Pago Pago - AMERIKA SAMOA

I le aso 8 o Novema, 2023 na lokaina ai se alii e toatasi ma ni tamaitai se to’alua, ina ua o latou sopoia se fanua a se aiga, e aunoa ma se faatagana.  Ae o lo o tau saili e leoleo ia se tasi e to’afa ai i latou.

O le moliaga o le solivale o fanua e aunoa ma se faatagana, e mafai ona lokaina ai se tasi i le falepuipui i le 6 masina, po o le sala tupe e $500, ia po o faasalaga uma e lua.

E ta’i $500 lea ua faatonuina le toatolu ua lokaina nei, e totogi ina ia mafai ona tatalaina ai i latou i tua, e faatali ai a latou faamasinoga.

O le alii ua molia nei, e suafa ia Ene Ah Sam, ae o tamaitai e toalua, o Kisa Ioane ma Gateoflove Letele.  O Nelson Tupuola lea o lo o au saili e leoleo, e pei ona ta’ua i totonu o faamaumauga a le malo.

O lo o ta’ua foi i faamaumauga a leoleo e faapea, o le aso 8 o Novema, 2023, sa va’aia ai Tupuola o mata aitu solo i le fale o Alesana Vou ma lona to’alua o Lelelese Soliai i Tafeta ma sa valaau ai loa e le ulugalii ia leoleo.

Sa faamatala e Soliai i leoleo, o lo o la taofia ia ni tagata se toatolu na solivaleina lo la fanua, i se latou pikiapu.  Ma sa ta’ua e Soliai, e na’o le la fale lava lea e i luga o le fanua lea sa solivale e i latou nei, e leai lava seisi fale e latalata atu ae na tatalaina ma ave’esea e latou ia, ia le filifili ma le loka o le pa o lona fanua.  

Sa ta’ua e Soliai, na mafua ona o la iloa le o’o atu o le vaega lea i luga o lona fanua, ona o le valaau atu a se alii e suafa ia Willy Leomata, ma faailoa atu ia te ia, le agai atu o se pikiapu i le auala e agai atu i lona fale.

Sa faamatala e Vou ma Soliai, na la taunuu mai i Amerika Samoa i le po o le aso Gafua, Novema 6, 2023 ma o la molimauina le tulaga faaletonu na iai lo la fale, e foliga mai na osofaia e nisi.  Ma o le aso na soso’o ai, na o la failaina ai loa se ripoti i le ofisa a leoleo.  Sa o la ripotia le faaleagaina o le tele o vaega ma meatotino i le fale, ma sa la ta’ua foi le mauaina o se ‘cooler’ tele na tumu i apa meaai, o se moa vao, o se masini tapena fanua ma nisi lava o mea totino. 

Sa iai se talitonuga a Vou ma Soliai, e foliga ai o nei mea uma sa tapena, ina ia ave’ese atu mai lo la fale.

I le molimau a Leomiti sa faamaumauina e leoleo, sa ia faamatalaina ai lona vaaia o se pikiapu o agai mai i le fale o lona tausoga, o Soliai.  Ae o le taimi lava lea na valaau mai ai Soliai ia te ia, o lo o iai nit agata i luga o le fanua, ona ua le motu le ou a le ta’ifau ma ua pe foi le moli o le fale e tu’u ai taavale, ae sa la ki ina le moli ae la te le’i tu’ua le fale.

Sa ta’ua e Leomiti lona savali atu agai i le fale o lona tausoga ma ia va’aia ai le agai mai o se pikiapu.  Sa ia faatuina le taavale ma fesiligia le avetaavale ma le pasese po o fea a aga’i iai.  Ae tali mai, o la e o e asiasi i nisi o a latou aiga.  Ae sa le i talitonu Leomiti, ma ia faatonuina ai loa le aveta’avale e solomuli le latou ta’avale i luma o le fale o Soliai, e faatali ai leoleo.

E taunu’u leoleo, ae ua sola le alii o Tupuola, ae tu’ua ai na o le toatolu lea ua molia nei i le tulafono.  Sa aveina uma i latou e leoleo mo le suesueina.

Sa faamatala e Ioane, na valaau mai ia Letele o le a sau e piki latou te tafafao.  Ma na piki mai Letele i Faleniu.

Sa faamatala e Letele, e le o se taimi muamua lea ua o’o ai i le fanua lea.  O le aso Gafua, Oketopa 30, na la o ai ma Ah Sam i le fanua lea, ma la eva ai, na o la’ua.  Na la toe fo’i I le fanua lea I le aso Gafua, Novema 6, e talatalanoa ai.  O le aso lea, na latou fetaui ai ma Tupuola, o mana’o i se lifi i luga i Tafeta.  Na iai faatasi ma le teine a Tupuola.

A’o alu le taavale, na talosagaina e Tupuola ia Ah Sam, e momoli o ia i le fale a lona ‘uncle’, le fale a Soliai, ae ina ua o latou taunuu i fale, sa faatonuina Ah Sam e Tupuola, e alu e paka i autafa o le auala, ae sei alu i lona ‘uncle’ mo se tupe mo le kesi o le taavale.  Na ta’ua e Letele, le fai o sina umi o alu ia Tupuola, ae ina ua toe fo’i mai, sa ia tu’uina atu ia i la’ua se $20 e utu ai le kesi o le taavale.  Na ta’ua foi e Letele, e latou te le i tatalaina le filifili o le pa lea sa loka ai le auala i le fale o Soliai.

Na faamaonia e Ah Sam ia le faamatalaga a Letele e uiga ia Tupuola ma le $20.  Sa ta’ua e Ah Sam, e na te le iloa le mea na alu iai Tupuola a’o la faatali i tafatafa o le auala.  Ae o le po na soso’o ai, po o le aso Lua, na la toe o ai ma Ioane i le fanua lava lea e tasi, ae maua ai loa la’ua ma loka mai ai la’ua.  Sa toe ta’ua foi e Ah Sam, e la te le i tatalaina le filifilia lea na loka ai le pa.  Ae sa faatonuina o ia e Tupuola, e solomuli sa’o atu lava le la taavale i le fale ma faatali mo lana faailo.

Sa aofia foi i le faamatalaga a Ah Sam ia le latou feiloaiga ma Leomiti, a’o tu le la taavale i tafatafa o le auala.  Sa ia ta’ua e faapea, na sosolo atu le taavale a Leomiti i tafatafa o le la taavale ma faapea atu Leomiti, o latou ia o gaoi lea o lo su’e.  Ma o iina na faatonu ai o ia e Leomiti, ina ia alu le la taavale i le fale.  Ina ua o latou taunuu i le fale, na se’i e Leomiti le ki o lana taavale, ma latou faatali ai mo leoleo.

O lo o ta’ua i faamaumauga a leoleo, le silafia e Letele ma Ah Sam le mafuaaga na toe foi ai i le fale o Soliai, aua na o la faamatalaina le agai atu o Tupuola ma Ioane i le fale teu oloa ina ua o latou taunuu i Tafeta ma taumafai e la’u mai ni mea totino mai totonu o le fale.

A’o iai le toatolu lea i totonu o le ofisa a leoleo, sa taumafai ai Ioane e sola ese, e ala i lona puna mai i fafo o le faamalama o le fale taele a le ofisa a leoleo.  Sa maua ai i totonu o le faletaele ia se tamai taga pepa iila o iai i totonu se sikareti mariuana, ela ua faaooina atu nei i le vaega a le Ofisa o Leoleo e gafa ma Fualaau Faasaina.  Na toe maua e leoleo ia Ioane i le pakaga o le Ofisa Palota ma toe fa’afo’i mai i le ofisa a leoleo.

O lo o ta’ua i faamaumauga a le malo le agai uma o i latou ua lokaina nei, i le fanua ma le fale o Soliai, ina ia aumai mea totino ia sa o latou tu’uina i totonu o le fale e tu’u ai taavale.  Ma e le faatasi ona solivale e i latou nei ia le fanua i Tafeta.