Ads by Google Ads by Google

Molia se alii mai Samoa i le faaoolima ma le umia o fualaau faasaina


[ata: foa'i]
ausage@samoanews.com

Pago Pago - AMERIKA SAMOA

 

E 31 tausaga o se ali’i ua molia nei i lona umia faasolitulafono o fualaau fa’asaina o le aisa ma le mariuana, e mafua mai i le taimi na pu’e faapagota ai e Leoleo ona o tu’uaiga i lona fasiga o lona to’alua ae maua ai fualaau fa’asaina i le taga o lona ofu sa fai.

 

Na pepelo le ua molia i Leoleo e fa’atatau i fualaau fa’asaina, ae ina ua fa’aauau pea suesuega faasaga ia te ia, na ia ta’utino ai loa i Leoleo, o ana fualaau fa’asaina na fa’atau mai i se isi ali’i mai le nofoaga o Logotala hill, poo Le Filifili e pei ona iloa ai e le to’atele.

 

[Talu ai puipuiga i le ono mafai lea ona iloa le Tina o lo o aafia i lenei mataupu, o le a le mafai ai e le Samoa News ona faalauiloa le igoa o le alii ua molia e Leoleo.]

 

TAGI A LE MALO

 

O lenei mataupu na tofu atu i le Ofisa o Leoleo i Tafuna i le 3 vaiaso talu ai, ina ua talosagaina e se alii e 45 tausaga le matua mai Vaitogi se fesoasoani a Leoleo, faasaga i se alii na ulufale faamalosi i totonu o lona fale pe tusa o le 5:00 i le vaveao ma faaoolima i lana uo tama’ita’i. Na iloa mulimuli ane i suesuega a Leoleo, o le alii lea na ulufale faamalosi ma faaoolima i le tama’ita’i, o laua o le ulugali’i faaipoipo.

 

O le Tina talavou na aafia, sa momoe ma le alii lea na ia talosagaina le Ofisa o Leoleo mo se fesoasoani. E to’atele Leoleo na aga’i atu i le nofoaga na tula’i mai ai le fa’alavelave ma maua ai le avanoa e fesiligia ai le alii na aafia. 

 

Na taua e le ali’i lea i Leoleo e fa’apea, sa la momoe ma lana uo tamaitai i lona fale. I le itula e 4:00 i le vaveao, na la feala ai i luga ma alu loa lana uo tamaitai ua nofo i le potu malolo ma matamata le T.V, ae o loo taoto pea o ia i totonu o le potu ma taalo i lana telefoni.

 

Pe tusa o le itula e 5:00 i le vaveao lava lea, ae ona faalogoina loa le ee mai o lana uo tamaitai i luma o le potu malolo. Na ia tamo’e atu i luma ma ia vaaia ai se alii o loo ia ta tu’i foliga o lana uo tama’ita’i ma kiki lona papatua. Sa ia vaaia fo’i le taimi na titina ai e le alii lea lana uo tama’ita’i. 

 

Na ia taumafai e fesoasoani i lana uo tama’ita’i peita’i na faatonu e le ali’i lea o ia e aua ne’i pa’i atu ina ne’i aafia atu ai ma ia i le fa’alavelave. Na taua e le alii lea i Leoleo e fa’apea, ua silia i le 2 masina le la mafutaga ma lana uo tama’ita’i, ma lona le iloaina e fai sona aiga. Ana leai le faalavelave e pei ona tula’i mai, na te le iloa e fai le to’alua a le tama’ita’i sa la mafuta.

 

A o talanoa Leoleo ma le ali’i lea, na toe maua ai e Leoleo le isi valaau, o se Tina o loo ia moomia se fesoasoani i le nofoaga lava lea, ona o sauaga sa faia e lona to’alua ia te ia. Na aga’i atu Leoleo i le fale ma latou faamaonia ai, o le Tina lea na aafia i le fale o le alii lea na latou fesiligia, lea ua ia talosagaina le fesoasoani a Leoleo.

 

Na taunuu Leoleo ma latou molimauina ai manu’a i foliga o le Tina ma talosagaina ai loa le vaega a le EMS mo ni togafitiga mo le Tina. Na muamua lava talosaga le Tina lea i Leoleo mo se avanoa e aveese mai ai lana fanau e to’atolu o loo i totonu o le fale faatasi ma lona to’alua.

 

Na aga’i atu Leoleo ma ave ese mai le fanau e to’atolu a le Tina, faatoa taofia faapagota ai loa le ua molia ma tuuina atu i totonu o le ta’avale a Leoleo. 

 

Na taua e le Tina i Leoleo e fa’apea, o ia na alu e aumai lana uaea fafaga telefoni i le fale o lana uo, peita’i na fai si umi o le po o fai la evaga ma lana uo, ma ia filifili ai loa e moe ai i le fale faatoa usu mai ai i le taeao e sosoo ai.

 

Na ioe le Tina i Leoleo, ua silia i le 2 masina talu ona faia le mafutaga faalilolilo ma lana uo. Na mafua ona ia faia lenei gaioiga, ona o le ita o lona loto i le fai soo e lona to’alua o lana amio o le inupia ma le ula o fualaau fa’asaina. Na faailoa e le Tina i Leoleo, ua mana’o e tete’e ma lona to’alua ona ua amata ona faateteleina lana amio o le tago i fualaau fa’asaina, o loo popole fo’i o ia i le saogalemu o ia ma lana fanau.

 

Ina ua fesiligia e Leoleo le ua moia e uiga i lenei mataupu, sa ia ioeian ai lona ulufale faamalosi i totonu o le fale o le alii na aafia ma faaoolima i lona to’alua, e ala i lona fa’aaoga o se laupapa e sasa ai lona papatua ma ta tu’i ona foliga. Sa ia taua atili fo’i i Leoleo lona folafola o le fasiotiina o le alii na aafia faatasi ai ma lona to’alua, ona o le agasala o loo la faia faalilolilo.

 

A o le i auina atu le ua molia i le Ofisa o Leoleo i Tafuna mo suesuega, na siaki muamua e Leoleo lona tino poo i ai ni aupega poo ni fualaau fa’asaina. Ina ua saili e Leoleo le tino o le ua molia, sa maua i ai se pepa iila o loo i ai vaega o le pauta faasaina o le aisa. Sa siaki le isi taga ma maua ai fo’i le isi pepa iila o lo o i ai lau mamago o le mariuana.

 

Ina ua fesiligia le ua molia e tusa ai o fualaau fa’asaina sa maua ia te ia, sa ia taua e le o ia e ana fualaau fa’asaina nei, o mea sa ia maua i totonu o le fale o le alii na aafia. Peita’i ina ua umi ona fesiligia o ia e Leoleo, sa ia ta’utino ai loa, o ia e ana fualaau fa’asaina, o mea na ia faatauina mai i se isi tagata i Vaitogi.

 

Sa ia ta’utino e fa’apea, a o le i alu e saili lona to’alua, na muamua ula lana aisa faatoa alu ai loa e saili lona to’alua, ina ia aua ne’i fefe pe palaai i le taimi e faatino ai lana gaioiga.

 

O le 3 vaiaso talu ai na pu’e faapagota ai e Leoleo le ua molia ma tula’i ai loa i luma o le Fa’amasinoga Faaitumalo.

 

E 2 tagi ua faila e le malo fa’asaga i le alii ua molia. I le tagi muamua, o lo o tu’uaia ai o ia i le moliaga o le faaoolima i le tulaga lua; tasi le moliaga o le talepe fale i le tulaga lua, faapea ai ma le moliaga e tasi o lona taofia faapagota o se tagata i se auala faasolitulafono; o vaega D uma ia o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe fa’asala fo’i i le salatupe e oo atu i le $5,000, poo le faasala fo’i i faasalaga uma ia e 2, faapea ai ma le moliaga mama o le faatupu vevesi i nofoaga faitele.

 

I le tagi lona lua a le malo, ua molia ai lenei ali’i i le moliaga e tasi o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le laau fa’asaina o le mariuana, o ni vaega ia o solitulafono mamafa, lea e mafai ona fa’asala ai se tasi i le Toese mo le umi e oo atui le 20 tausaga, pe fa’asala fo’i i le salatupe e oo atu i le $20,000, poo le fa’asala fo’i i faasalaga uma ia e 2.

 

E $15,000 le vaega tupe lea ua fa’atulaga e totogi ona faatoa mafai ai lea ona tatala le ua molia i tua.

 

Afai ae tatala o ia i tua, ua poloaina o ia e le Fa’amasinoga ina ia auai i soo se taimi e valaau ai lana mataupu, ma ia aua nei taumafai e tuua le atunuu pe sola ese fo’i, sei vagana se poloaiga a le Fa’amasinoga.

 

E le mafai ona ia toe taumafai e fa’afesoota’i molimau a le malo, e aofia ai ma lona to’alua na aafia i lenei mataupu. Afai la te fetaui i soo se nofoaga i totonu o le teritori, o lona tiute o le savali ese mai ai ma le filemu. Ua poloaina fo’i o ia ina ia aua ne’i ona toe tagofia le ava malosi poo fualaau fa’asaina.

 

O le aso Tofi o le vaiaso fou lea ua fa’atulaga e faia ai le ulua’i iloiloga o lenei mataupu.