Ads by Google Ads by Google

Molia se Tama 66 tausaga faia uiga mataga teineitiiti 6 tausaga


[ata: SN]
ausage@samoanews.com

Pago Pago, AMERIKA SAMOA

 

E 66 tausaga le matua o se Tama mai le afioaga i Vatia ua taofia nei i le Toese i Tafuna, ona o tu’uaiga i lona faia lea o uiga mataga i se teineitiiti e 6 tausaga le matua. 

 

O le Tama matua ua molia, o le susuga lea a Tapeni Leia, poo Tapeni Olo Leifi, lea na tula’i i luma o le Fa’amasinoga Faaitumalo i le vaiaso na te’a nei. O le ali’i Loia Fautua ia Michael White na tula’i mo Leifi ae o le ali’i Loia Sili lagolago ia Robert Morrison III na tula’i mo le itu a le malo.

 

E 5 moliaga ua faila e le malo fa’asaga ia Leifi. O ia moliaga e aofia ai le moliaga e tasi o le faia o uiga mataga i se teineitiiti e i lalo o le 12 tausaga le matua, o le vaega A lea o solitulafono mamafa, lea e mafai ona faasala ai se tasi i le Toese mai le 10 e oo atu i le 30 tausaga; 1 le moliaga o le faia o amioga mataga faasotoma faasaga i se teineitiiti, o le vaega B o solitulafono mamafa, lea e mafai ona faasala ai se tasi i le Toese mai le 5 e oo atu i le 15 tausaga le matua; faapea ai ma moliaga e 3 o le tagofia o itutinosa o se teineitiiti, o le va D lea o solitulafono mamafa, lea e mafai ona fa’asala ai se tasi i le Toese mo le umi e le silia i le 5 tausaga, pe faasala i le salatupe e le silia i le $5,000.

 

E $50,000 le vaega tupe lea ua fa’atulaga e le afioga i le Faamasino ia Elvis P. Patea e tatala ai i tua le susuga a Leifi. 

 

Afai ae tatala i tua Leifi, ua poloaina o ia e le Fa’amasinoga e aua ne’i toe taumafai e faafesootai le teineitiiti na aafia poo lona aiga, pe taumafai fo’i i se isi lava auala e faafesoota’i molimau a le malo. 

 

I le taimi na tula’i ai Leifi i luma o le Faamasinoga Faaitumalo, na faaagafua ai ona aia tatau faaletulafono, ae manatu e tuu sa’o atu loa lana mataupu i luma o le Fa’amasinoga Maualuga e fa’atulaga ai sona faamasinoga autu.

 

Na teena e Lefi le tagi a le malo faasaga ia te ia ina ua tula’i i luma o le afioga i le ali’i Faamasino Sili ia Michael Kruse, ma faatulaga ai loa le isi ana iloiloga mo le masina fou o Ianuari 2021. 

 

A o le i tuuina atu le tali tete’e a Leifi e tusa ai o le tagi faasaga ia te ia i luma o le Fa’amasinoga Maualuga, na fesiligia e le Faamasino Sili o ia poo ai lona suafa sa’o o loo i totonu o lona Tusi Folau.

 

Na mafua le fesili a le Faamasino Sili, ona e 2 suafa o le ua molia o loo taua i faamaumauga a le Fa’amasinoga, e le gata o Tapeni Leia ae o loo i ai fo’i le igoa o Tapeni Lolo Leifi.

 

Ina ua fesiligia le ua molia, sa ia faailoa ai i Leoleo, o lona igoa sa’o lava o loo i lona Tusi Folau o Tapeni Olo Leifi. 

 

Ae ina ua toe fesiligia poo fea e oso mai ai le igoa o Tapeni Leia, na tali le ua molia, o lona uso o lona Tama sa nofo i le suafa Leifi, o ia lea na faia uma ana pepa ma faaigoa ai loa o ia ia Tapeni Olo Leifi. 

 

Na faailoa e le Faamasino Sili i le loia a le malo e faapea, e mafua ona fesili le Faamasinoga, ona e ese fo’i le igoa o loo i luga o le tusi saisai lea na pue faapagota mai ai le ua molia, o le igoa lea o Tapeni Leia, ae ese fo’i le igoa lea ua faailoa mai e le ua molia, o lona igoa moni lea o loo i luga o lona Tusi Folau.

 

O le itu o loo popole ai le Faamasinoga, poo sa’o le tagata lea ua pu’e faapagota ma molia e le malo. 

 

Na tali le tamaitai loia sili lagolago ia Kristine Soule o loo tula’i mo le malo i lenei mataupu e faapea, e talitonu le malo o loo sa’o le tagata o loo molia, ona o le tagata tonu lava lea na faailoa e le teineitiiti na aafia faapea molimau i Leoleo.

 

Ua poloaina e le Faamasinoga le itu a le malo ina ia tuuina atu faamaumauga sa’o e faamaonia ai le igoa sa’o o le ua molia, pe a oo i le isi iloiloga o lenei mataupu.

 

TAGI A LE MALO

 

O le masina o Iula o le tausaga nei na tuu atu ai lenei mataupu e suesueina e alii Leoleo Suesue Faapitoa o le Ofisa o le Loia Sili, i le mae’a ai lea ona amata mai e le Ofisa o Leoleo o le iloiloina o lenei mataupu, ona o tu’uaiga e faatatau i le faia o uiga mataga faasaga i se teineitiiti e 6 tausaga le matua.

 

I faamatalaga na maua e Leoleo Suesue a le Ofisa a le Loia Sili na taua ai, o lenei faaalavelave na tula’i mai i le afioaga i Vatia, ina ua aga’i atu le ua molia e ave mea’ai a pua’a (tulou) i le pa pua’a e tu latalata i le fale e i ai le teineitiiti na aafia, ma tula’i mai ai loa le faalavelave.

 

O ni isi o tagata na fesiligia e Leoleo Suesue e uiga i lenei mataupu e aofia ai le Tina o le teineitiiti na aafia atoa ai ma le teineitiiti na aafia, faapea ai fo’i ma nisi o le aiga sa latou molimauina ni isi o vaaiga e faatatau i lenei faalavelave.

 

Na faia se suega faapitoa i le tino o le alualutoto na aafia i le Falema’i, ina ia mautinoa lona tulaga saogalemu. I le taimi o lea suega faapitoa, na taua ai e se sui o le aiga o le teineitiiti na aafia, le faamatala uma lea e le teineitiiti na aafia o mea sa tutupu ina ua fesiligia o ia e le Tamaitai Foma’i na faia le suega.

 

Na taua e le Tina o le teineitiiti na aafia e faapea, o le va o le masina o Fepuari ma Aperila o le tausaga lenei na tula’i mai ai lenei mataupu, ona o le taimi lea na alu ai e momoli lana fanau e tuu i le fale o lona uso ona o le pisi i lana galuega.

 

O le faalavelave muamua na tula’i mai i tua o le fale o le uso o le Tina o le teineitiiti na aafia. Na taua e le teineitiiti na aafia i lona Tina e faapea, na alu atu Tapeni ma mea’ai e fafaga ai a latou pua’a i tua o le umukuka. Na valaau Tapeni i le teineitiiti na aafia e avatu se ipu vai. Na usita’i le teineitiiti na alu ua ave le ipu vai mo Tapeni.

 

Na taua e le teineitiiti i Leoleo e faapea, ina ua tuu atu le ipu vai ia Tapeni, na fai atu Tapeni ia te ia e tago e valu lona papatua. Ao valu e le teineitiiti le papatua a le ua molia, na faafuase’i ona tagofia e le ua molia itutinosa o le teineitiiti na aafia. Na fai Tapeni i le teneitiiti na aafia e aua ne’i tautala fua i se tasi e uiga i le mea sa ia faia ia te ia, afai fo’i na te ta’uina i se tasi, na te fasia o ia.

 

E to’atele isi molimau na fesiligia e Leoleo Suesue e uiga i lenei mataupu, na latou faamaonia ai le faamatalaga a le teineitiiti na aafia, i le masani a Tapeni e alu atu ma mea’ai a pua’a. A mae’a, ona valaau lea i tamaiti e avatu se ipu vai mo ia.

 

Na taua e se tasi o molimau i Leoleo Suesue e faapea, i le afiafi po o le aso 22 o Aperila o le tausaga nei, na alu atu ai Tapeni i le latou fale ma faatoese atu e tusa ai o ni gaioiga mataga sa ia faia i le alualutoto na aafia. 

 

A o tootuli Tapeni i totonu o le fale o le aiga ma faatoese, na taua e le molimau i Leoleo Suesue le savali atu o lona afafine ma po le gutu o Tapeni, ma fai i ai pe aisea ua ia faia ai lenei gaioiga mataga i lenei alualutoto e na o le 6 tausaga le matua.

 

Na taua e le iei molimau i Leoleo Suesue e faapea, na faamatala atu e lona nephew e 13 tausaga le matua lona vaaia o Tapeni ma le alualutoto na aafia o loo nonofo mai i lalo o le mago i tua o le umukuka. Na vaaia e le molimau ni gaioiga e ese ma le mataga sa faia e Tapeni i le teineitiiti na aafia, o lea na ia tamo’e ai loa ma ta’u i lona aunty.