Pago Pago - AMERIKA SAMOA

O le taeao o Fepuari 6 2025 na fa’afeso’ota’i ai e se faatau oloa ia le Ofisa a Leoleo i Fagatogo, e ripotia ai se tamaitai e suafa ia Pepe Talo, i lona gaoia o ni apa susu pauta a pepe e 13 (Similac) mai i le latou faleoloa i Leloaloa, ona ia toe fa’asaga lea ma toe fa’atau atu i isi.

O le tau o le apa pauta e tasi, e $27.99 ma o le tau atoa o apa e 13 na gaoia, e pe a ma le $363.87.

Ina ua taunu’u leoleo i le nofoaga na tupu ai le faalavelave sa o latou feiloai ma le pule o le faleoloa ma ia aveina leoleo i totonu i le vaega o le faleoloa na tupu ai le faalavelave.

Sa faatalanoaina e leoleo ia se tasi o fa’atau oloa ma sa ia faamatalaina i leoleo le alu atu o se tamaitai i le faleoloa i le taeao lena, ma se ato lanu uliuli ma na tu’u lana ato i totonu o le taavale toso a le faleoloa.  Ma o iina na oso ai lona masalosalo i lenei tamaitai.

Na ta’ua e le fa’atau oloa, lo latou mata’iina o le tamaitai a’o fail ana faatauga.  Ma ina ua o’o mai i luma o le kesia (cashier), sa ia tago i le tu’u isi oloa na i totonu o le ta’avale toso, i luma o le kesia ae tu’u le ato uliuli i tua o le fata.  Ina ua mae’a ona totogi lana fa’atauga sa i luma o le kesia, na ia a’apa atu loa ma toe tu’u lana ato uliuli i totonu o le taavale fai faatau a le faleoloa.

Ma na savali atu iai le kesia ma fesiligia le tamaitai e tusa ai ma lana ato, ae tali le tamaitai, o lana faatau mai i seisi faleoloa.  Ae na fa’aauau ona fa’atonuina e le kesia ia le tamaitai, ina ia tatala lana ato uliuli ma na maua ai ia apa Similac.  Sa fa’aauau ona faapea atu le tamaitai, e le o ni apa Similac mai i le faleloa, ma ia taumafai e ulufafo atu ma le faleoloa.

Ae ina ua tu’ua e le tamaitai ia le faleoloa, na toe siaki e le aufaigaluega a le faleoloa ia a latou masini pu’e ata ma fa’amaonia ai, o Similac na gaoia e le tamaitai mai i le latou faleoloa.

Na fa’ailoa atu e le aufaigaluega a le faleoloa i leoleo, e na o le pau lava le tulaga e latou te iloa e uiga i lenei tamaitai, o lona igoa, o lana galuega ma le fale e nofo ai.

Ina ua mae’a ona su’esu’eina e leoleo a le ata vitio lea na tu’uina atu e le aufaigaluega a le faleoloa, mai i la latou masini pu’e ata, na o latou aga’i atu loa i le fale faigaluega a le tamaitai, i le Starkist ma sa mafai ona fa’amaonia, o lo’o galue le tamaitai.  Ma lokaina mai ai loa o ia ma aveina atu i le ofisa a leoleo mo le fa’aauauina o su’esu’ega.

O moliaga na faia e faasaga ia Talo, na aofia ai le moliga o le Gaoi, o se vaega ‘C’ i solitulafono mamafa, lea e mafai ona nofosala ai i le falepuipui, i le le sili atu ma le fitu tausaga; po o se sala tupe e i le va o le $5,000 ma le $20,000; po o faasalaga uma e lua.

E $5,000 se vaegatupe na fa’atulagaina e tatalaina ai le na molia, e faatalitali ai lona faamasinoga.