Ads by Google Ads by Google

Molia se alii ma se tamaitai umia o fualaau faasaina ma se fana


[ata: SN]
ausage@samoanews.com

Pago Pago, AMERIKA SAMOA

 

O lo o taofia i le Toese i Tafuna se alii ma se tamaitai ina ua maua e Leoleo fualaau faasaina, o se fana ma ni pulu fana i totonu o le taavale mau totogi na la malaga ai. O i laua e to’alua e aofia ai le tamaitai o Elisa Aloese, o ia lea o le ave ta’avale ma le ali’i o Leaisaufeau Ale, lea sa nofo i le nofoa o le pasese. 

 

O le masina na te’a nei na tutula’i ai Aloese ma Ale i luma o le Fa’amasinoga Faaitumalo. 

 

Ua molia Aloese i le moliaga e tasi o le umia faasolitulafono o vaega o fualaau faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atui le 10 tausaga, pe faasala foi i le salatupe e oo atu i le $20,000, poo le faasala foi i faasalaga uma ia e lua.

 

O le susuga a Ale lea o lo o molia i le moliaga o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000; faapea ai ma le moliaga e tasi o le umia o se aupega faasaina faapea ai ma le umia o ni fulufana, o ni solitulafono mama o le vaega A, lea e mafai ona faasala ai se tasi i le Toese mo le umi e le silia i le tasi le tausaga, pe faasala foi i le salatupe e le silia i le $1,000, poo le faasala foi i faasalaga uma ia e lua.

 

E $5,000 lea ua faatulaga e le Fa’amasinoga Faaitumalo e tatala ai i tua Aloese, ae $10,000 mo Ale. 

 

Afai ae tatala i laua i tua, ua poloaina e le Fa’amasinoga i laua ina ia auai i soo se taimi e faatulaga ai a laua iloiloga, fesoota’i vava lalata ma le Loia Fautua ua tofia e tula’i mo i laua, ma aua nei o la toe umia ni fualaau faasaina poo ni aupega.

 

TAGI A LE MALO

 

E pei ona taua e le malo i le latou tagi e faapea, o le afiafi o le aso 21 Iulai, 2021 na logo ai e le Ofisa o Leoleo i Tafuna susuga i Leoleo Suesue o lo o gafa ma le suesueina o mataupu tau i Fualaau Faasaina, e tusa ai o se mataupu e faatatau i se ta’avale mau totogi na maua ai fualaau faasaina, o se fana ma ni pulufana. 

 

E to’atolu Leoleo Suesue mai le Vaega e Suesueina Fualaau Faasaina na aga’i atu i le Ofisa o Leoleo i Tafuna mo le suesueina o lenei mataupu, ma maua ai le avanoa e fesiligia ai e Leoleo Suesue alii ma tamaitai Leoleo na taofia le ta’avale na maua ai fualaau faasaina e tusa ai o le faalavelave na tula’i mai.

 

Na taua e se tasi o Leoleo i Leoleo Suesue e faapea, i le afiafi po o le aso 21 o Iulai, na faatino ai a latou tiute masani o le siaki lea o nofoaga o lo o i ai meatotino a le malo i le Vai Fagaloa ma latou afea ai loa luga o le Tramway i Utulei. Na latou taunuu ma vaaia ai se ta’avale mau totogi o lo o paka i luga o le Tramway o lo o pe moli ae o lo o i luga tioata o le ta’avale. 

 

Na tu te isi le taavale a Leoleo mo sina taimi peita’i sa vaaia pea le ta’avale paepae mau totogi o lo o tu, ma n tagata se to’alua o loo talanoa i totonu o le ta’avale. Na savali atu le Leoleo e to’atasi ma tu’itu’i le tioata o le faitoto’a i le itu o le ave ta’avale, ma vaaia ai se alii ma se tamaitai i totonu o le ta’avale, e foliga mai o loo misa ma tau upu.

 

Na vaaia e Leoleo le te’i o le tamaitai ave taavale ina ua tu’itu’i atu le Leoleo i le faitoto’a, ma vaaia ai loa e Leoleo le togi e le tamaitai ave taavale o se mea sa uu i lona lima i le nofoa pito i tua o le ta’avale. I le taimi lava fo’i lea e tasi, na tatala ai loa e le alii sa nofo i le nofoa o le pasese ma savali i fafo, ao faafafa i lona papatua se ato faafafa lanu enaena.

 

O le tamaitai ave taavale o ia lea o Elisa Aloese, ae o le alii na nofo i le nofoa o le pasese o le susuga a Leaisaufeau Ale.

 

Na toe savali atu le alii Leoleo ma tu’i tu’i le faitoto’a o le itu a le ave taavale ma faatonu ia Aloese e tatala le faitoto’a ae sau i fafo ma le ta’avale. O le taimi na tatala ai e Aloese le faitoto’a ma oso i fafo o le ta’avale, na iloa atu ai e le ali’i Leoleo se paipa tioata e masani ona fa’aaoga e ula ai le pauta o le aisa, o loo taatia mai i luga o le nofoa o le pasese.

 

O le taimi lea na taofia ai loa Aloese ma Ale i lalo o le vaavaaiga a Leoleo ae faagasolo loa suesuega i totonu o le ta’avale. Na saili e Leoleo totonu o le ta’avale ma maua ai le paipa tioata o loo i ai vaega o le pauta faasaina o le aisa.

 

Na taofia Aloese ma Ale i totonu o le ta’avale a Leoleo ae saili e Leoleo le ato faa fafa na fealua’i ma Ale. I totonu o le ato na maua ai fualaau faasaina ma se fana, o le ituaiga o le .38 o loo i ai se pulu fana e tasi i totonu, ma le atigi ututau e tasi ua mae’a ona faapa. 

 

Na toe saili e Leoleo totonu o le taavale ma maua ai se pepa iila o loo i ai vaega o le pauta faasaina o le aisa, o loo taatia i le va o le nofoa o le ave taavale ma le nofoa a le pasese.

 

Na auina faatasi Aloese ma Ale i le Ofisa o Leoleo i Tafuna ma maua ai loa le avanoa e fesiligia ai i laua e Leoleo Suesue e tusa ai o le faalavelave na tula’i mai. Ina ua mae’a ona faailoa aia tatau o Aloese, sa ia fa’ailoa ai loa i Leoleo Suesue lona malamalama i ona aia tatau, peita’i e le mana’o e fai sana faamatalaga e tusa ai o le faalavelave na tula’i mai.

 

Na fesiligia fo’i Ale e Leoleo Suesue e tusa ai o le faalavelave na tula’i mai. Ina ua fesiligia e Leoleo Suesue ia Ale poo ai e ana le ato faa fafa na ia amoina, ae na tali le ua molia, o ia e ana le ato faafafa na ia amoina.

 

Na toe fesili Leoleo Suesue ia Ale poo ai e ana le fana na maua i totonu o le ato, ae na tali le ua molia, o le fana a lana uo na alu e faanoi mai e fana ai lana pua’a mo le faalavelave a lona aiga. 

 

Ina ua fesiligia Ale mo sana faamatalaga e tusa ai o le faalavelave na tula’i mai, na musu le ua molia e fai sana faamatalaga, ae na ia manatu e fa’agaioi lona aia tatau e nofo filemu ai e aunoa ma se faamatalaga e faia.

 

Na tuu faatasi e Leoleo mau faamaonia na maua ao lumanai ai le tuuina atu i le potu e teu ai mau faamaonia a le malo. Na faia se suega i pauta papa’e na maua ia Aloese ma Ale ma faamaonia ai, o vaega ia o le pauta faasaina o le aisa.

 

O le mae’a ai ona tuu faatasi e Leoleo Suesue o mau faamaonia o lenei mataupu, na auina atu ai loa Aloese ma Ale ma taofia i le Toese i Tafuna e faatali ai le taimi e tutula’i ai i luma o le Fa’amasinoga.