Pago Pago, AMERIKA SAMOA

O le ali’i lea o lo o tu’uaia i lona faia o sauaga faasaga i lona afafine e i ai manaoga faapitoa o le tino ma le mafaufua, ua molia nei o ia e le malo i lona faia o sauaga faasaga i lona afafine. 

O le vaiaso na te’a nei na pu’e faapagota ai e Leoleo lenei ali’i ma taofia ai i le Toese i Tafuna, ao lumana’i ai lona tula’i i luma o le Fa’amasinoga Fa’aitumalo mo lana ulua’i iloiloga. O le ali’i Loia Fautua lagolago ia Ryan Anderson o lo o tula’i mo lenei ali’i, ae o le ali’i Loia Sili lagolago ia Robert Morrison III o lo o tula’i mo le malo.

E tasi le moliaga ua tu’uaia ai e le malo le ua molia, o le moliaga lea o le sauaina lea o se tagata e i ai manaoga faapitoa o le tino, o le vaega C lea o solitulafono mamafa, lea e mafai ona fa’asala ai se tasi i le Toese o le umi e oo atu i le 7 tausaga, pe fa’asala i le salatupe e oo atu i le $5,000.

E $10,000 lea ua fa’atulaga e le afioga i le ali’i Fa’amasino ia Elvis P. Patea e tatala ai i tua le ua molia. Afai ae tatala o ia i tua, ua poloaina o ia e aua ne’i toe taumafai e faafesoota’i lona afafine na aafia i soo se auala lava. E le tatau ona ia toe faia ni gaioiga e faamata’u ai lona afafine atoa ai ma lana fanau, a ia tausi le filemu i totonu o lona aiga ma aua ne’i ona toe solia se tulafono a le malo.

TAGI A LE MALO

O le aoauli o le aso 7 o Novema 2020 pe tusa o le itula e 2:34 na faafesoota’i ai e se Leoleo po o le Kolisi Tuufaatasi (ASCC) le Ofisa o Leoleo i Tafuna mo se fesoasoani, ona o se tama’ita’i talavou na sulu atu i lona Ofisa i lona fia maua o se fesoasoani. Na faailoa e le Leoleo po i Leoleo le vave mana’omia o se fesoasoani mo lea tamaitai, ona ua molimauina le fefe ma le popole o ia i le mea sa tupu.

E to’atele Leoleo na tali atu i le valaau ma maua ai loa le avanoa e talanoa ai ma le ali’i Leoleo po na ia talosaga i latou mo se fesoasoani, ma faamatala ai loa e le ali’i Leoleo po le vaaiga sa ia maitauina i lea taeao. Na vaaia e Leoleo se tamaitai i totonu o le Ofisa o le ali’i Leoleo po, ma latou iloa mulimuli ane ai, o ia tonu lea na aafia i lenei mataupu.

A o taumafai Leoleo e talanoa atu i le tamaitai na aafia, sa latou molimauina le fefe o le tamaitai, sa vaaia ai le tete o lona tino e foliga mai e le o mautonu lona mafaufau. Na vaaia fo’i se manu’a laititi i lona mata agavale, atoa ai ma uanoa i lona tino, o le mafua’aga lea na faafesoota’i ai le Vaega a le EMS mo se fesoasoani, ma auina atu ai loa le tama’ita’i na aafia i le Falema’i mo le faia i ai o se siaki faapitoa i lona tino.

Na taunuu le tamaitai na aafia i le Ofisa o Leoleo i Tafuna ina ua mae’a ona siaki e foma’i lona tino, ma maua ai loa le avanoa e fesiligia ai o ia e Leoleo Suesue e tusa ai o lenei mataupu. 

A o talanoa atu Leoleo i le tamaitai na aafia i totonu o le Ofisa o Leoleo i Tafuna, sa vaaia foliga le mautonu o lea tamaitai, atoa ai ma foliga fefe toe popole. E nofo i luga o le nofoa ae autilo solo i totonu o le potu e aofia ai ma fafo i le fa’amalama, e foliga mai o loo autilo i se tagata.

Na faailoa e Leoleo Suesue i le tamaitai na aafia, e le tatau ona toe popole lona mafaufau, o lea ua ia saogalemu i lalo o le vaavaaiga a Leoleo. Sa faailoa fo’i i ai, afai e toe alu atu lona Tama e taumafai e faaoolima ia te ia, e le mafai ona toe tupu lena tulaga, o lea ua i ai o ia i lalo o le puipuiga a le Ofisa o Leoleo.

Ina ua fesiligia le tamaitai na aafia e faamatala le mea sa tula’i mai i le va o ia ma lona Tama, na taua ai e le na aafia e faapea, o le vevesi na mafua mai ina ua ia otegia lona niece (tama a lona uso matua) i le ulavale ma le faalogo gata ia te ia. Na tagi lona niece ma alu ua fafagu lona Tama (le ua molia) o loo moe i totonu o le potu ma ta’u i ai le mea sa tupu.

Na taua e le tamaitai na aafia le ala i luga o lona Tama ma le ita, ma savali mai ua uu le fana mea taalo na taatia i totonu o le fale ae togi ai o ia, ma tau ai le fana i lona mata agavale ma manu’a ai. 

Na tu i luga le tamaitai na aafia ma valaau atu i lona Tama, o le a ia vilia Leoleo e ta’u i ai le mea ua ia faia, ae na avea ma itu na ita ai le ua molia ma savali atu loa o le a fasi lona afafine. 

Na tu i luga le tamaitai na aafia ma tamo’e i le atoa i le fale o le aiga latou te tuaoi mo se fesoasoani ae o le taimi lea o loo tuliloa mai ai pea o ia e lona Tama (le ua molia). Na taua e le tamaitai na aafia i Leoleo e faapea, na avea le faaletonu o lona tino atoa ai ma le le atoatoa o lona malosi na faafuase’i ai ona fetoai ona vae a’o tamo’e ma pau ai loa i lalo.

O le taimi lea na taunuu atu ai loa ma lona Tama ma futi lona ulu ae po lona gutu ma ona foliga. E faatele ona faia e le ua molia lea gaioiga ia te ia, ae o le taimi lea o loo ia alaga ai pea i luga ma tau valaau solo i aiga tuaoi mo se fesoasoani.

Na lagona mai e se Tina e tuaoi ma le aiga o le tamaitai na aafia le alaga atu o se tagata i le fia maua o se fesoasoani, ma savali mai ai loa i fafo o le fale mo se fesoasoani, ae o le taimi fo’i lea na tu’u ai gaioiga a le ua molia ae aga’i ese atu mai le vaega na ia faaoolima ai i lona afafine.

Na fesiligia e Leoleo le Samaria agalelei na ia fesoasoani i lenei tamaitai e aafia i manaoga faapitoa o le tino. Na taua e le Tina lea e faapea, ao i ai i totonu o lona fale, sa ia lagona le leo o se tagata o loo valaau i luga e faapea, “Faamolemole manaomia se fesoasoani”.

Na savali mai le Tina lea i fafo o lona fale ma ia vaaia ai le tamaitai na aafia o loo tu atu i le faitoto’a o lona fale o loo tagi, ma talosaga atu ia te ia mo se fesoasoani, o lea na ia faaulufale ai loa o ia i totonu, sosoo ai loa ma le la aga’i atu i le Ofisa o le Leoleo po a le Kolisi Tuufaatasi ma faafesootai ai loa le Ofisa o Leoleo mo se fesoasoani.

Na aga’i atu Leoleo e saili mai le ua molia i lona fale i le aso lava lea peita’i na faailoa ane e lana fanau, e le o i ai o ia i le fale. Na asia faalua e Leoleo le fale o le ua molia i se taimi mulimuli ane ai, peita’i sa toe faailoa ane fo’i e lana fanau, e le i ai le ua molia i le fale.

Na manatu Leoleo e taamilo i le vai aai i Mesepa ma Faleniu pe maua ai le ua molia. E le i umi ona taamilo ae latou vaaia le ua molia o loo nofonofo i luma o se Faleoloa Asia i Malaeimi lava, ma latou pu’e faapagota ai loa o ia ae auina atu i le Ofisa i Tafuna mo suesuega e faatatau i lenei mataupu.

Ina ua fesiligia le ua molia e uiga i lenei mataupu, sa ia ta’utino ai i Leoleo, e 6 ana apa pia na inu i le taimi na tula’i mai ai le fa’alavelave. Sa ia taua e faapea, o ia sa moe i totonu o le potu i le latou fale, ae faateia o ia i le alu atu o lona granddaughter ma tagi atu ia te ia, ua fasi o ia e lona afafine ma’i.

O lona ita tele na mafua ai loa ona ia tago atu i le fana mea taalo na taatia i totonu o le fale ma togi ai le mata o lona afafine ma’i ma manu’a ai. Ae ina ua ia faalogo atu o faapea mai le tala a lona afafine mai ia te ia, o le a vili Leoleo, na oso ai loa lona ita ma savali atu loa ma le faamoemoe e fasi.

Na fai la tuliga ma lona afafine seia oo ina sulu o ia i luga o le mutia, ma maua ai loa le avanoa na te fasia ai o ia.