Pago Pago - AMERIKA SAMOA

Ua taofia nei i le Toese i Tafuna se ali’i mai Auma, Leone ona o tu’uaiga o lona faia lea o uiga mataga e aofia ai se mafutaga faaleulugali’i ma lona ‘stepdaughter’ i le 4 tausaga.

O se faasalalauga na tusia e le tamaitai e 16 tausaga le matua o loo aafia i lenei mataupu, sa ia faailoa ai i ana uo i luga o fesootaiga faaonaponei (social media) lona manatu e pule i lona ola, ona o le mataga o le olaga o loo aafia ai.

O nisi o uo ma aiga o lenei tamaitai na faitau i lenei faasilasilaga, sa latou faailoa i Leoleo ma mafua ai loa ona faia se suesuega faanatinati a Leoleo e tusa ai o lenei mataupu, ma i’u ina alia’e ai loa le solitulafono o loo natia i tua atu o lenei faalavelave.

O lenei solitulafono e pei ona taua e le malo, na amata faatino mai i le 4 tausaga talu ai i le 2018, i le taimi ao 12 tausaga o le teineitiiti ua aafia, ae o loo aoga foi o ia i le Vasega 6.

O le 2 vaiaso talu ai sa pu’e faapagota ai e Leoleo le ali’i ua molia ma taofia ai loa o ia i le Toese i Tafuna.

O moliga ua tu’uaia ai e le malo lenei ali’i e aofia ai le faia o uiga mataga faasaga i se teineititi e i lalo o le 12 tausaga le matua, o se solitulafono e mafai ona faasala ai se tasi i le Toese mo le umi e le itiiti ifo i le 10 tausaga e aunoa ma se avanoa e palola ai; 2 moliga o le faiaiga faamalosi atoa ai ma le moliga e tasi o le faia o uiga mataga faasotoma, o le vaega B lea o solitulafono mamafa, lea e faasala ai se tasi i le Toese mai le 5 e oo atu i le 15 tausaga le umi; faapea ai ma le moliga e tasi o le tagofia o itutinosa o se tamaitai atoa ai ma le moliga e tasi o le faiaiga ma se tagata e aiga i ai, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma ia e 2.

E $100,000 le vaega tupe ua faatulaga e le Fa’amasinoga e totogi ona faatoa mafai lea ona tatala le ua molia i tua.

Afai ae tatala o ia i tua, e le mafai ona toe foi i lo latou aiga i Auma, i Leone pe toe taumafai fo’i e faafesoota’i lona ‘stepdaughter’ i soo se auala, a ia saili se isi nofoaga mamao e nofo ma aumau ai ao faagasolo ai taualumaga o lana mataupu.

O le vaiaso na te’a nei na tula’i ai le ua molia i luma o le Fa’amasinoga Maualuga ma ia faaulu ai le tali tete’e i tu’uaiga uma faasaga ia te ia. 

O lana ulua’i iloiloga i luma o le Fa’amasinoga Maualuga, ua faatulaga lea mo le masina o Iulai, ae o le taimi nei, o lo o taofia pea o ia i le Toese i Tafuna ina ua le mafai ona ia totogi le tupe ua faatulaga e tatala ai o ia i tua.

TAGI A LE MALO 

E pei ona taua e le malo i le latou tagi e faapea, o le aso 4 o Me, 2022 na maua ai e Leoleo se ripoti e faatatau i se tamaitai talavou ma sana faasalalauga i luga o fesootaiga faaonaponei e faatatau i sana fuafuaga ua i ai e pule i lona ola. 

E 3 aso o faagasolo suesuega faalilolilo a Leoleo ma taumafai e saili le nofoaga e nofo ai lenei tamaitai, ma i’u ai loa ina manino le mata o le vai i le mafua’aga o le faalavelave, ma aga’i atu ai loa Leoleo i le fale o le aiga i le aso 7 o Me.

E fetaui le taunu’u o Leoleo i luma o le fale o le aiga ae latou vaaia loa se ali’i o savali ane i luma o le Fale. Na faailoa e lenei ali’i lona igoa i Leoleo, o ia fo’i o le Tama fai (stepfather) o le tamaitai o loo aafia, o ia foi lea o loo molia ma tu’uaia i lenei mataupu.

Ina ua faamaonia o le fale tonu lea o le tamaitai o loo aafia, sa talosaga loa Leoleo i le alii ua molia mo se avanoa e talanoa ai i lona afafine, peita’i na fai le alii ua molia i Leoleo, e faatali atu i fafo ae sei alu i totonu o le fale e fai i lona to’alua e sau latou te talanoa.

Ina ua mae’a ona faailoa e Leoleo i le Tina o le aiga le mafua’aga o le latou oo atu, atoa ai ma lo latou fia talanoa i lana tama teine, na malie ai loa le Tina ma toe savali i totonu o le fale e aumai lana tama teine e talanoa ma Leoleo.

Na lagona atu e le isi Leoleo le fai o le Tina i lana tama ina ua oo mai i le faitoto’a o le fale, “aua gei faia sau kala” (Don’t say anything).

O le mae’a ai o se talanoaga puupuu i le va o Leoleo, o le ulugalii atoa ai ma le tamaitai o loo aafia, na malilie ai loa itu uma e aga’i atu i le Ofisa o Leoleo i Leone mo le faatalatalanoaina atili o le mataupu.

Na taunu’u i le Ofisa o Leoleo i Leone ma talosaga ai le tamaitai o loo aafia i Leoleo, e le mana’o e i ai lona Tina i le taimi e fesiligia ai o ia, o le mafua’aga lea na faia ai loa le faaiuga a Leoleo ina ia tu’u eseese le Tina, o le ua molia atoa ai ma le tamaitai ua aafia i potu e 3 mo le fesiligiaina o i latou e faatatau i lenei mataupu.

Ina ua fesiligia e Leoleo Suesue le tamaitai na aafia i le mafua’aga na ia tusia ai le faasalalauga e faatatau i lana fuafuaga e pule i lona ola, na taua e le tamaitai na aafia i Leoleo e faapea, na mafua nei mafaufauga ona o lagona maasiasi i le mea o loo tula’i mai i le va o ia ma lona Tama fai (stepfather).

Na faamatala e le tamaitai i Leoleo, ua tusa nei ua silia ma le 3 tausaga talu ona fa’aauau pea le mafutaga faaleulugali’i i le va o ia ma lona Tama fai. Na amata mai i le taimi ao Vasega 6 i le Aoga Tulagalua, tusa lea o le 12 o ona tausaga.

Sa ia taua le ulua’i taimi na faia ai e le ua molia uiga mataga ia te ia ao moe i totonu o lona potu. Na alu atu ai le ua molia ma faamalosi o ia i gaioiga tau feusuaiga. Sa ta’ua e lenei tamaitai, e faalua na faia e lona tama fai lenei tulaga ia te ia, I lena po.

Pe tusa e faa 4 i le vaiaso ona alu atu le ua molia i totonu o le potu ma faamalosi ai o ia, o taimi uma fo’i ia o loo faigaluega ai lona Tina ae totoe ai na o ia, o le ua molia ma nai ona tei laiti.

E i ai isi taimi afai e mana’o le ua molia e alu atu ia te ia, ona tago lea ua tuli ese nai ona tei ma totonu o le fale, loka le fale ae faamalosi o ia i totonu o le potu.

O le taimi mulimuli lava na faia ai e le ua molia nei uiga mataga ia te ia, o le aso 6 o Me pe tusa o le itula e 6:00 i le afiafi ina ua faatoa la fo’i mai i le momoliga o lona Tina i le galuega. Na taua e le tamaitai na aafia lo la taunuu mai i le fale ma la vaaia ai lona tausoga tama o loo matamata le T.V.

Na tuli i fafo e le ua molia lona tausoga tama ae loka le fale, ona alu atu lea i totonu o le potu ma faamalosi ai o ia.

Na manatua e le tamaitai na aafia le taimi sa ia talanoa ai i lona Tina e faatatau i lenei mataupu i se taimi o le 2018, peita’i, sa leai lava se tala a lona Tina na fai atu e uiga i lenei mataupu.

Ina ua fesiligia e Leoleo le ua molia e tusa ai o lenei mataupu, atoa ai ma le faailoaina ia te ia o le molimau a le tamaitai na aafia e tusa ai o le umi talu ona ia faia nei uiga, na vaaia ai e Leoleo le nofo o le ua molia mo se taimi umi ua le gagana.

Sa ia faamatala i Leoleo le ulua’i taimi na tula’i mai ai le faalavelave i le 2018, ma amata mai ai lava iina le la mafutaga faaleulugalii ma lona afafine fai seia oo mai i le amataga o le masina nei. Sa ia taua i Leoleo e faapea, o taimi uma lava e ‘ona ai, e mana’o ai lava la te mafuta ma lona afafine fai. 

Ua le mafai fo’i ona toe taofia ona lagona i lona afafine fai, ona o taimi uma lava e tau ai lana vaai ia te ia, e tula’i mai ai lava le manatu fia fai to’alua ma fia nofo ia te ia.

Sa taua fo’i e le ua molia le taimi na ia faailoa ai i lona to’alua le mea ua tupu i le 2018, ma ia faatoese i ai i lona sese. Sa talia e lona to’alua lana faatoesega ma faia ai loa se faaleleiga ma le tuutuuga e le tatau ona toe tula’i mai lenei faafitauli.

Na fesiligia fo’i e Leoleo le Tina o le tamaitai na aafia e tusa ai o lenei mataupu. Na umi se taimi o faatau pupula le Tina i le laulau e aunoa ma se tala na gagana ai, ina ua faailoa i ai e Leoleo Suesue le mafutaga faaleulugalii o loo tula’i mai i le va o lona to’alua ma lana tama teine.

E le’i te’i le Tina pe na maligi fo’i ona loimata ina ua faailoa atu i ai, e tusa ma le 4 tausaga talu ona tulai mai lenei faafitauli i totonu o lona aiga. 

Sa ia faamaonia i Leoleo Suesue, e sa’o sa talanoa atu lona to’alua ia te ia e faatatau i lenei mataupu, ma sa ia faamagalo i ai.