Pago Pago - AMERIKA SAMOA

O le vaveao o Mati 15, 2025 na o’o atu ai se valaau i le Ofisa a Leoleo i Tafuna, ona o se soga’imiti sa fealua’i ma se la’au malosi ma fa’afefe ai tagata i totonu o se falekalapu.

Sa fa’ailoa atu e le leoleo po o le falekalapu na valaau i le ofisa a leoleo, le tu’ua e le soga’imiti o le falekalapu i se ta’avale lanu samasama ae na le maua le numera o le laisene o le ta’avale.

Na ta’ua foi le iai o nisi e to’afa i totonu o le ta’avale fa’atasi ma le sogaimiti.

Sa faapea ona agai atu leoleo e saili le ta’avale lanu samasama ma maua atu i le auala agai i Petesa, i tafatafa o se auala galue, ma fa’aafe ai loa i tua.

Na fa’atonuina e leoleo ia le aveta’avale ina ia tape le taavale ma oso mai i fafo ma le ta’avale, ae peitai, sa musu le aveta’avale e sau i fafo.

O lea na toe vala’au ai leoleo i le latou ofisa mo se fesoasoani a ni isi leoleo.  O sina taimi pu’upu’u na taunu’u atu ai nisi leoleo fa’aopoopo e fesoasoani i le mataupu.

Sa faapea loa ona agai atu leoleo i le taavale sa faatu ina ma ave’ese mai ai le aveta’avale ma le pasese e to’afa.  Ina ua fesiligia i latou e tusa ai ma le la’au malosi na ta’ua o lo’o i le aveta’avale, sa ta’ua e le aveta’avale, e leai se la’au malosi, ae na’o sana ili uila (drill).

Na faapea loa ona aveina uma atu le to’alima lea i le Ofisa a Leoleo mo le fa’aauauina o su’esu’ega a leoleo.

O i’ina sa fa’ailoa atu ai e se tasi o le pasese (molimau), o lo’o iai le fana i totonu o le ta’avale, lea na fa’aaoga e le na molia, e fa’afefe ai tagata i le falekalapu.

Sa faapea ona toe agai atu leoleo ma le molimau lea i le ta’avale, ma maua mai ai le fana sa i le itu a le aveta’avale (.22 rifle).

Na fa’amatalaina e le molimau ia lona le fiafia i uiga o le na molia, ona sa le mana’o e fa’apisa le latou tafaoga, ae peitai, na fa’a la la e le na molia ia le fana i tagata.  O le mea lea na ia (molimau) savali ai loa i fafo, i lana ta’avale e faatali mai ai le na molia, ina ia latou o i le McDonald’s e fa’atau se latou mea’ai.

O le vaveao lava lea na o’o atu ai le leoleo po o le falekalapu, i le ofisa a leoleo, e fa’asino le tagata sa fealua’i ma le fana i totonu o le falekalapu.  Ma na fa’asino le alii leoleo o le falekalapu, i se tagata e suafa ia Iosia Mulipola.

Na faapea ona avefaapagotaina Mulipola ma lokaina i le to’ese i Tafuna e faatalitali ai lona tula’i i luma o le Faamasinoga Faaleitumalo.

O ona moliaga, na aofia ai Fa’ao’olima i lona tulaga e tolu ma le Faatupu Vevesi i nofoaga faitele.

O le moliaga o le fa’ao’olima, o se vaega ‘C’ i solitulafono mama, e mafai ona nofosala ai i le falepuipui, e o’o atu i aso e 15, po o se sala tupe e $300; po o faasalaga uma e lua.

O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le falepuipui mo le ono masina, po o se sala tupe e $500; po o faasalaga uma e lua.

O lo’o ta’ua i fa’amaumauga a le faamasinoga le le’i iai o ni pulufana i totonu o le fana lea sa maua i le ta’avale ma e le’i iai se laisene mo le fana.

E le gata i lea, sa fa’aalia i su’esu’ega a leoleo le fa’asuaava o leisi to’atolu lea na i totonu o le ta’avale ma e le’i iai so latou malamalama i se mea na tupu i lea vaveao.

E $300 le vaegatupe na fa’atulagaina e mafai ona tatalaina ai le na molia, e fa’atalitali ai le taimi o lona fa’amasinoga.