Pago Pago - AMERIKA SAMOA

O le masina na te’a nei na pu’e faapagota ai e Leoleo se ali’i e 42 tausaga le matua, ona o tu’uaiga i lona faia lea o uiga mataga i se tama’ita’i e 16 tausaga le matua, o le uso laititi fo’i lea o lona faletua. 

O le a le faalauiloaina e le Samoa News le igoa o le ali’i ua molia ona o puipuiga lava i le ono faigofie mafai ai ona iloa le tamaitai sa aafia i lenei mataupu.

O le vaiaso lava fo’i na te’a nei ina ua mae’a ona pu’e faapagota le ali’i ua tu’uaia, na tula’i ai loa o ia i luma o le Fa’amasinoga Faaitumalo. 

E 3 moliga ua tu’uaia ai e le malo le ali’i ua molia, o ia moliga e aofia ai le moliga o le faia o amioga faasotoma, o le vaega B lea o solitulafono mamafa, lea e mafai ona fa’asala ai se tasi i le Toese mai le 5 e oo atu i le 15 tausaga, faapea ai ma moliga e 2 o le tagofia o itutinosa o se tama’ita’i i le tulaga muamua, o le vaega D lea o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe fa’asala i le salatupe e oo atu i l e $5,000, poo le faasala fo’i i faasalaga uma ia e 2.

E $20,000 le vaega tupe lea ua faatulaga e le Faamasinoga Faaitumalo e totogi ona faatoa mafai lea ona tatala le ua molia i tua. 

Afai ae tatala o ia i tua, e le mafai ona ia toe taumafai i soo se auala e faafesootai le tamaitai na aafia poo lona aiga fo’i, pe taumafai i soo se auala lava e fesootai i ai, a ia avea o ia ma tagatanu’u lelei e tausisi i tulafono uma a le malo. 

Na teena e le Faamasinoga le talosaga a le itu tete’e mo se avanoa e faaitiitia ai le tupe e tatala ai i tua le alii ua molia. Na taua e le Loia a le ua molia e faapea, o le tagi ua faasaga i lenei alii, ua na o ni tu’uaiga e leai ni faavae ma ni mau e faamaonia ai.

O le alii ua molia e faigaluega, ma e moomia le tatala o ia i tua e faigaluega e tausi ai lona aiga. E $10,000 na talosaga le Loia a le itu tete’e e faaitiitia ai le tupe, peita’i na talia e le Fa’amasinoga le tali tete’e a le malo ina ia faatumauina pea le aofa’i o le tupe i le $20,000.

TAGI A LE MALO

O lenei mataupu na tofu atu i le Ofisa o Leoleo i Tafuna ina ua aga’i atu i ai se ulugali’i ma talosaga i Leoleo mo se suesuega faasaga i le la son-in-law (le ua molia), i lona faia lea o uiga mataga i le la tama teine e 16 tausaga le matua. O le ali’i ua molia, e nonofo ma le isi tama teine a le ulugali’i na failaina lenei tagi i le Ofisa o Leoleo.

A o faagasolo suesuega a Leoleo Suesue e uiga i lenei mataupu, na latou maua ai, e i ai fo’i le isi tamaitai talavou na taumafai le ua molia e fai i ai uiga mataga. O lea tama’ita’i, o le isi lea uso o lona to’alua, ae ua malaga atu nei o ia i fafo ma aumau ai.

Na taua e le ulugali’i i Leoleo Suesue le faigata ia tei laua ona faagalo le faalavelave e pei ona aafia ai le la tama teine, o le mafua’aga lena o le la naunau una a faatino ala o le tulafono faasaga i lenei mataupu.

O le mae’a ai ona fesiligia e Leoleo Suesue o le ulugali’i e uiga i le la tagi, na sosoo ai loa ma le faatalatalanoa o le teineitiiti na aafia e uiga i lenei mataupu. Na taua e le tama’ita’i na aafia i Leoleo Suesue le tele o taimi sa tutupu ai uiga mataga o le ua molia, o nisi o taimi e faateia ai o ia i le faafuase’i lea ona tago atu o le ua molia i lona tino e aofia ai lona fatafata ma lona itutinosa. O taimi uma e tago atu ai le ua molia ia te ia, na taua ai e le tama’ita’i na aafia i Leoleo Su’esu’e lona le fiafia ma le ita i amioga a le ua molia.

O se tasi o faalavelave na tula’i mai e pei ona taua e le tama’ita’i na aafia i Leoleo Suesue e faapea, a o moe i lona moega i le po, na faateia o ia ina ua ia faalogoina se tagata o lo o tago atu i ona ogavae, ma faasolo atu ai lava i lona itutinosa. Na vave lona nofo i luga i lona fia iloa o le mea ua tupu, ae na te’i ina ua tau atu lana vaai i le ua molia o loo saofa’i mai i autafa o lona moega. Sa ia ee i luga ma fai i ai e alu i fafo ma le potu. Na taua fo’i e le tama’ita’i na aafia lona faalogoina o le malosi o le manogi ‘ava malosi

E 2 faalavelave sa tutupu na manatu e le tama’ita’i na aafia. I le mataupu muamua na tula’i mai i le leva o le po pe tusa o le itula e 12:00 i le vaveao, ao momoe le tamaitai na aafia ma lana uo i totonu o le potu malolo, na faafuase’i ai ona ulufale faamalosi le ua molia i totonu o le potu malolo ma faia ni gaioiga mataga e ala i lona tagofia o itutinosa o le tamaitai na aafia. Sa tauanau fo’i e le ua molia le tamaitai na aafia e tu i luga la te o i lona potu la te faiaiga ai.

Na taua e le tama’ita’i na aafia e faapea, na loka le faitoto’a e ulufale atu ai i totonu o le potu malolo sa la momoe ai ma lana uo, peita’i sa ia lagonaina le taimi na taumafai ai le ua molia e tatala faamalosi le faitoto’a. Ina ua le mafai ona tatala e le ua molia le faitoto’a, sa ia faaaogaina ai loa se tama’i naifi e vane ai le tulimanu o le puipui e va ai le umukuka ma le potu malolo, ma sao ai loa i totonu i le vaega o loo momoe ai le na aafia ma lana uo.

Na faasolo ona tago atu le ua molia i ogavae o le tamaitai na aafia seia oo lava i lona tagofia o ona itutinosa. Na musumusu atu le ua molia i le tamaitai na aafia e faapea, “Ta o i totonu o lo’u potu ta te momoe ai”. Na e e i luga le tamaitai na aafia ma faapea atu i le alii ua molia, “E te faavalevalea”. E fai lava tala a le tamaitai na aafia ma tago ua una’i ese le ua molia ma fai ai e alu i fafo ma le potu.

O le isi faalavelave na tula’i mai foi i le leva o le po ina ua uma inugapia a le ua molia, na ia ulufale atu ai fo’i i totonu o le potu ma tagofia itutinosa o le tamaiti na aafia ao moe ai. Na ala i luga le tamaitai na aafia ma una’i ese le ua molia ma tuli i fafo. O le taimi na valaau ai loa e le tamaitai na aafia lona Tina ma ia faailoa i ai le mea ua tupu. Na alu atu le Tina o le tama’ita’i na aafia ma fai i le alii ua molia i e alu i fafo ma le potu.

Na fesiligia e Leoleo le uo a le tamaitai na aafia e tusa ai o lenei mataupu. I lana molimau i Leoleo Suesue, na faamaonia ai e le uo a le tamaitai na aafia faamatalaga uma e uiga i lenei mataupu. 

Na taua e le uo a le tamaitai na aafia i lana faamatalaga e faapea, a o le oo i le taimi na ulufale faamalosi atu ai le ua molia i totonu o le potu malolo ma tauanau le tamaitai na aafia la te o i lona potu (potu a le alii ua molia) la te momoe ai, sa valaau mai le ua molia mai fafo o le fale i le vaega na inu ai ana fagupia, ma tauanau le tamaitai na aafia e alu atu i fafo la te talanoa ae na mausu le tamaitai na aafia e alu i fafo.

I se taimi o le po ao la momoe, na taua ai e le uo a le tamaitai na aafia lona lagonaina o le taimi na taumafai ai le ua molia e vane le faitoto’a i le tamai naifi, atoa ai ma le taii na alu atu ai le ua molia i totonu o le potu ma fafagu le tamaitai na aafia la te o i totonu o le potu. Na taua fo’i e le molimau lona iloa o le taimi na tagofia ai e le ua molia itutinosa o le tamaitai na aafia. Na taua atili e le molimau, o ia na fai i le tamaitai na aafia e aua nei alu i totonu o le potu a le ua molia.

Na maua e Leoleo le avanoa e fesiligia ai le alii ua molia e tusa ai o lenei mataupu ma ia ioeina ai lona ulufale i totonu o le potu sa momoe ai le tamaitai na aafia ma lana uo e saili poo fea o i ai lona atalii e 14 tausaga le matua. Na ioe le alii ua molia i lana faaatalaga sa tuuina atu i Leoleo, sa ia tago i le tino o le tamaitai na aafia peita’i o lana molimau, na mafua ona tago i le tino, ina ia faigofife ai ona ala mai i luga le tamaitai na aafia ma mafai ai ona ia fesili i ai poo fea lona atali’i.

Na taua atili e le alii ua molia i Leoleo e faapea, o le tele o taimi i le latou mafutaga, e ese ai lava uiga e fa’aali atu e le tamaitai lea ia te ia, e foliga mai e mana’o ia te ia, o le mafua’aaga lea o lona taumafai e tulituli o ia.

Na taua e matua o le tamaitai na aafia e faapea, e le o se taimi muamua lenei ua alia’e mai ai uiga mataga a le ua molia faasaga i le la fanau tamaitai e aofia ai ma le tamaitai ua malaga atu i fafo ma aumau ai. O le tele fo’i o taimi e inu pia ai le ua molia i fafo o le fale, la te maetua lokaina ai le faitoto’a o le fale ina ia mautinoa e le sao atu le ua molia i totonu o le potu o loo momoe ai le la fanau teine.