Pago Pago, AMERIKA SAMOA

O le manu a’e ai o le mataupu e fa’atatau i le ali’i lea ua taofia i le Toese i Tafuna ma molia i lona faia o uiga mataga i nai ona taufafine e to’alua, ua fesiligia ai e ni isi o le atunu’u suiga o mea ua tutupu i le atunu’u atoa ai ma le malu puipuia o le va tapui i le va o le tuagane ma le tuafafine. 

O le vaiaso na te’a nei na pu’e faapagota ai e Leoleo se ali’i e 18 tausaga le matua ma molia i lona faia o uiga mataga i ona tuafafine e to’alua e 10 ma le 15 tausaga le matutua. O lenei solitulafono e pei ona tu’uaia e le malo i le latou tagi na alia’e mai lava i totonu o le fale o lenei aiga. 

O le alii ua molia, o le ulumatua lea o le fanau e to’a 7 a le ulugali’i ua tusa nei ma le 3 tausaga talu ona tete’a ma nonofo valasala. O le Tina o le aiga o loo aumau i Texas ae o le Tama o loo gafa ma le fatuaiga o le tausiga lea o le fanau e to’a 7.

O le a le mafai ona faalauiloa le igoa o le ali’i ua molia ona o le puipuiga lava i le ono mafai lea ona silafia atu ai ma i laua e to’alua o loo aafia i lenei mataupu.

O lenei mataupu e pei ona taua e le malo i le latou tagi na tofu atu i le Ofisa o Leoleo i Tafuna, ina ua faafesoota’i e le Vaega e Puipuia Fanau (Child Protective Service-CPS) mo se fesoasoani i le masina o Mati o le tausaga nei, na amata ai loa ona faagasolo suesuega a Leoleo e uiga i lenei mataupu.

O le tuana’i ai o masina e 5 talu o na faagasolo su’esu’ega a Leoleo, na pu’e faapagota ai loa le ali’i ua molia i le vaiaso i ona tua atu ma tula’i ai loa o ia i luma o le Fa’amsinoga i le vaiaso na te’a nei.

E pei ona taua i le tagi a le malo, o le aunty o tamaitai e to’alua na ia faafesootaia le Ofisa o le CPS mo se fesoasoani i le masina i Mati o le tausaga nei, ma aga’i atu ai loa sui o le Ofisa o le CPS ma aveese mai tamaitai na aafia ma tausia loa i lalo o le latou vaavaaiga, ae o le taimi fo’i lea ua le toe nofo le ua molia i lo latou aiga, ae ua agai atu o ia ma nofo i se tasi o latou aiga.

Na aga’i atu Leoleo ma fesiligia tamaitai e toalua o loo tu’uaia na aafia e tusa ai o le fa’alavelave na tula’i mai. E tusa ma le 2 masina talu ona tuana’i le taimi na ripotia ai e le CPS lenei mataupu i le Ofisa o Leoleo, a e aga’i atu loa ma tama’ita’i Leoleo Su’esu’e e to’alua mo le amataina o le la suesuega e uiga i lenei mataupu.

Ma taua e le tamaitai e 10 tausaga i Leoleo e fa’apea, o le tele o gaioiga mataga sa faia e lona tuagane ia te ia, e faia lea i le taimi a o moe ai i totonu o le potu poo luma fo’i o le potu malolo o le fale. Na manatua e le tamaitai na aafia se tasi o aso a o moe i le potu malolo, na faateia ai o ia ina ua alu atu lona tuagane (le ua molia)

Na taua e le tamaitai na aafia i Leoleo lona manatuaina o le taimi na ia lagona ai le tago atu o se tagata i lona tino ma faasolo atu ai i ona itutinosa. Na ia pupula ma ia vaaia ai lona tuagane matua (le ua molia) o loo taoto i ona tafatafa ao ia faia nei uiga mataga ia te ia. Na iagona le tiga ma ua ia mana’o fo’i e tula’i ma alu ese peitai na tago atu le ua molia ma taofi o ia i lalo ina ia mafai ai ona latalata atu o ia ia te ia.

Na manatua e le tamaitai e 10 tausaga se tasi o faalavelave na tula’i mai i totonu o le potu malolo o le latou o le potu, ina ua maua atu e lona uso matua e 15 tausaga gaioiga mataga a le ua molia sa faia ia te ia. 

Fai mai le tamaitai lea, na ona iloa lava e le ua molia ua savali atu i totonu o le potu lona uso matua e 15 tausaga, vave loa ona tago i le ie afu ma faaafu ai o ia ina ua mae’a ona ia faia uiga mataga ia te ia e aofia ai ma le aveeseina o ona lavalava (tulou).

Na ia faalogo i lona uso matua ua ote ma fai i le ua molia poo le a lana mea lea o loo fai i totonu o le potu. Na sosoo ai loa ma le tuli ese e lona uso matua o le ua molia ma totonu o le potu.

Na taua e le tamaitai e 10 tausaga le matua i Leoleo se tasi o faalavelave na tula’i mai, a o taoto le ua molia i totonu o le potu malolo ma faafoliga o ia ua moe, ae le iloa e le o moe o ia. Na faateia o ia ina ua tago atu le ua molia ia te ia i se auala e faailoa atu ai o loo i ai faanaunauga fia faiaiga ia te ia.

Na taua e le tamaitai e 10 tausaga i Leoleo, o le po atoa lava lea na faia ai e le ua molia uiga mataga ia te ia, e ala i lona tago atu ia te ia ma faia isi uiga mataga ia te ia. E ui i lona taumafai e tete’e le ua molia, ae sa le mafai ai lava ona taofia o ia mai lona faia o nei uiga ia te ia.

I se taimi o le vaveao, na lagona atu ai e le tamaitai a aafia lona uso e 15 tausaga ua ala ma aga’i atu i le paipa, o lea na ia tu ai loa i luga ma alu atu fo’i o ia i le paipa ma ia faailoaina loa i lona uso le mea sa tupu ia te ia i le po atoa ona o uiga mataga na faia e le ua molia ia te ia, ma ta’u ai loa e lona uso matua i lo la Tama le mea sa tupu.

A o faagasolo le faatalatalanoaga, na tagi le tamaitai na aafia ma fesili i Leoleo, pe faamata e loka lona tuagane ona o uiga mataga sa ia faia faasaga ia te ia, ae na taua e tamaitai Leoleo Suesue, e le o mautinoa le tulaga e oo i lona tuagane, ona o lea e le i mae’a le suesuega o loo faagasolo.

O le aso lava fo’i lea na fesiligia ai e Leoleo le tamaitai matua e 15 tausaga e tusa ai o lenei mataupu.

Na taua e le tamaitai matua i Leoleo le faia e le ua molia o uiga mataga ia te ia, e ala i lona tago atu i lona tino i se auala e faailoa atu ai lagona tuinanau ia te ia ao moe i totonu o lona potu. Na ia ala i luga ma ee atu i le ua molia pe faavalevalea ma ana mea e fai atu iat e ia. O le po lava fo’i lea na vili ai loa le tamaitai matua i lona Tina i Texas ma faailoa i ai mea uma lava o loo tutupu i le va o ia ma lona uso laititi ma le ua molia.

Sa ia faailoa i lona Tina e faapea, afai ae le faia se faaiuga i le alii ua molia, ae toe fai faalua e le ua molia uiga mataga nei ia te ia, o le a pule loa i lona ola. Na tali mai i ai lona Tina, e aua le popole ae laa ia saili se auala e foia ai le faafitauli.

Na fesoota’i mai le Tina o tamaitai nei na aafia i se tasi o lona aiga, ma logo ai loa e le tagata lea o le aiga le Ofisa o le CPS, ma aga’i atu ai loa sui o le Ofisa o le CPS ma aveese atu tamaitai na aafia ma tausia i lalo o le latou vaavaaiga.

Ina ua fesiligia e Leoleo le Tama o tamaiti na aafia, na ia taua ai le faigata tele o le tulaga ua oo i ai lona aiga talu ona la valavala ma lona to’alua i le silia nei i le 3 tausaga. Sa ia taua, o le ua molia, o le ulu matua lea o le fana e to’a 7, o ia fo’i o se tasi o le fanau e sili ona faigata, ae o loo ia taumafai malosi pea lava ina ia faufautua i lona olaga.

Na taua atili e le Tama i Leoleo e faapea, o le tele lava o po la te momoe ai ma lona afafine laitiiti i totonu o le potu, sei vagana ai nisi o taimi e moe ai o ia i le potu malolo faatasi ai ma isi o lana fanau.

Ina ua fesiligia e Leoleo le ua molia e tusa ai o lenei mataupu, sa ia ta’utino ai le moni ma le faamaoni o faamatalaga uma a ona tuafafine faasaga ia te ia. Sa ia taua lona salamo e tusa ai o le mea leaga sa ia faia, ma ua ia lagona fo’i le sese o le olaga o loo ia ola ai.