Ads by Google Ads by Google

Molia se ali’i i lona faia o uiga mataga i lona niece e 16 tausaga le matua


[ata: SN]
ausage@samoanews.com

Pago Pago, AMERIKA SAMOA

 

E 39 tausaga o se alii e to’afa lana fanau na pu’e faapagota e Leoleo i le masina na te’a nei ma ua molia i le tulafono, ona o tu’uaiga i lona faia lea o uiga mataga i lona niece e 16 tausaga le matua i le umi e 6 masina.

 

Na taua e le grandmother a le tamaitai na aafia e faapea, e foliga mai i faamatalaga na ia maua mai i lona aiga, na faataga e lana tama teine le ua molia e fai uiga mataga i lona granddaughter e aunoa ma se gaioiga e taofia ai nei uiga mataga ma le fa’aauau pea lea ona tula’i mai.

 

Ina ua pu’e faapagota e Leoleo le ua molia, na maua ai e Leoleo vaega o fualaau faasaina ia te ia.

 

(Ina ia puipuia le ono faigofie lea ona silafia e le to’atele le igoa o le tamaitai na aafia i lenei mataupu, o le a le mafai e le Samoa News ona faailoa suafa o i laua o loo aafia i lenei mataupu).

 

O le masina na te’a nei na tula’i ai le alii ua molia i luma o e Faamasinoga Faaitumalo mo lana ulua’i iloiloga. E 2 tagi eseese ua mae’a ona faila e le malo faasaga i le ali’i ua molia. I le tagi muamua a le malo, ua molia ai le ua molia i moliaga e 3 o le tagofia lea o itutinosa o se tamaitai e talavou i lalo o le tulafono; 3 moliaga o le faiaiga ma se tamaitai e talavou i lalo o le tulafono, o le vaega B lea o solitulafono mamafa, lea e mafai ona faasala ai se tasi i le Toese mai le 5 e oo atu i le 15 tausaga, faapea ai ma le moliaga e tasi o le faiaiga ma se tamaitai e aoga i ai, o le vaega D lea o solitulafono mamafa, faapea ai ma le moliaga e tasi o le faia o gaioiga e ono lamatia ai le saogalemu o fanau e laiti i lalo o le tulafono, o le vaega A lea o solitulafono mamafa, lea e mafai ona faasala ai se tasi i le Toese mo le umi e oo atu i le tasi le tausaga, pe faasala fo’i i le salatupe e oo atu i le $1,000, pe faasala foi i faasalaga uma ia e lua.

 

I le tagi lona lua a le malo faasaga i le Tama ua molia, ua tu’uia ai o ia i le moliaga e tasi o le umia faasolitulafono vaega o le pauta faasaina o le aisa, faapea ai ma le moliaga o le umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e oo atui le $20,000, poo le faasala foi i faasalaga uma ia e lua.

 

E $35,000 le vaega tupe lea ua faatulaga e le Faamasinoga e tatala ai i tua le ua molia. Afai ae tatala o ia i tua, ua faatonuina o ia e le Faamasinoga e saili se isi nofoaga e aumau ai mo le taimi nei, e le tatau ona toe nofo i lona aiga, ona e latalata lona fale i le fale o le tamaitai na aafia i lenei mataupu. 

 

E le mafai ona ia toe taumafai i soo se auala e faafesootai le tamaitai na aafia poo lona aiga, e le mafai ona ia telefoni i ai pe lafo ai fo’i se feau e ala atu i isi auala o fesootaiga faaonaponei. Ia avea o ia ma tagatanu’u e tausi i tulafono a le malo i soo se taimi, ma ia auai i soo se taimi e valaau ai lana mataupu

 

O le vaiaso fou lea ua faatulaga e faia ai le ulua’i iloiloga o lenei mataupu.

 

TAGI A LE MALO

 

E pei ona taua e le malo i le latou tagi e faapea, o le faaiuga o le masina o Ianuari i le amataga o le tausaga nei, na aga’i atu ai se Tina i le Ofisa o Leoleo i Tafuna ma talosaga se fesoasoani a Leoleo, faasaga i le sauaga faaauau pea o loo faia e lona to’alua faasaga ia te ia. 

 

Na taua e le Tina i Leoleo e faapea, soo se taimi lava na te fesiligia ai lona to’alua (le ua molia) e faatatau i masalosaloga i le la faanunumi faaleulugalii ma lona teine e 16 tausaga le matua, e oso ai le ua molia i lona faalii ma i’u ai lava i lona fasi o ia. O nisi o taimi pe a fasi e lona to’alua o ia, e matua manu’a ai lava vaega o le tino ma ua oo mai fo’i i le tulaga ua le lava ai onosa’i i sau’aga faaauau pea faasaga ia te ia.

 

Na taua atili e le Tina i Leoleo e faapea, o le amataga o le tausaga nei na faateia ai o ia i le talanoa atu o lona to’alua, o ia ua manatu e faamuta le la ulugalii ona ua le lava pologa i ona uiga le usita’i ma le fa’alii. Na  iloa mulimuli ane e le Tina ina ua faamatala atu i ai e se tagata o le aiga a lona to’alua ia te ia, o loo faia se mafutaga faaleulugalii a lona to’alua ma le tamaitai o lona aiga e 16 tausaga le matua.

 

Na faailoa manino e le Tina i Leoleo e faapea, e tusa ai o faamatalaga a se tasi o le aiga a lona to’alua, o le tele o po e alu atu ai le ta’avale a lona to’alua i le fale o le aiga ma piki mai le tamaitai na aafia, ona la aga’i lea i se isi nofoaga ma talatalanoa ai pe silia i le 3 itula.

 

O nisi o taimi e piki ai e le ua molia le tamaitai na aafia mai lona fale ma la aga’i atu i se tasi o fale tuufua i Nu’uuli ma la momoe ai. Sa i ai se taimi na tula’i mai ai se vevesi i le lotoifale o le aiga o le tamaitai na aafia, ina ua fautuaina o ia e lona aunty e taofi le la mafutaga faalilolilo ma le ua molia, ae faalii ai le tamaitai na aafia ma tau pule ai i lona ola. O lea gaioiga na avea ma itu na popole tele ai le aunty o le tamaitai na aafia, ma ia manatu ai loa e tu’u loa le ua molia ma le tamaitai na aafia e fa’aauau pea le la mafutaga faaleulugali’i.

 

E to’atele nisi o le aiga o le tamaitai na fesiligia e Leoleo e faatatau i lenei mataupu. O nisi o i latou nei e aofia ai le tamaitai na aafia, o lona aunty, o lona grandmother, faapea ai se tamaitai e tausoga ma le ali’i ua molia.

 

Na taua e le tamaitai na aafia ina ua fesiligia o ia e Leoleo e uiga i lenei mataupu, sa ia iloaina lava o lona uncle (le ua molia) e fai lona to’alua ma lana fanau, peita’i ua le mafai lava ona taofi lona alofa i ai, ona o ia o se tagata e agamalu ma loto alofa ia te ia. O le tele o taimi e avatu ai e le ua molia tupe ia te ia mo lana aoga, e oo lava foi i lona faatau o mea e mana’o i ai e aofia ai lana laptop ma lana telefoni.

 

Na taua e le tamaitai na aafia e faapea, ua tusa nei ma le 6 masina talu ona faaauau le la mafutaga faaleulugalii ma lona uncle (le ua molia). O le tele o po e alu atu ai le ua molia ma piki mai o ia i lona fale ona la aga’i atu lea i nisi o nofoaga ma la momoe ai. O nei gaioiga uma e malie i ai lona loto.

 

Na faaalia e isi molimau na fesiligia e Leoleo faamatalaga lava ia e tasi e tusa ai o le mafutaga a le ua molia ma le tamaitai na aafia. 

 

Na taua e le grandmother o le tamaitai na aafia lona le toe mana’o e tatala i tua le ua molia, ona o le mataga o le gaioiga sa ia faia, e le gata ua faaluma ai le aiga ae ua aafia atu ai fo’i ma lona to’alua ma lana fanau.

 

Na fiu Leoleo e saili le ua molia ina ua mae’a ona fesiligia molimau e tusa ai o lenei mataupu, ua le mafai ona maua o ia. Ae i le masina na te’a nei, na pu’e faapagota ai loa le ua molia e Leoleo mai le fale o lana uo i Happy Valley, na auina atu ai loa o ia i le Ofisa o Leoleo i Tafuna mo suesuega.

 

Ina ua fesiligia o ia e Leoleo, sa ia ioeina ai le la mafutaga faaleulugalii ma le tamaitai na aafia, poo lona lava niece. Na taua e le ua molia lona fiu e tete’e le tamaitai ae ua le mafai lava le naunau atu ia te ia. O le mafua’aga lea ua ia manatu e tuua lona to’alua ma lana fanau ae mafuta atu i le tamaitai ua alofa i ai.

 

A o le i auina atu le ua molia i le Ofisa o Leoleo i Tafuna mo suesuega, na saili e Leoleo lona tino na maua ai vaega o fualaau faasaina o le aisa ma le mariuana. Ina ua fesiligia o ia e tusa ai o fualaau faasaina, na ta’utino ai le ua molia, o ia e ana fualaau faasaina, na faatau mai i se tasi o ana uo mai Tafuna ma le fa’amoemoe e fa’aaoga mo ia lava.

 

Na faia se suega faapitoa i fualaau faasaina na maua i le tino o le ua molia ma faamaonia ai, o se vaega lea o le pauta faasaina o le aisa atoa ai ma vaega o le laau faasaina o le mariuana.