa ai o le isi $3,000 na totogi mo le tau o le ta’avale i le aso 3 o Ianuari o le tausaga nei, ma faia ai loa ma le isi maliliega, faatoa totogi atu le $4,000 o loo totoe i le tau o le ta’avale pe afai ae avatu e Lisala pepa o le ta’avale.

 

O le aso 16 o Fepuari na la o ai ma lona Tina i le fale o Lisala e fesiligia i pepa o le ta’avale, ae latou fetaui ai loa ma se alii Asia na ia faailoa ane ia te i laua ma lona Tina, o ia e ana le ta’avale o loo la feoa’i ai.

 

O le aso lava lea na faila ai loa le la tagi i le Ofisa o Leoleo i Tafuna faasaga ia Lisala.

 

Ina ua fesiligia e Leoleo ia Lisala e tusa ai o lenei mataupu, sa ia ioeina ai faamatalaga ma tu’uaiga uma faasaga ia te ia ma le ta’avale. Sa ia ioeina lona faatau atu o le ta’avale i le Tina ma lana tama teine, e ui sa ia iloa e le o sana ta’avale, ae o le ta’avale a se alii Asia na avatu e faaleleia vaega sa faaletonu.

 

TAGI LONA LUA A LE MALO

 

E tai foliga tutusa lava le tagi muamua ma le tagi lona lua faasaga ia Lisala. O le aso 28 o Fepuari na te’a nei na aga’i atu ai se ulugalii i le Ofisa o Leoleo ma faila le la tagi faasaga ia Keiti Lisala, i lona faatauina atu o se ta’avale ia te i laua i le $12,000, ae mulimuli ane manino le mata o le vai, o le ta’avale rental mai se tasi o tagata faipisinisi lea ua faatau atu e Lisala ia te i laua.

 

Na taua e le Pule o le kamupani Rental i Leoleo Suesue e faapea, o le aso 10 o Fepuari na alu atu ai Lisala ma rent mai lana taavale, le ituaiga o le 2021 Ford F-150. E oo mai i le aso lea, ua leva ona tuana’i le aso sa tatau ona toe faafo’i atu ai le ta’avale, ma e $4,000 le tupe e tatau ona totogi atu e Lisala e tusa ai ma lona faaaogaina o le ta’avale.

 

Na taua e le Pule o le Kamupani Rental lona fiu e vili le telefoni a Lisala ae ua le toe tali au. Ae a i ai taimi e tali atu ai Lisala i lana ta’avale, ona pepelo atu lea, sei uma lona pisi ona alu atu lea e faafo’i atu lana ta’avale ma totogi atu le tupe mo le faaaogaina o le ta’avale.

 

 

O le aso 2 o Mati 2022, na aga’i atu ai se ulugalii ma faila le la tagi faasaga ia Lisala e tusa ai o le ta’avale na ia faatau atu ia te i laua i le $12,000, a o lea ua manino e le o sana ta’avale.

 

Na taua e le Tina i Leoleo e faapea, o Lisala na telefoni atu ia te ia pe mana’o e faatau lana ta’avale o lo o i ai. Na tali i ai le Tina ioe, ma alu ai loa e faataitai le ta’avale.

 

Ina ua faailoa e le Tina ia Lisala o ia e mana’o i le ta’avale, na fai ai loa Lisala e $12,000 le tau o le ta’avale. Na totogi muamua e le Tina le $5,000 ia Lisala, sosoo ai ma le isi $5,000, ae mulimuli atu ai loa ma le $2,000.

 

Ina ua fesiligia e Leoleo ia Lisala e tusa ai o lenei mataupu, sa ia pepelo ai i Leoleo Suesue, na te le i faatauina atu le ta’avale i le ulugalii o loo tagi i lenei mataupu, ae sa ia ave i ai le ta’avale la te faaaogaina.

 

Na ioe Lisala, sa totogi atu e le ulugalii le $12,000 mo le tau o le ta’avale, e ui sa ia iloa lelei e le o sana ta’avale.