Pago Pago - AMERIKA SAMOA

O le vaveao o le aso 30 o Tesema, 2023 na o’o atu ai se tina i le Ofisa a Leoleo i Tafuna (TPS) e lipotia se fa’alavelave o lo o masalomia sa tulai mai i totonu o lo latou fale, i Mapusaga.  O i latou ua molia i lenei fa’alavelave, e aofia ai le alii o Malala Galo, le uo tama a le tina ma’itaga; o Jessica Matamua le tuafafine a Galo, faapea se uo a Galo, e suafa ia Louis Fuimaono.

O le tina o lo o a’afia i lenei mataupu, ua atoa le lima masina o lona ma’itaga.

Ua molia eseese nei ia Galo, Fuimaono ma Matamua i le mataupu e tasi.

Sa faamatala e le tina o lo o a’afia i lenei mataupu e faapea, e le o se taimi muamua lenei ua fa’ao’olima atu ai lana uo tama ia te ia, ae peitai, i le tulai mai o lenei fa’alavelave, ua tonu ai ia te ia, ua le toe mana’o e toe tupu lenei fa’alavelave.

I sana faamatalaga i leoleo, sa ta’ua e le tina ua a’afia i lenei mataupu, le fa’aaogaina e Galo o se ili u’amea e ta ai lona ulu, lea e fula ai le itu tauagavale o ona foliga.  Na faapena foi ona tatu’i fa’a fa e Galo ia ona foliga, ma sasa lona papatua i se laupapa (2x4), o le ‘au o se pulumu salu fale, faapea ma se nofoa.  Ona togi lea o ia e Galo i lana telefoni, futi lona ulu ma fetosoa’i o ia i totonu o le potu.

Na ta’ua foi e lenei tina, le fa’aaogaina e Galo o se uaea ma se laupapa (2x4) e sasa ai o ia, a’o ia taumafai e a’apa atu i lana telefoni.  E le gata i lea, na fa’amata’u foi o ia e Galo i se naifi faamoe, sa ia u’uina i lona lima.

O lo o ua ta’ua i fa’amaumauga a leoleo, le oso atu o le tuafafine a Galo, o Jessica Matamua, ma futi le ulu o le tina ma’itaga, ma tatu’i ona foliga, a’o fesiligia o ia e Galo pe mana’o e fa’aola mai se moli uila mai totonu o lona ulu.  Sa faamatala foi e le tina ma’itaga, le auai ai foi o le uo a Galo, le alii o Louis Fuimaono, i le fa’aoso o Galo e fasi o ia ma faatupu vevesi i le va o la’ua ma Galo.

Sa faamatala e le tina ma’itaga, ina ua te’a mai i tua mai i le falema’i, na aga’i sa’o atu loa i le ofisa a leoleo e faaulu lana tagi, e fa’asaga i le to’atolu lea.

O lo o ta’ua i fa’amaumauga a leoleo, le iai o ni manu’a i foliga, lima ma le papatua o lenei tina ma’itaga.

Na malaga atu leoleo i le fale a Galo ma maua atu ai Fuimaono o nofonofo i totonu o le fale.  Na fa’ailoa ifo e Fuimaono i leoleo, o Galo o lo o i totonu o le potu moe.  Sa mafai ona fa’amanino atu e leoleo ia Galo ma Fuimaono le mafua’aga o le latou o’o atu ma lokaina mai ai loa i la’ua.

Sa faapea foi ona agai leoleo i le fale a Jessica Matamua, lea e tuaoi ma le fale a Galo, ma lokaina mai ai foi ma ia ma aveina atu uma i latou i le ofisa a leoleo.

Ina ua fa’atalanoaina e leoleo ia Matamua, sa ia fa’amatalaina le mafuaaga na ia fa’ao’olima ai i le tina ma’itaga, ona o se tala sa faia e le tina ma’itaga e uiga i le tina a Matamua.  Na fa’amaonia e Matamua lona fa’ao’olima i le tina ma’itaga ma sa ia ta’ua, e ulufale atu o ia i totonu o le potu, ua uma ona fasi e lona tuagane ia le tina maitaga.  

Sa ta’ua foi e Matamua, na ona fa’alogo o lo o ma’itaga le tina sa ia fa’ao’olima iai, ae peitai, e na te le talitonu i lea tulaga.

I le fa’atalanoaga o Fuimaono sa ia fa’amaonia ai le sasaina e Galo o le tina ma’itaga i se nofoa, ae na ta’ua e Fuimaono, e le i pa’i lona lima i le teine a Galo.

Ua molia nei Malala Galo i le Fa’ao’olima i lona tulaga e lua ma le Faatupu vevesi i totonu o aiga.  

O le moliaga o le fa’ao’olima e mafai ona nofosala ai se tasi i le falepuipui, i le o’o atu i le lima (5) tausaga, o se sala tupe e i le va o le $150 ma le $5,000; po o fa’asalaga uma e lua.

O le moliaga o le Faatupu vevesi i totonu o aiga, e mafai ona faafalepuipui ai se tasi i le o’o atu i le sefulu lima (15) aso, po o se sala tupe, e i le va o le $150 ma le $300; po o fa’asalaga uma e lua.

E $15,000 le tinoitupe faatulaga e mafai ona tatalaina ai Galo mai i le falepuipui, e fa’atali ai lona faamasinoga.

O Jessica Matamua ma Louis Fuimaono, o lo o molia i le Faatupu vevesi i totonu o aiga ma le Faao’olima i lona tulaga e tolu.

O le moliaga o le faatupu vevesi, e mafai ona faafalepuipui ai se tasi i le o’o atu i le sefulu lima (15) aso, po o se sala tupe e $300; po o fa’asalaga uma e lua.

O le moliaga o le fa’ao’olima i lona tulaga e tolu, e mafai ona fa’asala ai se tali i le le silia ma le sefululima (15) aso, po o se sala tupe i le va o le $150 ma le $300; po o fa’asalaga uma e lua.

E $5,000 tinoitupe fa’atulaga e mafai ona tatalaina ai Matamua ma Fuimaono, mai i le falepuipui, e fa’atali ai o la fa’amasinoga.