Pago Pago - AMERIKA SAMOA

Ua molia e le malo se tamaitai i tu’uaiga o lona tatuina o ni tagata se toalua - o se isi tamaitai ma se teineitiiti talavou e 12 tausaga le matua - ona o lipotia ia tala salatua. 

E tusa ai ma le tagi fa’asolitulafono a le malo, e lua moliaga o le fa’ao’olima i le tulaga lua o lo o tu’uaia ai Makerita Tavae, atoa ai ma moliaga e lua o le fa’ao’olima i le tulaga tolu.

Na taofia Tavae i le toese i Tafuna, e ala i se poloaiga a le Fa’amasinoga e pu’e fa’apagota ai ma le $10,000 lea ua fa’atulaga e le Fa’amasinoga Fa’aitumalo e tatala ai i tua. 

I le lua vaiaso talu ai na tula’i ai le ua molia i luma o le Fa’amasinoga Fa’aitumalo ma lana ulua’i iloiloga. O lo’o fa’aauau pea lenei mataupu i luma o le Fa’amasinoga.

O lo’o taua i tagi a le malo, o i laua o i laua na aafia i lenei mataupu o se tamaitai ma lana tama teine e 12 tausaga le matua.

O pepa o le tagi a le malo i le fa’amasinoga, o lo’o fa’ailoa ai e fa’apea o le o le faalavelave na tulai mai i le masina na te’a nei ina ua fa’afesootai e le ua molia le tamaitai na aafia ona o lipoti e faapea o loo latou faasalalauina tala le lelei e uiga i le tina o Tavae.

E tusa ai ma le fa’amatalaga a le ua molia, sa ia fa’afesootaia le tamaitai ua aafia i luga o le telefoni ma palauvale ai le tamaitai ia te ia ma fai mai o loo agai atu i le fale o le ua molia.

O lo o tuuaia o le taimi lava na faalogo ai le ua molia o tu’itu’i le faitoto’a, “na ia vaaia ai se naifi i luga o le kapoti ma tago atu ai.”

I pepa tagi a le malo, o lo’o taua ai e fa’apea, na tatala e le ua molia le faitoto’a ma amata ona tatu’i le tagata muamua na a’afia (le tamaitai na aafia) i lona lima ma a’o alu i tua le tagata muamua na a’afia, na amata ai loa ona ia tatu’i le tagata lona lua - le teine itiiti 12 tausaga le matua.

Na taua atili e le ua molia e fa’apea, na te le’i iloaina o lo o i ai le teineititi e 12 tausaga i totonu o le fale.

Sa fa’ailoa e le teineititi i Leoleo lona fa’ateia ina ua latou taunu’u atu i le fale, ae fa’afeiloa’i i latou e le ua molia i le faitoto’a ma se agaese, futi lona lauulu ma tatu’i tua o lona ulu.

E tusa ai ma le tagi a le malo, na maua ai e le teineititi e 12

tausaga ni manu’a se tolu i le pito i tua o lona ulu, e aofia ai se inisi le lautele o le manu’a i tua o lona taliga, atoa ai ma le manu’a e tolu na su’i ai. O le isi manu'a na manaomia ai ni su'i se lua. Na manu’a le fafine lea na mana’omia ai ni su’i e valu.