E 69 tausaga le matua o se Tama mai le afioaga o Faleniu na pu’e faapagota e Leoleo i le vaiaso na te’a nei, ona o tu’uaiga i lona faia lea o uiga mataga i lona niece e 11 tausaga le matua.

O lenei mataupu na ripotia muamua lava i se sui o le Matagaluega o Tautua ma Auaunaga Lautele a le malo (DHSS), faatoa logoina ai loa lea o le Ofisa o Leoleo mo suesuega atili e fa’atatau i lenei mataupu.

E tusa ai ma le fa’amatalaga a le Tina o le teineititi na a’afia sa tuuina atu i Leoleo, o le ua molia, o lona uncle. Latou te nonofo fo’i i le fale e tasi, o le fale lava fo’i lea na tula’i mai ai le fa’alavelave e pei ona aafia ai lana tama teine.

[Talu ai puipuiga i le ono mafai lea ona silafia le tama’ita’i o lo o aafia i lenei mataupu, e le mafai ai e le Samoa News ona faalauiloa igoa o i latou o lo o a’afia i lenei mataupu e aofia ai ma le igoa o le ua molia]

O le vaiaso na te’a nei na tula’i ai le ua molia i luma o le  Fa’amasinoga Faaitumalo mo lana ulua’i iloiloga.

E 6 moliaga mamafa ua tu’uaia ai e le malo le ua molia. Ma e aofia ai le moliaga e tasi o le faia o sauaga mataga i fanau e i lalo o le 12 tausaga le matutua, o le vaega A lea o solitulafono mamafa, lea e mafai ona faasala ai se tasi i le mo le umi e mafai ona oo atu i le 30 tausaga; tasi le moliaga o le faia o amioga faa Sotoma; tasi le moliaga o le fai’aiga faamalosi ma se teineititi e i lalo o le 12 tausaga le matua, o le vaega B o solitulafono mamafa, lea e mafai ona faasala ai se tasi i le toese mai le 5 e oo atu i le 15 tausaga le matua; 2 moliaga o le faiaiga ma se tamaitai e aiga i ai, ma le moliaga e tasi o le tagofia o itutinosa o se tamaitai talavou, o le vaega D lea o solitulafono mamafa, lea e mafai ona faasala ai se tasi i le toese mo le umi e mafai ona oo atu i le 5 tausaga.

E $55,000 le tupe lea ua fa’atulaga e le afioga i le ali’i Faamasino ia Elvis P. Patea e totogi ona faatoa mafai lea ona tatala le ua molia i tua.

Na teena e le ua molia tu’uaiga fa’asaga ia te ia ina ua tula’i i luma o le Fa’amasinoga Maualuga i le taeao ananafi. O le masina o Aperila lea ua fa’atulaga ai lana ulua’i iloiloga i luma o le afioga i le Fa’amasino Sili ia Michael Kruse.

TAGI A LE MALO

E pei ona taua e le malo i le latou tagi, o le Tina o le teineititi na a’afia na ia logoina le DHSS mo lenei mataupu. Na oo atu le sui o lea Ofisa ma talanoa ma le Tina ma lana tama teine na aafia, atoa ai ma le tuagane o le tama’ita’i na aafia, faapea ai ma le ua molia.

O le mae’a ai o lea talanoaga, na logoina ai loa le Ofisa o Leoleo i Tafuna ma fesiligia ai loa e Leoleo sui o le aiga e tusa ai o lenei fa’alavelave.

Na taua e le tuagane o le teineitiiti na a’afia e 15 tausaga le matua i Leoleo e fa’apea, ua leva ona ia masalosalo o lo o i ai se mea o lo o tupu i le va o le ua molia ma lona tuafafine. E mafua lea tulaga, ona sa i ai le aso na ia vaaia ai le ua molia ma lona tuafafine, o loo talatalanoa gugu e le lagona ni leo i totonu o le potu malolo o le latou fale.

I se taimi la o le vaiaso lona 3 o Ianuari, na taotooto ai loa le tuagane o le teineitiiti na a’afia i totonu o le potu malolo ma faafoliga o lo o moe, peita’i o lo o ia taumafai e vaai ma tulimata’i gaioiga a lona tuafafine ma le ua molia e faia i totonu o le fale.

I le aso 20 o Ianuari, ao taotooto le tuagane o le teineititi na aafia i totonu o le potu malolo, na ia vaaia ai le savali atu o le ua molia ma fai i lona tuafafine (teineititi na aafia) e alu atu i totonu o lona potu. Na usita’i le teineititi na aafia ma savali i totonu o le potu. I sina taimi mulimuli ane ai, na toe sau ai loa le teineititi i fafo o le potu a le ua molia. O le taimi fo’i lea na logoina ai loa e le alii lea lona Tina e tusa ai o le vaaiga sa ia vaaia.

Na fesiligia e Leoleo Suesue le teineititi na aafia ao i ai lona Tina, ma faamaonia ai e le teineititi le molimau a lona tuagane sa tuuina atu i Leoleo.

Na taua e le teineititi e fa’apea, e fa’alua ona faia e le ua molia uiga mataga ia te ia, e ala i lona ave o ia i totonu o lona potu moe ma faamalosi ai o ia la te faiaiga, e ui sa ia tete’e malosi i ai.

O le ulua’i faalavelave lava na tula’i mai i le aso 3 o Ianuari 2020, le aso tonu lea na faamanatu ai le aso fanau a le ua molia. Na taua e le teineititi na aafia e fa’apea, o le aso lea na ia vaaia ai le ua molia o lo o inu ana fagupia ma fiafia solo.

I se taimi o lea aso ao taele le teineitiiti i le paipa, na faafuase’i ona tatala atu e le ua molia le faitoto’a lea e fesoota’i ai lona potu ma le fale taele, ma ulufale faamalosi atu i loa i totonu o le fale taele, ae o le taimi lea o lo o tu ai le teineititi i totonu o le fale taele e leai ni ona lavalava o faia.

Na fai le ua molia i le teineititi na aafia la te o i totonu o le potu e fai ai ni la mea leaga, peita’i sa musu le teineititi. E le i faatali le ua molia, ae ua aapa atu ma toso mai le lima o le teineitiiti na ta’ita’i faamalosi o ia i totonu o lona potu, ma ia faia ai loa uiga mataga ia te ia.

O le tuana’i ai o nai aso talu mai le ulua’i faalavelave, ae tula’i mai loa le faalavelave lona lua, ina ua ulufale faamalosi fo’i le ua molia i totonu o le fale taele ao taele le teineititi na a’afia, ma ia tauanau o ia la te o i totonu o lona potu e fai ai ni la mea leaga. Na musu le teineititi peitai na taitai faamalosi e le ua molia i totonu o lona potu ma ia faamalosia ai loa o ia i gaioiga faafeusuaiga.

Ina ua mae’a ona faia e le ua molia nei gaioiga, sa ia tuu le $2 i le lima o le teineitiiti ma ia tuli ese ma lona potu, ae moe.

Ina ua fesiligia e Leoleo le ua molia, na ia ioeina ai lona ulufale faamalosi i totonu o le fale taele ao tu ai le teineititi e leai ni ona lavalava, atoa ai ma lona aveina o le teineititi i totonu o lona potu, peita’i, sa ia teena tuuaiga e faapea na la faiaiga ma le teineititi.

Na taua e le ua molia e fa’apea, la te lei faiaiga ma le teineititi na aafia, ae sa la taaalo i luga o lona moega e aunoa ma ni lavalava. Na ioe atili le ua molia i Leoleo, e fa’alua ona ia aveina le teineititi na a’afia i totonu o lona potu.

Ina ua fesiligia e Leoleo le ua molia i le mafua’aga na ia faia ai nei amioga mataga, sa ia tu’uaia ai le tiapolo, o ia lea na faaosooso ia te ia i le ulua’i taimi na tula’i mai ai lenei fa’alavelave, na te faia nei uiga mataga.