Ads by Google Ads by Google

Molia se Tina talavou i lona sauaina o lana tama e 7 tausaga


[ata: SN]
ausage@samoanews.com

E 28 tausaga o se Tina na pu’e faapagota e Leoleo i le 3 vaiaso talu ai ma o lo o taofia nei i le Toese i Tafuna, ona o tu’uaiga i lona faia lea o ni sau’aga faasaga i lana tama teine e 7 tausaga le matua, e ala i lona fa’aaoga o se seevae pa’u e sasa ai lona tino.

 

O le tofu atu ai o lenei mataupu i le Ofisa o Leoleo i Tafuna, e mafua mai ina ua talosagaina e le Tama o le aiga se suesuega faapitoa faasaga i le ua molia, na mafua ai loa ona suesueina e Leoleo i lenei mataupu ma i’u ina molia ai lenei Tina.

 

(Talu ai puipuiga i le ono mafai lea ona iloa fanau laiti o loo aafia i ituaiga mataupu faapenei e aofia ai sauaga i totonu o aiga, o le a le mafai ai e le Samoa News ona faailoa suafa o i latou uma o loo aafia i lenei mataupu.)

 

E pei ona taua e le malo i le latou tagi e fa’apea, o le aso 23 o Me, 2020 na aga’i atu ai se Tama ma sona afafine i le Ofisa o Leoleo i Tafuna mo le talosagaina o se suesuega faasaga i se mataupu o loo aafia ai lona afafine.

 

O i latou na aga’i atu i le Ofisa o Leoleo e aofia ai le teineititi na aafia faapea ai ma lona Tama. Na atagia i le suesueina o lenei mataupu, e foliga mai ua nonofo valavala le ulugalii ma le la fanau. Ae o le maliliega sa sainia e le ulugali’i ma le Ofisa e gafa ma le tausiaina o fanau, na faia ai le fuafuaga ina ia tuu tamaiti i lalo o le vaavaaiga a le Tina (le ua molia) i aso o le vaiaso, ae a oo loa i le faaiuga o le vaiaso, ona alu atu loa lea o le Tama o le aiga e piki mai tamaiti latou te mafuta mo le faaiuga o le vaiaso, ona toe momoli ai fo’i lea i lo latou Tina.

 

I le aso Faraile, aso 22 o Me, 2020, na aga’i atu ai le Tama e piki mai lana fanau, peita’i na musu le ua molia e faamatu’u mai tamaiti e o ma lo latou Tama. Na taua e le Tama i Leoleo, e le masani ona tupu lea tulaga, ae ua avea le musu o le ua molia ma itu na tau oso ai lona masalosalo poo i ai se mea o tupu i lana fanau. Na fai le ua molia i lona toalua e toe alu atu i le faaiuga o le vaiaso o lo o lumana’i e piki mai tamaiti. 

 

E le i talia e le Tama lea faaiuga. I le aso na sosoo ai, Aso Toonai, Me 23 na toe alu ai loa le Tama i le fale a lona to’alua mo le pikiina mai o lana fanau. O le taimi lea, na malie ai loa le ua molia e faamatu’u atu lana fanau e o ma lo latou Tama mo le faaiuga o le vaiaso, ona toe momoli atu ai lea o i latou.

 

Na taua e le Tama i Leoleo e faapea, ina ua latou taunuu i lona fale, sa ia faia loa tulaga e pei ona masani ai, o le faataeele o si ana fanau a o le i sauni e fafaga i latou. Ae o se itu na faateia ai o ia ina ua ia faataele lona afafine e 7 tausaga le matua, ae tau ai i unaoa ma manu’a i vaega uma o lona tino.

 

Sa ia fesili i lona afafine pe aisa ua leaga ai lona tino, ae na tali o ia, na sasa o ia e lona Tina i le sese i lona le usita’i. 

 

Na maua le avanoa e fesiligia ai e Leoleo le alualu toto na aafia e tusa ai o lenei mataupu, a o molimauina e lona Tama. Na taua e le alualu toto na aafia i Leoleo e fa’apea, na faatonu e lona Tina o ia e alu e aumai le uaea e fafaga ai le ma’a o le telefoni, peita’i ua mua ona pisi e eva ma nai ona tei ae galo ai le uaea na faatonu ai o ia e lona Tina.

 

Na te’i i le isi taimi ina ua valaau atu lona Tina ia te ia poo fea le uaea na faatonu o ia e aumai. Na ita lona Tina ma sasa ai loa o ia i le seevae pa’u ma leaga uma ai lona tino.

 

Na talosagaina e Leoleo le vaega a le EMS mo se togafitiga faasaga i le alualu toto na aafia, ma auina atu ai loa o ia i le Falema’i i Fagaalu mo togafitiga faapitoa, ma toe te’a ai i tua i lona Tama. Na logo fo’i e Leoleo sui o le Ofisa e gafa ma le vaaia o fanau laiti ina ia latou silafia e tulaga uma e uiga i lenei mataupu. 

 

O le mae’a ai ona fesiligia e Leoleo o le Tama ma lona afafine e tusa ai o lenei mataupu, na talosagaina ai loa e le malo se poloaiga mai le Fa’amasinoga e pu’e faapagota ai le ua molia ona o le mataupu e pei ona tu’uaia ai o ia.

 

O le afiafi o le aso Toona’i lava lea, aso 23 o Me na aga’i atu ai loa Leoleo i le fale a le ua molia ma faataunuu loa le poloaiga a le Fa’amasinoga e pu’e faapagota ai o ia, ona o tu’uaiga i lona faia o sauaga faasaga i lana tama. 

E le i mana’o le ua molia e tuuina atu sana faamatalaga i Leoleo e uiga i le mataupu e pei ona tu’uaia ai o ia, ae sa ia manatu e talanoa i lana Loia ma faasoa i ai lana faamatalaga e uiga i le mea sa tula’i mai.

 

O le 2 vaiaso talu ai ona tula’i ai le Tina o loo molia i luma o le Faamasinoga Faaitumalo, i le mae’a ai lea ona pu’e faapagota o ia e Leoleo, i lalo o se poloaiga mai le Fa’amasinoga.

 

Ua molia e le malo lenei Tina i le moliaga o le faia lea o sauaga faasaga i lana tama e 7 tausaga le matua, e ala i lona faaaoga o se seevae e sasa ai lona tino ma i’u ina tula’i mai ai manu’a tuga ia te ia, o le vaega D lea o slitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma ia e lua.

 

E $5,000 le tupe lea ua faatulaga e tatala ai i tua le ua molia.

 

Ina ua faatoa tula’i lenei Tina i luma o le Fa’amasinoga, sa ia talosagaina ai lona naunau e faataunuu lana ulua’i iloiloga ma le malo. 

 

E to’atasi le molimau a le malo na valaau i le taimi o le ulua’i iloilo, o le tama’ita’i leoleo Satini ia Sgt. Deevon Mata’u, o ia fo’i lea na autu i ai le suesueina o lenei mataupu. 

 

I lana molimau i luma o le Fa’amasinoga, na faamanino ai e le Tamaitai Leoleo Satini manu’a na aafia ai le tino o le alualu toto na mafatia i lenei mataupu, ina ua sasa e lona Tina lona tino i le seeva’e.

 

E ui e le o ni manu’a e ono lamatia ai lona ola, peita’i o ni manu’a na matua ogaoga lava le matuia, ma ono mafai ai ona aafia le mafaufau o lenei alualu toto mai sauaga sa faia e le ua molia ia te ia.

 

O se tasi o itu na fesiligia e le loia a le ua molia, susuga Bob Stuart, o lona fia iloa lea mai le molimau pe fia na ta na sasa ai e le ua molia lana tama. Na tali le molimau, na te le i fesiligia le alualu toto na aafia pe fia ni ta na tau i lona tino, ae i lona vaavaai atu i unaoa ma vaega na aafia o le tino e pei o le papatua, o lima ma ogavae o le alualu toto na aafia, na atagia mai ai le tele o ta na sasa ai e le ua molia lana tama.