Ads by Google Ads by Google

Momoli mai le Faife’au a le Lifeline AOG & Fa’apa’ia Ai El Paso:


[ata: foa'i]

El Paso - TEXAS

O le aso To’ona’i na te’a nei, Novema 4, 2023 na faataunuu ai le momoliga o le Faife’au Taulagi a le Lifeline AOG El Paso ma lona Faletua, ma na faataunuu ai fo’i ma le laua fa’apa’iaga ina ia aloa’ia ai i la’ua o Fa’afeagaiga taulagi fa’anofonuu i El Paso.

O i la’ua nei o Pr. Jerry Leroy Tua ma le Faletua o Pr. Toliu Anoni Mageo Tua.

O le susuga i le Fa’afeagaiga o se alo lea e fa’asino i le susuga Rev. Mativa Tua mai le aiga o Sa Tuamasaga mai Fagasa ma si ona tina o Peleiupu Sagale Tua mai Aunuu, ua faiilagi le folauga a le tina o le aiga.

Na soifua a’e le susuga i le fa’afeagaiga i Long Beach Kalefonia ma sa a’oa’oina ma faau’u mai ai ana a’oa’oga mai le aoga maualuga a Long Beach Poly.

O le tina o le galuega, le faletua ia Pr. Toliu Anoni Mageo Tua, o se alo e fa’asino ia Pita ma Leilani Leasau, ua maliliu uma ona matua, ona tausia lelei lea o ia e nai ona matua matutua o Tafesilafa’i ma Laulatana Mageo o le Aiga Sa Mageo mai Pago Pago.

Peita’i o ona aiga e aofia ai le Aiga Sa Lutu mai Fagatogo, Aiga Sa Fiaui mai Auto ma le Aiga Sa Leasau mai Manu’a.

I le la’ua nei tofiga ua amatalia ona galulue ai, ua la’ua fa’aalia ai lo la’ua agaga fa’afetai i le Atua i le avanoa ua la’ua maua, e fa’atino ai le auaunaga e ala i le tausia, fa’afailele ma aputiputi le Ekalesia ina ia lauolaola, le ekalesia fou lenei a le Lifeline AOG i El Paso.

Na amata mai ona aoaoina o Pr Jerry Tua i lona fa’atasi ma avea ma totino o le o le Ekalesia a le United Samoan Church i Vista, Oceanside. Na fiafia o ia e ta le tamepelau ma fesoasoani e usu viiga o le Atua i le aufaipese a le Ekalesia AOG Samoa i Vista, i le ta’ita’iga a Rev. Tafesilafa’i Mageo, ma sa avea foi o ia ma se ta’ita’i o le Royal Rangers mo tama talavou i lea Ekalesia.

Na soso’o ma le gafatia e ia ona avea ma A’oa’o ia Ianuari 2020 ma avea ai ma ta’ita’i o le Autalavou atoa a le latou Ekalesia i Vista Oceanside mo le 2 tausaga atoa e oo mai ia Fepuari 2023.

Na maua lona Tusi pasa fa’afaife’au mai le Global University ia Aperila 2023, ma ua maa’a fo’i ont tapena lona aves ai ma Faife’au Laisene mo levei fa’amoemoe maualuga.

Ina ua fesiligia le susuga le Fa’afeagaiga i sona tanfi e tusa ai o lending vala’auina e galulue tumau ai I le Lifeline AOG i El Paso, sa ia fa’aailoa mai, “Ou te lagona o lo’u avanoa lea sa tulituliaupu mai le amataga o le fa’amoemoe ina ia avea ma Faife’au o le Upu a le Atua. E ui ina ua vave ona ou maua le avanoa lea, ae ou te iloa o le finagalo lea o le Atua mo i ma’ua, a’o talavou ma maua le malosi. O se fa’aeaga sili mai le Atua, o le avanoa ua toina mai. O le a taumafai fo’i le mea sili, ua tima’ia i ma’ua i lenei fa’aiuga o le vaiaso i upu lelei a ta’ita’i o le Ekalesia Aoao ae maise o le vasega o Fa’afeagaiga o matua fa’aleagaga, ae maise o le pa’ia o Aiga, e ao lava ina ma’ua fa’asili le Atua i mea uma. E ao ina fa’asili lo ma’ua tofiga mai le galuega a le Atua, ma galulue punoua’i i ai ina ia tupu ma olaola le Ekalesia. A tausia lelei le aiga o le Atua, ose sao sili lava lea ua mafai ona ma’ua faia i lo ma vala’auina ai.”

O le faletua, ma o le tina o le galuega, ua mae’a ausia fo’i e ia le tofi Faife’au, ma ua agava’a fo’i o ia e tausoa le la’ua galuega faifa’atasi mo le Ekalesia i Lifeline El Paso. 

E ui ina sa fanau o ia Oceanside, ae sa ola a’e ma tausia o ia i Masefau, Amerika Samoa a’o laititi mai lona soifuaga. O le tausaga 1993 a’o i ai i Amerika Samoa, sa tautua ai i le Ekalesia lava lea ma taita’i ai i le Autalavou ma pese fo’i i le aufaipese a le latou ekalesia.

Na aotauina o ia i le Vanguard University ma fa’ai’uina ai lona tusi pasi Fa’afaife’au mai le Global University i le tausaga e 2022.

I lea vaitau sa galue ai o ia o se tasi e fesoasoani ia Pastor Pita Leasau Jr. i Vista, Oceanside Kalefonia ma avea o ia o se tasi po ta’ita’i mo e tapua’i i sauniga fai i le latou ekalesia.  Ina ua avea fo’i Pr. Tafesilafa’i Mageo ma le Faletua ma ta’ita’i o lea lava Ekalesia, sa avea Pr. Toliu Anoni ma taitai ma faia’oga o le Aoga Aso Sa.  Ona soso’o mai lea ma le nofoa’iga lenei a Pr. David Mamea ma ua tofia ai i la’ua ma Pr. Jerry Tua la te fa’atuina ma tausia le ekalesia i Lifeline El Paso.

O lona uiga o le Ekalesia ua fanau mai ai le Lifeline El Paso, o le Ekalesia First Assembly of God lea i Vista Oceanside i Kalefonia.

Ina o tau afuafua le Lifeline i El Paso sa tu’u o mai Faife’au e malaga mai ta’avale tai 10 itula e o mai ina ia fa’atautaia sauniga mo le fa’amoemoe e fa’amautu se nofoaga mo se lala fou.  Na amata faia lea taumafaiga a’o le’i sofa’i mai le atunuu e le fa’ama’i tele o le Covid-19.  Peitai na toe taofia le taumafaiga ina ua oo mai le covid-19 ma ona a’afiaga i le soifua o le mamalu lautele.

Sa nofo tatalo pea lava le Ekalesia i Vista Oceanside ina ia mautu le lala lea, ma ua toe fa’aauau mai le fa’amoemoe i le tausaga 2021. O i latou e to’afa na malaga mai e fa’atula’ia se nofoaga ia mautu i El Paso, sa aofia ai Pr. Jerry Tua,  Pr. Toliu Tua, Pr Liu Chan, Noa Laga mai le ekaesia i Vista Oceanside, lea o lo’o ta’ita’i e Pr. David Mamea.

O le masina o Novema 2022, ua mafai ona fa’apa’ia le nofoaga ua mautu ai nei le Lifeline AOG El Paso,  ma ua tuu savali mai pea fa’afeagaiga mo le tau fa’amaopoopoina o ni sui totino e loto tetele e galulue i lea fo’i lala.

Ia Novema 04 & 05, 2023, ua fa’amautu atili ai loa le momoli aloaia mai o le susuga Pr. Jerry ma Pr. Toliu Anoni Tua e la te tausia le Lifeline AOG i El Paso. O le aotelega o matafale ta’itasi poo aiga lotu ua mae’a lisia i le Lifeline i lea fo’i aso patino, e to’a 16 Aiga.

O le fa’amoemoe fo’i na masi’i mai ai le pa’ia o Aiga i ona itu tetele ma ona itu taulagi, ae feagai i latou ma le Ekalesia fou o le Lifeline AOG El Paso ma le Ekalesia fa’amalumalu i Vista Oceanside i le osiga feafaiga ma le pa’ia o Aiga.

O le taeao o le aso To’ona’i na feiloa’i ai le pa’ia o aiga ma le Ekalesia ma sa taita’ia le vasega o Aiga e le susuga Pr. Ieti Mageo mo Aiga na lua, lea fo’i sa masi’i mai ai ma Pr Samasoni Sagale mo le pa’ia o Aiga na lua.

O le itu a le Ekalesia sa sasao ma ai le susuga Pr David Mamea ma le Faletua ma o lea aso lea ua fa’amauina ai, o le a molita’i Pr Jerry ma Pr Toliu Tua e galulue tumau i le lala o le First AOG i Ele Paso, Texas.

I ai fa’aaloaloga na faliu i ai itu na lua o le feiloa’iga, peita’i sa manino lava Ietoga tetele mo le fa’amauina o le Feagaiga Osia a le pa’ia o Aiga ma le Ekalesia, ae a lava auauna taulagi galulue i El Paso. 

Ua fa’amauina lea Ietoga tele o le feagaiga e tausia e le Ekalesia a le Lifeline El Paso, Texas.

Ina ua mae’a le feiloa’iga taua, ona fa’aauau lea i le sauniga mamalu o le fa’apa’iaga o tofi faife’au tausi ekalesia mo Pr Jerry ma Pr Toliu Tua, ma sa faia lava i le malumalu tele i le nofoaga lava ua fa’amautu i ai lea Ekalesia a le Lifeline i El Paso.

O le ta’ita’i na vala’au e tapua’i mo le fa’amoemoe sa tula’i ai le susuga le Faife’au Pr Samasoni Sagale. O le Fa’afeagaiga sa osia le taulaga e ala i le tatalo sa fofogaina lea e Pr Iopu Sepetaio. O le osia o le taulaga ma talia taulaga sa aoina na tu’ua lea ia Pr Samasoni Sagale.

O le lauga o le Upu a le Atua ma le fa’amoemoe o Pr Jerry Tua ma le faletua, sa fofogaina lea e Pe David Mamea, le tama o le Ekalesia na toina mai ai le galuega fou a le Lifeline AOG i El Paso.

“O le fa’atautoga ma le faapa’iaina o Pr Jerrry Tua ma Pr. Toliu Anoni Tua mo le laua tofi faife’au tausi Ekalesia i le Lifeline AOG i El Paso, sa ta’ita’ia lea e Pr Albert Fruean.

Ina ua fa’apa’iaina le susuga le Faife’au Tausi Ekalesia ma le Faletua, sa toto’o uma i ai a’ao o Faife’au uma sa aofia i lea sauniga mamalu mai le paia o aiga, ae maise o sui mamalu mai le Matagaluega ma le Pulega a le First Assembly of God, i le Pascific North East, lea e aofia ai Kalefonia ma Texas.

O le aiga tele o le taligamalo ma toe fa’aaloaloga mai le pa’ia o aiga, sa fa’ato’a faia lea i le maea ai o le sauniga mamalu o le faapa’iaga o Faife’au galulue mo le Lifeline El Paso, ma sa faia lea i le 5Star Manor, 8300 Gateway Boulevard, #400 El Paso, Texas 79907 ma sa tatala faitoto’a mo lea fa’amoemoe tele i le itula e 1:00 i le aoauli.

O se avanoa sa maua ma le tina o le galuega, Pr Toliu Anoni Mageo Tua, sa ia fa’ailoa mai ai, “O se avanoa lelei lea ua ou maua, aua sa tulitulimatagau le fa’amoemoe e fia mulimulita’i i tulaga a’ao o nai matua matutua sa latou tausia, a’oa’o ma fa’afailele mai le olaga, se’ia oo mai i lenei taimi.”

“Ua toina mo a’u lenei avanoa lelei, ma o se ma’ua loto fo’i lea ma le susuga le Fa’afeagaiga Pr Jerry Tua, ia toe fa’afo’i lava le fa’afetai i le Atua, aua ua maua so ma avanoa e faia ai le galuega, i le malosi o i ai, e tali atu ai le agalelei o le Atua ma lana ta’ita’iga mai o le olaga. Mai lava le amataga ona taumafai mai i le tofi, o lea ua to’ai taunuu i le taunuuga sa momo’o i ai le loto ma le fa’amoemoe, o se avanoa ia mafai ai ona faia le galuega mo le Atua. O le galuega fo’i lenei, o le galuega a le Atua le Tama, ua sauni mo lu’iga, ma ni ona taimi fo’i o le manuia!”