Ads by Google Ads by Google

Molia se alii i le umia o fualaau faasaina ma le faia o sau’aga i lona aiga


[ata: SN]
ausage@samoanews.com

Pago Pago, AMERIKA SAMOA

 

Ua tu’uaia nei e le malo se ali’i e 46 tausaga le matua i lona umia o fualaau faasaina ma le faamoemoe e tulei ma faatau atu i isi tagata, ina ua taofia faapagota o ia i lona faia o ni gaioiga e save’u ai le nonofo filemu i totonu o le latou aiga aemaise ai le va o ia ma lona To’alua, ae maua ai e Leoleo fualaau faasaina i totonu o se tama’i ato lanuuliuli sa fusi i lona sulugatiti.

 

O le masina na te’a nei na tula’i ai le susuga a Reupena Afitu i luma o le Fa’amasinoga Faaitumalo mo lana ulua’i iloiloga.

 

E 5 moliaga ua tu’uaia ai e le malo le susuga a Afitu. 

 

O ia moliaga e aofia ai moliaga mamafa e 3 o lona taofia faappagota o lona aiga i se auala fa’asolitulafono; fa’aaoga fa’asolitulafono o se a’upega; faapea ai ma le umia fa’asolitulafono o vaega o le pauta fa’asaina o le aisa, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua; faapea ai ma moliaga mama e 2, le moliaga o le faaoolima i le tulaga tolu, atoa ai ma le faia o gaioiga e ono lamatia ai le saogalemu o fanau laiti, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala i le salatupe e le silia i le $1,000, poo le fa’asala fo’i i fa’asalaga uma ia e lua.

 

E $25,000 le vaega tupe lea ua fa’atulaga e le afioga i le tamaitai Faamasino ia Gwen Tauiliili-Langkilde e totogi ona faatoa mafai lea ona tatala Afitu i tua mai le Toese i Tafuna 

 

Afai ae mafai e le ua molia ona totogi le tupe ua fa’atulaga e tatala ai o ia i tua, ua fautuaina o ia e le Fa’amasinoga ina ia fesoota’i vava lalata ma lana loia, auai i soo se taimi e valaau ai lana mataupu, ma ia tausisi i tulafono uma a le malo.

 

E le mafai ona ia tuua le atunu’u pe taumafai fo’i e tuua faamalosi le atunu’u e aunoa ma se fa’atanaga a le Fa’amasinoga, ua poloaina fo’i le tuuina atu o lona tusi folau e taofi e le malo se’i vagana ua mae’a taualumaga o lana mataupu.

 

E mafai ona ia taumafai e faafesoota’i molimau a le malo i soo se auala, aemaise ai fo’i lona to’alua ma lana fanau. Afai latou te fetaui i soo se nofoaga, o lona tiute o lona tula’i lea ma alu ese mai ai.

 

Na teena e le Faamasinoga le talosaga a le ali’i Loia Fautua sa tula’i mo le alii ua molia, mo se avanoa e faaitiitia ai le tupe e tatala ai i tua o ia e faatalitali ai taualumaga o lana mataupu. 

 

Na taua e le alii Loia Fautua e fa’apea, e mana’omia le faigaluega o le ua molia e tausi ai lana fanau, e le o ia o se tagata e masalomia lona sola ese ma le atunu’u, ae o ia o se tagata e galue malosi mo le manuia o lona aiga.

 

Na talosaga atili le Loia Fautua i le Fa’amasinoga ina ia faaitiitia i le $5,000 le tupe e tatala ai i tua le ua molia. 

 

Na tete’e malosi i ai le itu a le malo i lea talosaga. Na taua e le Loia a le malo e fa’apea, o le tupe lea ua mae’a ona fa’atulaga e tatala ai i tua le ua molia, ua talafeagai lelei ma le matuia o le solitulafono ua tu’uaia ai o ia.

 

Na taua e le loia a le malo e fa’apea, e le gata na fa’afefe e le ua molia lona to’alua i se a’upega malosi, ae na ia taofia faapagota fo’i le Tina ma le fanau mo se taimi umi. Ae sili ai i lo lena, na maua ai e Leoleo fualaau fa’asaina ina ua pu’e fa’apagota o ia mai le nofoaga o lo o faigaluega ai.

 

E talitonu le malo, afai ae tatala i tua le ua molia, e ono tele se avanoa e sola ese ai o ia mai le atunu’u. 

 

I le mae’a ai ona fa’afofoga o le Fa’amasinoga i fa’afinauga a itu e lua i uiga i le talosaga a le itu tete’e, na teena ai loa e Patea le talosaga ina ia faaitiitia le tupe e tatala ai le ua molia. Na taua e le Faamasinoga e fa’apea, o le tupe ua mae’a ona fa’atulaga, ua talafeagai ma le mamafa o le solitulafono o lo o tu’uaia ai le ua molia.

 

O le vaiaso nei lea na tula’i ai le ua molia i luma o le Fa’amasinoga Maualuga mo lana ulua’i iloiloga, ma ia teena ai tu’uaiga fa’asaga ia te ia. 

 

O le masina o Tesema lea ua fa’atulaga e faia ai le ulua’i iloiloga o le mataupu a Faapu’e i luma o le Fa’amasinoga Maualuga. O le taimi nei, o lo o taofia pea o ia i le toese i Tafuna ina ua le mafai ona ia totogi le tupe sa fa’atulaga e tatala ai o ia i tua.

 

TAGI A LE MALO

 

O lo o taua e le malo i le latou tagi e faapea, o le po o le aso 24 o le masina o Setema na te’a nei na talosagaina ai e se Tina mai se vaega o Tafuna le fesoasoani a Leoleo, mo se avanoa e taofia ai lona to’alua i le Falepuipui ona ua ova le ‘ona ma ua amata fo’i ona ia faia gaioiga e save’u ai le nonofo filemu o le aiga.

 

Na taua e le Tina i Leoleo e faapea, e le o se taimi muamua lea ua faia ai e lona to’alua uiga faapenei ia te ia.

 

Na taunuu Leoleo i le fale o le aiga ma latou aveese mai le Tina ma lana fanau to’atolu ma aga’i atu loa i le Ofisa o Leoleo i Tafuna mo suesuega. Na toe aga’i atu Leoleo e saili mai le ua molia peita’i latou te lei maua le susuga a Fitu i le po lea. 

 

Na taua e le to’alua a le ua molia i Leoleo e faapea, sa faia se inugapia a lona to’alua ma nisi o alii i tua o le fale, ma faafuase’i ai ona ulufale atu lona toalua i totonu o le fale ma fesili atu ia te ia i se mea’ai. Na tali le Tina o le aiga (to’alua a le ua molia), e vaai le mea’ai o loo i luga o le laulau.

 

E lei fiafia le ua molia i le auala na tali atu ai lona to’alua ia te ia, o le mafua’aga lea na ia liliu atu ai loa ma le faamoemoe o le a faaoolima ia te ia, peita’i na oso ese le fafine ma tamo’e i totonu o le potu o loo momoe ai lana fanau.

 

Na faateia le fafine ina ua kiki atu e le tagata le faitoto’a o le potu ma malepe ai. Na manino i le vaai a le Tina, o le tagata na ia kikiina le faitoto’a, o le ua molia. Na avea le pao leotele o le taimi na kiki ai le faitoto’a ma auala na feala ai lana fanau sa momoe.

 

Na ona ulufale faamalosi atu lava o le ua molia i totonu o le fale, ona aapa atu loa lea i lana telefoni feavea’i ua fao faamalosi ese mai i ona lima ae togi i lalo o le fola o le fale. O le taimi lea na faaoolima ai loa le ua molia i lona to’alua ae matamata i ai lana fanau. Na folafola foi e le ua molia lona fasiotia o lona toalua i se a’upega o loo ia te ia, peita’i, e lei vaai lona thalia i se a’upega.

 

O le taimi lea na faatonu ai loa e le ua molia lona to’alua ma lana fanau, e leai se isi e mafai ona toe alu ese ma le fale, e le mafai fo’i e se tasi ona vili i se isi lava tagata.

 

Ae i le taeao o le aso Sa na sosoo ai, na mafai ai loa e le Tina ona tapena lana fanau e momoli i le Aoga Aso Sa, ae maua ai fo’i ma le avanoa e sauni ai fo’i mo lana galuega. Sa na o le tama teine a le Tina na mafai ona alu ma ave, ae o le tama na nonofo ma lona Tama i le fale.

 

A o le i tuua e le Tina le fale, na valaau ane i ai le ua molia e fa’apea, “aua e te faia se mea ou te alu atu ai loa i lou fale faigaluega, ona e le fiafia lea i se mea e tula’i mai ai.”

 

O le fefe tele o le Tina atoa ai ma lona popole i le saogalemu mo ia ma lana fanau, na mafua ai loa ona ia talosagaina se fesoasoani a Leoleo e uiga i lenei mataupu, ma maua ai fo’i ma le avanoa na te fa’aleoina ai i Leoleo mea uma sa tupu i le po ua mavae.

 

Na aga’i atu Leoleo i le fale o le Tina e saili mai ai le ua molia peita’i e lei maua ai o ia, ae ina ua aga’i atu Leoleo i le Fale Faigaluega a le ua molia, sa latou maua atu ai loa o ia, ma pu’e faapagota mai ai loa o ia.

 

A o le i taofia faapagota e Leoleo le ua molia, na maua le avanoa e saili ai lona tino ina ia mautinoa na te le o umia se a’upega. Ina ua sailia e Leoleo le tino a le ua molia, sa latou maua i ai se tama’i pepa iila o lo o i ai vaega o le pauta fa’asaina o le aisa.

 

Na faailoa e le ua molia i Leoleo e fa’apea, o le tele o faafitauli o lo o tutupu i lona olaga ma lona aiga, ua mafua ai ona ia tagofia fualaau fa’asaina. Na ta’utino le ua molia i Leoleo, e moni ma faamaoni tu’uaiga uma na faailoa atu e lona to’alua faasaga ia te ia. Sa ia faatoese i Leoleo e tusa ai o lana solitulafono, ma ia ta’utino ai, na te le toe faia lenei solitulafono.

 

Na sailia fo’i e Leoleo le fale o le Tina na a’afia pe maua ai le a’upega lea na fjlafola e le ua molia na te faaoo ai le maliu i lona to’alua. E leai se mea na maua i le fale.