Pago Pago, AMERIKA SAMOA - 

O le vaiaso na te’a nei na molia ai e le malo se ali’i i lona faia lea o uiga mataga i ni tama’ita’i talavou se to’alua e aiga i ai. O tama’ita’i e to’alua o lo o tu’uaia e le malo na aafia i gaioiga faasolitulafono a le ali’i ua molia e aofia ai se teineitiiti e 7 tausaga le matua ma se tama’ita’i e 15 tausaga le matua.

O le teineitiiti e 7 tausaga le matua o le tausoga lea o le to’alua a le ali’i ua molia ae o le tama’ita’i e 15 tausaga le matua na aafia o le uso laititi lea o le ali’i ua molia. E pei ona taua e le malo, o lenei mataupu na tula’i mai i le 2 tausaga talu ai.

O le vaiaso na te’a nei na tula’i ai le alii ua molia i luma o le Fa’amasinoga Faaitumalo mo le taimi muamua. Ua molia o ia e le malo i moliaga e 2 o lona tagofia lea o itutinosa o ni tama’ita’i e talavou i lalo o le tulafono i le tulaga muamua, o le vaega D lea o solitulafono mamafa, lea e mafai ona fa’asala ai se tasi i le Toese mo le umi e oo atu i le 5 tausaga, pe faasala i le salatupe e oo atu i le $5,000, pe faasala fo’i i faasalaga uma ia e lua.

E $10,000 le vaega tupe ua fa’atulaga e tatala ai i tua le ua molia. 

Afai ae tatala o ia i tua, ua poloaina e le Fa’amasinoga o ia e aua ne’i ona toe taumafai e faafesoota’i tama’ita’i e to’alua na aafia i lenei mataupu i soo se auala, pe taumafai fo’i e faafesoota’i nisi o la aiga. 

Ua poloaina o ia e usita’i i soo se tulafono a le malo, auai i taimi uma e faatulaga ai ana iloiloga, ma aua ne’i taumafai e sola ese ma le atunu’u a o faagasolo ai taualumaga o lana mataupu. 

O le faaiuga o le vaiaso nei lea ua fa’atulaga e faia ai le ulua’i iloiloga o lenei mataupu. 

TAGI A LE MALO

E pei ona taua e le malo i le latou tagi e fa’apea, o le aso 12 o Mati 2019 na ulufale atu ai se ulugali’i i le Ofisa o Leoleo Suesue i Fagatogo ma la talosagaina se suesuega faapitoa faasaga ia Faima, ona o tu’uaiga i lona faia lea o uiga mataga i le la tama teine e 7 tausaga le matua. 

A e o le itu na faateia ai Leoleo Suesue ao faagasolo le latou suesuega, na manino ai, e i ai fo’i le isi tama’ita’i e masalomia na aafia i amioga le tau pulea a le ua molia, o le tama’ita’i lea e 15 tausaga le matua, le uso laititi o le to’alua o le ali’i o lo o tu’uaia i lenei mataupu.

Na taua e le ulugali’i i Leoleo e faapea, o se fonotaga faaleaiga a le latou aiga na faia i le aso 5 o Mati 2019, na mapuna a’e ai loa faamatalaga e uiga i lenei mataupu ina ua faamatala e le teineitiiti e 7 tausaga i lona Tina gaioiga mataga sa faia e le ua molia ia te ia i totonu o le potu.

Na taua e le Tina o le teineitiiti na aafia e faapea, o taimi uma lava na la talanoa ai ma lana tama, na te fa’aigoaina ai lava le ua molia o le “ali’i e fai lana pepe”, ona o le tele o taimi e fealua’i solo ai le ua molia i totonu o le fale ma si’i lona afafine pepe.

Na taua e le Tina o le teineitiiti na aafia i Leoleo Suesue e faapea, i le taimi na faamatala atu ai e lana tama ia te ia uiga mataga sa faia e le ua molia, sa tagi lana tama i lona ma’asi’asi ma talosaga atu ia te ia, e aua ne’i talanoa i soo se tasi lava e uiga i lenei mataupu aemaise lava i lona Tama ma ona teie. Tau lava o ia na te iloa le mea sa tupu.

Na taua e le Tina i Leoleo Suesue le matua faateia o ia ina ua ta’u atu e lana tama uiga mataga na faia e le ua molia ia te ia, e aofia ai le tago atu o le ua molia i ona itutinosa. Na taua e le teineitiiti na aafia e faapea, o le faalavelave muamua lava na tula’i mai i totonu o le potu a le ua molia, i le taimi na tuua ai na o laua i totonu o le fale. 

A o i ai i totonu o le fale, i le taimi lea ua o uma i fafo tamaiti matutua e taaalo ai, na te’i ina ua valaau atu le ua molia ia te ia e alu atu i totonu o le potu la te talanoa ai ma faailoa atu ia te ia se mea malie. Na ioe le teineitiiti na savali loa i totonu o le potu o loo valaau mai ai le ua molia.

Ina ua taunuu i totonu o le potu, na tago le ua molia ma si’i atu o ia ma faataoto i luga o le moega i ona tafatafa, ona la taooto to’alua ai lava lea. Ina ua fesiligia e Leoleo Suesue le teineitiiti na aafia, na ia taua ai loa e faapea, o le taimi lea na la taooto ai ma le ua molia i luga o le moega, na tula’i mai ai loa le faalavelave mataga na te le toe fia manatua, ina ua tago atu le ua molia i lona itutinosa. O le aso 6 o Oketopa 2018 lea na tula’i mai ai lea faalavelave e pei ona taua e le teineitiiti na aafia i Leoleo Suesue.

Na taua atili e le teineitiiti na aafia i Leoleo le i ai o le isi faalavelave na tula’i mai, lea fo’i na tagofia ai e le ua molia ona itutinosa. Na taua e le teineitiiti i Leoleo Suesue, sa maua atu e le to’alua a le alii ua molia i laua i totonu o le potu.

Na fesiligia e Leoleo le to’alua o le ali’i na aafia e tusa ai o lenei mataupu, ma ioeina ai e le to’alua o le ali’i ua molia lona maua atu o lona to’alua ma le teineitiiti i totonu o le potu. Na taua e le to’alua a le ua molia e faapea, i le aso 6 o Oketopa 2018 pe tusa o le itula e 9:00 i le taeao, na alu ai i totonu o le fale e fa’aaoga le Fale Taele, na faateia ai o ia ina ua ia vaaia lona to’alua o loo taooto to’alua mai ma le teineitiiti laitiiti o loo aafia i luga o le moega.

Na taua e le to’alua a le ua molia le faateia o ia i le vaaiga na ia vaaia, ma ia e e atu ai loa i lona to’alua ma fesili atu i ai poo le a le mea ua ia faia, ae na tali le ua molia, “e leai se mea o tupu”. E fai lava le tala a le ua molia ma oso i lalo ma le moega ma savali i fafo ma le potu.

Na taua atili e le to’alua o le ali’i na aafia i Leoleo Suesue, sa ‘ona lona to’alua i le aso na tula’i mai ai le faalavelave.

A o faagasolo suesuega a Leoleo na manino ai, e i ai fo’i le isi tama’ita’i na aafia i gaioiga a le ua molia, o le tama’ita’i lea e 15 tausaga le matua, o le uso laitiiti o le to’alua a le ua molia. O lea faalavelave e pei ona taua e le malo i le latou tagi, na tula’i mai i se taimi o le 2017 a o nonofo faatasi le uamolia, o lona to’alua ma le tama’ita’i na aafia i le fale e tasi.

O faamatalaga na maua e Leoleo Suesue na iloa ai, o le va o Oketopa ma Novema o le tausaga e 2017 na tula’i mai ai lea faalavelave. 

Na maua le avanoa e fesiligia ai e Leoleo Suesue le tama’ita’i lona lua o loo aafia i lenei mataupu, ma ia faamatalaina ai loa le mea sa tupu. Na taua e le tama’ita’i na aafia e faapea, a o moe i lona moega i totonu o lona potu i le po pe tusa o le itula e 1:00 i le vaveao, na ulufale faamalosi atu ai le ua molia i totonu o lona potu ma fafagu o ia e nofo mai i luga se’i la talanoa. Sa ia e e atu i le ua molia e alu i fafo ma lona potu. 

Sa ia taua lona fefe i le taimi lea, o le mafua’aga lea e le i toe moe ai lava, ona sa popole lona loto ina ne’i toe alu atu le ua molia i totonu o le potu. Ina ua toe moe, na faateia o ia ina ua ia faalogoina se tagata o tago atu i lona tino e aofia ai ma lona itutinosa. Sa ia nofo i luga ma ia vaaia ai le ua molia o loo saofa’i atu i ona tafatafa. Sa ia tulia i fafo o ia ma fai i ai e aua ne’i toe alu atu i totonu o lona potu. Na taua atili fo’i e le tama’ita’i na aafia i Leoleo le faalavelave lona lua na tula’i mai i le isi po, ina ua ulufale faamalosi atu le ua molia i totonu o lona potu ma tagofia ona itutinosa.

Na maua le avanoa e fesiligia ai e Leoleo le ali’i ua molia e tusa ai o tu’uaiga faasaga ia te ia. Ina ua mae’a ona faailoa i le ali’i ua molia ona aia tatau faaletulafono, sa ia malie ai loa e faia sana faamatalaga i Leoleo e tusa ai o tu’uaiga faasaga ia te ia.

I lana faamatalaga i Leoleo, sa ia ioeina ai tu’uaiga uma faasaga ia te ia. Na taua e le ali’i ua molia e faapea, na mafua ona ia faia uiga mataga i le teineitiiti e 7 tausaga, o le tele o taimi e pei e tautalaititi atu ia te ia. Ae o le mafua’aga na ia faia ai uiga mataga i le uso laititi o lona to’alua, ona e fia alu ia te ia. 

O le mae’a ai ona fesiligia e Leoleo o le ua molia i le masina na te’a nei, na toe tatala ai loa o ia i tua, peita’i o le vaiaso na te’a nei, na faatoa pu’e faapagota ai loa o ia e Leoleo ma molia i lenei mataupu.