Ads by Google Ads by Google

Molia se ali’i i le umia o fualaau fa’asaina ma le ave ta’avale ‘ona

ausage@samoanews.com

O le ali’i lea na taofia faapagota e Leoleo i le 2 vaiaso talu ai ona o tu’uaiga i lona ave ta’avale ‘ona faapea ai ma le umia o fualaau fa’asaina, na ia faailoa i Leoleo, e leai se Leoleo e mafai ona lokaina o ia, ona o ia o le nephew o le Kovana o Amerika Samoa.

 

O le 2 vaiaso talu ai na tula’i ai le susuga a Marquis Leauma, lea fo’i e igoa ia Marguis Moliga i luma o le Fa’amasinoga Fa’aitumalo.

 

O Leauma, 33 tausaga le matua, ua molia nei o ia i le moliaga o le umia faasolitulafono o vaega o le laau faasaina o le mariuana, o se solitulafono mamafa e mafai ona fa’asala ai se tasi i le toese mo le umi e le itiiti ifo i le 5 tausaga ae le sili atu i le 10 tausaga, pe faasala foi i le salatupe e le itiiti ifo i le $5,000 ae le sili atu i le $20,000, pe faasala foi i faasalaga uma ia e lua.

 

O loo tu’uaia fo’i le ua molia i solitulafono tau taavale afi i luga o le alatele, lea e aofia ai ma le moliaga o le ave ta’avale ‘ona, o le vaega A lea o solitulafono mamafa, lea e mafai ona fa’asala ai se tasi i le toese mo le umi e le silia i le tausaga, pe faasala fo’i i le salatupe e le silia i le $1,000, poo le faasala foi i faasalaga uma ia e lua.

 

E $5,000 le tupe lea ua faatulaga e le Fa’amasinoga e totogi ona fa’atoa mafai lea ona tatala le ua molia i tua.

 

TAGI A LE MALO

 

E pei ona taua e le malo i le latou tagi e fa’apea, o le vaveao o le aso 10 o Ianuari 2020 na pu’e faapagota ai e Leoleo le ua molia, ina ua musu e fa’aauau le suega lea e faia i vaega ta’avale pe a masalomia lo latou tagofia o le ‘ava malosi i luga o le alatele ao latou faafoeina le ta’avale.

 

Na taua e le malo e fa’apea, a o tiute ni isi o Leoleo i luga o le alatele i le vaveao o le aso e pei ona taua, sa latou maitauina se ta’avale e aga’i atu i le itu i sisifo o le atunu’u, e le gata o loo alu i se saoasaoa uiga ese, ae sese fo’i le laina o le auala o lo o alu ai lana ta’avale. O le sese o le laina na alu ai le ta’avale na vaaia ai loa e Leoleo le toeitiiti lava a lavea i le magatonu o loo faafesaga’i tonu lava ma le nofoaga a le Ami Faaleoleo i Tafuna ma le Ofisa o Leoleo i Tafuna.

 

Na aga’i atu le ta’avale a Leoleo ma tuliloa le ta’avale lea na toeitiiti lava a lavea i luga o le alatele ona o le naunau lava ina ia puipuia le saogalemu. E to’alua ni ali’i sa i totonu o le ta’avale, o le ave ta’avale, o ia lea o Leauma, le ua molia i lenei mataupu, ma le pasese o le susuga a Allen Tuiletufuga.

 

Sa molimauina fo’i e Leoleo i le taimi lea le susuga a Leauma e le o faia lona fusipa’u mo le saogalemu.

 

Ina ua fesiligia Leauma mo lona laisene ave ta’avale, sa ia fa’ailoa i Leoleo, e nao lona laisene ave ta’avale mai le Setete o Kalefonia o loo i ai. Ae ina ua fesiligia e Leoleo poo fea o i ai lona laisene ave ta’avale mai Kalefonia, na tali le ua molia, e le o i ai te ia, ae o loo i ai i le fale o lona tausoga.

 

O le faatosotosololoa o le tautala a le ua molia na masalomia ai loa o ia e Leoleo, o loo i ai o ia i aafiaga o le ‘ava malosi, o le mafua’aga fo’i lea na faatonuina ai o ia ina ia alu ese i fafo ma lana ta’avale ae alu atu e fa’atino le suega ina ia mautinoa ai o lo o atoatoa lona malamalama.

 

Ina ua fesiligia e Leoleo le ua molia i lona igoa, sa ia faailoa i Leoleo, o lona igoa o Marquis Moliga, o ia fo’i o le nephew o le Kovana o Amerika Samoa, le tofa a Lolo Moliga. Na iloa mulimuli ane e Leoleo, o le susuga a Marquis Moliga, o le isi fo’i ona igoa o Marquis Leauma.

 

Na fesili Leoleo ia Leauma pe sa taumafa sana ‘ava malosi, na tali le ua molia, e leai. Ae i le taimi na faatinoina ai e le ua molia le suega e ala i lona savali i luga o le laina ua faatulaga mai e le Leoleo, na vaaia ai lona le ausia o le tulaga e tatau ona i ai. E le gata sa sipa solo lana savali, ae na i’u lava ina musu o ia e fa’aauau le suega.

 

Sa taumafai Leoleo e faamalamalama ia Leauma tulaga o le suega, peita’i sa vaaia le ita o le ua molia ma amata ona siisii i luga lona leo i Leoleo. Sa ia faapea atu fo’i i Leoleo, e leai se Leoleo e mafai ona lokaina pe molia o ia, ona o ia o le nephew a le Kovana o Amerika Samoa. Sa ia taua fo’i e faapea, e mafai ona ia telefoni i lona uncle Kovana ma faailoa i ai mea leaga ua faia e Leoleo ia te ia.

 

Na taofia e Leoleo le ua molia faatasi ai ma lana ta’avale, ma auina atu loa i le Ofisa o Leoleo i Tafuna mo nisi suesuega.

 

Ina ua saili e Leoleo totonu o le ta’avale, sa latou maua ai se sikaleti mariuana ua uma ona taai. Sa fesili Leoleo i le ali’i ua molia poo ai e ana le sikaleti mariuana, ae na tali le ua molia, na te le iloaina poo ai e ana le sikaleti mariuana. Sa ia taua atili fo’i e fa’apea, e le o ia o se tagata e ula i le mariuana, na te le faatauina atu fo’i mariuana i isi tagata.

 

Na musu le ua molia e saini pepa sa tuuina atu e Leoleo e faamaonia ai lona malie e faaagafua le faitauina o ona aia tatau faaletulafono. Sa ia musu fo’i e saini le pepa sala tau ta’avale afi e faamaonia ai le mae’a lea ona ia tauaao o le pepa sala mai le Leoleo.

 

Pau lana tala sa fai i le Leoleo, e tatau ona alu i Amerika e toe aoga faa Leoleo, ina ia mafai ai ona ia malamalama atili i auala e faatino ai lana galuega. A o faaauau pea talanoaga a Leoleo ma le ali’i ua molia, sa atili ai ona sii i luga lona leo ma leotele, ma ia fai atu i Leoleo, e leai se isi e mafai ona lokaina o ia.

 

Na saili e Leoleo le ta’avale na faafoe e le ua molia ma iloa ai, o le ta’avale o loo lesitala i le igoa o Sale Young o Vaitogi. Ae na faailoa e le ua molia i Leoleo e faapea, o lea ua amata ona ia totogiina le tau o le ta’avale ia Young mo le tau e $7,000.