Pago Pago - AMERIKA SAMOA

O le aso 28 o Iulai, 2024 na taofia e leoleo se taavale i luga o le alatele ma i’u ai ina molia le alii avetaavale ina ua maua e leoleo ia ni vaega o fualaau faasaina, na aofia ai mariuana ma Aisa, i totonu o le taavale.

Ua molia ai nei le alii o Anderson Ta’ala Jr., i moliaga e aofia ai;

Faitauga 1:  Umia fa’asolitulafono se vaega o fualaau faasaina (Aisa), o se solitulafono mamafa, e mafai ona falepuipui ai i le va o le lima ma le sefulu tausaga, po o se sala tupe i le va o le $5,000 ma le $20,000; po o faasalaga uma e lua.

Faitauga 2:  Umia fa’asolitulafono se vaega o fualaau faasaina (Mariuana), o se solitulafono mamafa, e mafai ona falepuipui ai i le va o le lima ma le sefulu tausaga, po o se sala tupe i le va o le $5,000 ma le $20,000; po o faasalaga uma e lua.

E $100,000 le vaegatupe sa faatulagaina e tatalaina ai le ua molia mai i le falepuipui, e faatalitali ai lona faamasinoga.

E tusa ai ma fa’amaumauga a le malo, o le vaveao o le aso 28 na fa’atu ai e leoleo le taavale a Ta’ala, ona o le alu saoasaoa i luga o le auala tele.  Ina ua tapaina e leoleo le laisene avetaavale, sa tali le alii o lo’o galo i le fale.

Na fautuaina loa le ua molia, o le a lokaina e leoleo lana taavale ona o le leai o sana laisene avetaavale.  Ma na fa’ailoa atu iai e leoleo, o le a aveina o ia i totonu o le taavale a leoleo, ae o le a fa’afoeina atu e se tasi o leoleo ia lana taavale.

Ina ua fesiligia le ua molia e leoleo, po o iai ni a’upega i totonu o le taavale e ono lamatia ai le soifua o leoleo, sa tali le ua molia, e leai ni a’upega, ae o sina mariuana lea o lo’o i totonu o le taavale.

Ina ua aveina le taavale i le ofisa a leoleo i Tafuna, sa faatonuina e leoleo ia le ua molia ina ia fa’asino atu ia ana mariuana.  Na a’apa le ua molia ma se’i mai se tamai ato Nike ma tu’uina atu i leoleo.  Ina ua tatalaina e leoleo, na maua ai se tama’i taga pepa i’ila, o iai totonu ia ni laula’au, faapea ma ni pepa ta’ai, ma se vaega o fualaau faasaina, o le Aisa.

Sa faia ni suesuega i laula’au ma tulaga na maua i totonu o le ato a le ua molia, ma fa’amaonia ai, o vaega o ni fualaau faasaina.

Ina ua fa’atalanoaina e leoleo ia le ua molia, sa ia ta’ua e faapea, e fa’atu lana taavale e leoleo, ae o lo’o aga’i atu e fa’atau atu lana taga pepa i’ila mulimuli o mariuana, i se tagata.

Ina ua fesiligia le ua molia e leoleo le tau o lo’o ia fa’atauina ai ia taga pepa i’ila o mariuna, sa tali le ua molia, e $100.  Ma sa faamatala foi e le ua molia, lona agai atu foi e piki mai isi ana taga pepa i’ila mariuana, mai i nisi o ana uo.