Pago Pago - AMERIKA SAMOA

E tusa ai ma fa’amaumauga a le malo, i se fa’alavelave na tula’i mai i le aso 4 o Aukuso, 2024, na molimau ai le fanau (8 ma le 9 tausaga) sa o la vaai i le sauaina e lo la tama ia le si o la tina.

Na faamatala e le tamaititi 9 tausaga le poloka e lona tama o le faitoto’a, a’o taumafai le tina e sulufa’i mo se fesoasoani.

Ae i le molimau a le teineititi 8 tausaga, sa ia ta’ua ai lona lagonaina o le misa a ona matua, ma le palauvale leotele a lona tama.  Ma na ia va’aia foi le tu’i ina e lona tama o foliga o lona tina ma ina ua le mafai e lona tina ona sulufa’i i fafo mo se fesoasoani, sa ia (teineititi) tamo’e loa i lona ‘uncle’ lea e nofo i le fale tuaoi, mo se fesoasoani.

O lenei fa’alavelave sa ripotia e le tina na a’afia, i le Ofisa a Leoleo i Tafuna ia Aukuso 4, 2024 ma na aga’i mai loa iai leoleo i le fale o le aiga i Mesepa, ae ua sola le tamaloa.

(O le a le lomia e le Samoa News suafa o i latou na a’afia ma le ua molia, aua le puipuiga o fanau iti.)

O lo’o ta’ua i totonu o fa’amaumauga a le malo, le taumafai o leoleo e tau saili le ua molia, ae peitai, sa le’i faamanuiaina a latou taumafaiga.

Ae na faamatalaina ifo iai e le tina na a’afia a’o faia se la galuega ma lona to’alua i le aoauli o lea aso, ae talosaga se tasi o a la tuaoi, mo se fesoasoani ina ia tatalaina le faitoto’a o le potu o le fale a le tuaoi.  Ae peitai, sa le’i mafai e le tina ona fesoasoani ona o lo’o tumu ona lima i ni lavalava.  Ae ina ua fesiligia le tina e le ua molia, pe mafai ona alu e fesoasoani i le latou tuaoi, sa tali atu iai le tina na a’afia, e mafai lava ona tatala e le tuaoi lana faitoto’a.

I se taimi mulimuli ane, a’o la iai i totonu o le la potu moe, sa ta’ua e le tina na a’afia le amata ona palauvale atu lona to’alua ma na savali mai lona to’alua i fafo ma le potu ae fa’aauau pea ona palauvale.  O iina na ia fai atu ai i lona to’alua (le ua molia), o le a ia valaauina leoleo.

Ae na ta’ua e le tina na a’afia le toe savali atu o lona to’alua i totonu o le potu ma tu’i o ia, ma se’i lana telefoni ina ia aua ai ne’i ona valaau i leoleo.  Ae o le taimi lea, o lo’o iai le la fanau e to’alua.

Sa faamatalaina foi e le tina na a’afia, lona taumafai e sulufa’i atu i fafo mo se fesoasoani, ae peitai, na poloka e lona to’alua le faitoto’a ma fa’asa sa o ia ona valaau i leoleo po o seisi, mo se fesoasoani.

O le lagona mai e tuaoi o le pa’o na o mai ai e su’esu’e le mafua’aga, ma o iina na tu’ua ai loa e le ua molia, ia le fale.  Ae fa’aaogaina e le tina ia le telefoni a lona tuaoi e valaau ai leoleo.

E le o ta’ua i totonu o fa’amaumauga a le malo ia le taimi na maua ai e leoleo ia le ua molia.

Ae ua tu’ua’ia nei o ia i ni moliaga e tolu, e aofia ai le Fa’ao’olima i lona tulaga e tolu (Sauaga i totonu o aiga) ma le Loka sese o se tagata (Sauaga i totonu o aiga) – o ni moliaga i le vaega ‘A’ o solitulafono mama, e mafai ona fa’afalepuipui ai se tasi i le o’o atu i le tausaga e tasi (1), po o se sala tupe e $1,000; po o faasalaga uma e lua, i le moliaga e tasi.

Ma le moliaga lona tolu, o le Faatupu Vevesi i Nofoaga Faitele – o se vaega ‘B’ o solitulafono mama, e mafai ona fa’afalepuipui ai se tasi i le o’o atu i le ono masina, po o se sala tupe e $500; po o fa’asalaga uma e lua.