Ads by Google Ads by Google

Molia se Tama i lona faia o uiga mataga i lona niece


[ata: SN]
ausage@samoanew.com

Pago Pago - AMERIKA SAMOA

 

Ua taofia nei i le Toese i Tafuna se Tama mai Tafeta ona o tu’uaiga i lona faia lea o uiga mataga i lona niece e 16 tausaga le matua.

 

Talu ai puipuiga i lalo o le tulafono, o le a le mafai ai e le Samoa News ona faalauiloa le suafa o le ali’i ua molia i lenei mataupu.

 

O le masina na te’a nei na tula’i ai le ua molia i luma o le Fa’amasinoga Faaitumalo. Ua molia lenei alii i le moliaga e tasi o lona faia o gaioiga faafeusuaiga ma se tamaitai e talavou i lalo o le tulafono, o le vaega B lea o solitulafono mamafa, lea e mafai ona faasala ai se tasi i le Toese mai le 5 e oo atu i le 15 tausaga, faapea ai ma le moliaga o le feusua’i ma se tamaitai e aiga i ai, o le vaega D lea o solitulafono mamafa, lea e mafai ona faasala ai o ia i le Toese mo le umi e le silia i le 5 tausaga, pe faasala i le salatupe e le silia i le $5,000, pe faasala foi i faasalaga uma ia e lua.

 

E $15,000 le vaega tupe lea ua fa’atulaga e totogi ona faatoa mafai lea ona tatala le ua molia i tua. 

 

Afai ae tatala o ia i tua, e le mafai ona ia toe taumafai e faafesootai le tamaitai na aafia i lenei mataupu i soo se auala, poo se tasi fo’i o lona aiga. E le mafai fo’i ona ia tuua le atunuu i soo se auala, pe na te toe soli foi se tulafono, a ia avea o ia ma tagatanuu lelei e tausi i tulafono uma a le malo, ma auai i soo se taimi e valaau ai lana mataupu.

 

O lenei mataupu na tofu atu i le Ofisa o Leoleo i Tafuna, ina ua talosagaina e se tagata faigaluega a le Matagaluega o Tautua ma Auaunaga Lautele e galue i le Vaega mo Puipuiga o Fanau laiti se fesoasoani a Leoleo, faasaga i se tamaitai e 15 tausaga le matua o loo i lalo o le latou vaavaaiga o loo masalomia na faia i ai ni uiga mataga.

 

Na maua le avanoa o Leoleo e fesiligia ai le tamaitai na aafia e uiga i lenei mataupu, ma ia malie ai loa e faasoa ona lagona e tusa ai o le mea na tula’i mai. 

 

I suesuega a Leoleo na maua ai e faapea, na muamua aafia le tamaitai talavou lenei i amioga faa feusuaiga i Malaeimi i le nofoaga sa onfo ai i lona aunty, ma mafua ai loa ona sola ese ae aga’i atu i lona uncle i Tafeta mo se mapusaga. Peita’i o iina i le taimi na taunuu ai i lona uncle na alia’e mai ai uiga mataga e pei ona molia ai lona uncle i le tulafono, ma mafua ai loa ona tofu atu i lenei mataupu i le Ofisa o Leoleo.

 

Na taua e le tamaitai na aafia i Leoleo Suesue e faapea, o le masina o Fepuari o le tausaga nei na tula’i mai ai le faalavelave muamua lava ia te ia i Malaeimi ina ua aga’i atu i le aoga i le taeao o le aso lea, ae alu ane se ali’i talavou ma tauanau o ia la te o i lona fale la te talanoa ai. O loo taua i totonu o le tagi a le malo le igoa o le ali’i lea, lea e faapuupuu ia V.L

 

Na faateia le tamaitai na aafia ina ua savali atu i le auala e alu e faatali lana pasi e alu ai i le aoga, ae oso faalava ane le ali’i o V.L ma tauanau o ia la te o. Na musu ma fai ia V.L e le mafai ona la o leaga o ia lea e tuli tuli lana aoga, peita’i sa tauanau malosi pea o ia e V.L ma sosoo ai lava ma le toso faamalosi e le ali’i lea o lona lima ma tata’i o ia i le auala ‘alo e ui atu i tua o le faleoloa Asia i Tafeta lea e latalata ane i le fale a lona aunty sa nofo ai, ma la aga’i atu ai loa i totonu o se faletuufua, ma ta’ita’i atu ai loa o ia i le foga fale i luga.

 

O totonu o le fale lea e pei ona taua e le tamaitai na aafia ma faia ai loa e V.L uiga mataga ia te ia seia oo lava i lona faamalosi o ia, peita’i sa tete’e malosi i ai ma taumafai e una’i ese ia V.L, peita’i ua fai lava si malosi o le alii lea ma faigata ai ia te ia ona saili se fesoasoani mo ia.

 

Ina ua mae’a ona faamalosi e V.L le tamaitai na aafia, na ia tuua ai loa o ia i le fale tuufua ae aga’i atu i luma o le alatele ma faatalitali mai ai. Na fo’i le tamaitai na aafia ma faatali lana pasi ma alu loa i le aoga. Ao i ai i le faleaoga i lea aso, sa lagona lona le mautonu, e le gata o le niniva o lona ulu ae sa ia manatu fo’i e tatau ona malolo lelei i le fale.

 

Na amata mai ai lava i le aso lea ona taumafai le ali’i o V.L e tulituli le tamaitai na aafia i le faia i ai o uiga mataga. O le tuana’i ai o aso e 2 talu ona tupu le faalavelave lea, ae vaaia ai e le tamaitai na aafia le susuga a V.L ua aga’i atu i le latou fale ma tafao ai, e foliga mai o loo ia taumafai lava i se auala e toe faatino ai se isi amioga mataga ia te ia.

 

O iina na tonu ai loa i le manatu o le tamaitai na aafia, e le toe malu puipuia lona saogalemu i le fale a lona grandmother i Nuuuli, ae sili ai loa le sola i Sa’ilele i le fale a lona grandfather e nofo ai. 

 

O le vaiaso muamua lava o le masina o Oketopa na te’a nei na taunuu ai le tamaitai na aafia i le fale a lona uncle i Tafeta ma faamautu ai loa. I le po o le aso 10 o le masina o Oketopa na te’a nei, na alu ai le tamaitai na aafia i le Lotu afiafi, ina ua mae’a le sauniga, sa vili i lona uncle mo se avanoa e piki ai o ia mai le Falesa.

 

O le taeao na sosoo ai, na o ai le tamaitai na aafia ma lona uncle e momoli le toalua a lona uncle i le Falema’i i Faga’alu e faamama lona toto. I le taimi na la toe fo’i ai i le fale, na talanoa atu ai loa lona grandfather (le ua molia) i le tamaitai na aafia e aua ne’i manatu e avatu sana uo tama i le fale, pe taumafai fo’i e pipi’i ma talanoa i lona tausoga tama o lo o i ai i le fale.

 

O le taeao na sosoo ai, le aso 11 o Oketopa, na alu ai le tamaitai na aafia i le fale o lana uo tama ma tafao ao. Mulimuli ane ona la o lea ma lana uo tama i le latou fale e eva ai, ae na avea ma itu na ita tele ai le ua molia ma ia otegia le tamaitai na aafia i le mafua’aga ua avatu ai fua lea tagata i le fale.

 

O le vaveao na sosoo ai na toe o ai loa le ua molia ma le tamaitai na aafia e momoli le uo tama a le tamaitai na aafia i le maketi. Ina ua la toe fo’i i le fale, na vaaia ai loa e le tamaitai na aafia suiga i uiga ma amioga a le ua molia na fa’aali atu ia te ia.

 

I le vaveao na sosoo ai, o le aso 12 lea o Oketopa, na alu ai loa le ua molia e momoli lona to’alua i le Falema’i i Fagaalu e faamama lona toto. E lei alu ma ave le tamaitai na aafia, ae sa moe ai pea lava le tamaitai na aafia. Ina ua toe fo’i mai le ua molia i le fale, o iina na tula’i mai ai loa le faalavelave e pei ona molia ai o ia e le malo.

 

Na taua e le tamaitai na afia i Leoleo le faateia o ia ina ua tago atu se tagata i lona tino ma lona itutinosa. Na ala a’e i luga ma iloa ai, o lona grandfather. Na fiu e tete’e ese le ua molia ae sa ia faamalosia lava o ia seia oo taunuu le faamoemoega sa i le manatu o le ua molia.

 

O le ita tele o le tamaitai na aafia i le faalavelave na tula’i mai, na mafua ai loa ona sola ese mai le fale o lona grandfather ae alu ma nofo i le fale o lana uo. Sa ia taua i Leoleo lona fefe tele i lona grandfather na mafua ai ona sola ese ma le manatu e nofo i le fale o lana uo. 

 

Sa ia taumafai e faafesoota’i lona Tina o loo taofia i le Toese i Tafuna, faapea ai lona uso matua ma nisi o lona aiga, peita’i o le faafitali o loo i ai, e leai lava se isi o lona aiga e talitonu ia te ia.

 

E le o taua i le tagi a le malo pe i ai se taimi e faila ai ni moliaga faasaga i le susuga a V.L e tusa ai o gaioiga mataga sa ia faia faasaga i le tamaitai na a’afia.