Pago Pago - AMERIKA SAMOA

Ua faasala i le Toese i Tafuna le ali’i lea na ta’usala i lona fasi faamo’amo’a o lana pa’aga, ina ua tula’i i luma o le Fa’amasinoga Maualuga i le vaiaso na te’a nei mo le lauina o lana faasalaga. 

A mae’a ona tuli lona faasalaga i le Toese i Tafuna, ua poloaina o ia e le Fa’amasinoga na te tuua le teritori ae toe fo’i atu i Samoa ma aumau ai mo le umi o lana nofovaavaaia e 7 tausaga. 

Afai ae toe taumafai i soo se auala e ulufale faasolitulafono mai i le teritori, e le gata e faatonu o ia e tuli faamae’a le umi o lana faasalaga faanofovaavaaia o loo totoe, ae toe molia fo’i o ia i isi solitulafono fou o le a faila mai e le malo faasaga ia te ia, i lona taumafai lea e ulufale faamalosi mai i le teritori.

A mae’a ona ia tuliina uma ia faasalaga, ona toe poloaina fo’i lea o ia e le Faamasinoga e tuua le atunu’u ma toe fo’i atu i Samoa ma aumau ai mo le umi o le a manatu le Faamasinoga e faanofovaavaaia ai o ia.

O le susuga a Taulafo Faletolu, lea sa taofia pea i le toese i Tafuna ina ua taofia o ia e Leoleo i le silia i le tausaga ua mavae, ina ua le mafai ona ia totogi le tupe e $35,000 sa fa’atulaga e tatala ai o ia i tua, na tula’i i luma o le Fa’amasinoga Maualuga i le vaiaso na te’a nei mo le tuuina atu o lana faaiuga mai le Faamasinoga.

E 3 tagi eseese na faila e le malo faasaga i le na molia.

I le tagi muamua, na molia ai o ia i le moliaga o le faiaiga faamalosi ma se tama’ita’i, taofia faapagota o se tagata i se auala fa’asolitulafono, faapea ai ma le fa’aoolima i le tulaga tolu. 

I le tali lona lua, na tu’uaia ai o ia i lona fa’aaoga fa’asolitulafono o se a’upega, taofia faapagota o se tagata i se auala faasolitulafono, faapea ai ma moliaga e 2 o le fa’aoolima i le tulaga tolu. 

Ma le tagi lona tolu, na tu’uaia ai o ia i le moliaga mamafa e tasi o le sola ese mai le toese ao taofia ai o ia faapea ai ma le moliaga e tasi o le umia faasolitulafono o vaega o le pauta faasaina o le aisa.

Ae i lalo o le maliliega na sainia e le ua molia ma le malo, lea fo’i na talia e le fa’amasinoga maualuga i le masina o Oketopa na te’a nei, na tali ioe ai le ua molia i moliaga mamafa e 3 e aofia ai lona tagofia o itutinosa o se tama’ita’i i se auala fa’amalosi, o le moliaga o lona fa’aaoga fa’asolitulafono o se a’upega mata’utia, faapea ai ma le moliaga o lona umia faasolitulafono o vaega o le pauta faasaina o le aisa, o ni solitulafono mamafa uma o le vaega D, lea e mafai ona faasala ai se tasi i le Toese mo le umi e le silia i le 5 tausaga, pe faasala foi i le salatupe e le silia i le $5,000, poo le faasala foi i faasalaga uma ia e 2.

I le tali ioe ai o le alii ua nofosala i moliaga e pei ona ta’usala ai o ia, sa ia ta’utino ai e fa’apea, i se taimi o le aso 12 o Iulai, 2021 i Amerika Samoa, sa ia una’i ai le tama’ita’i na a’afia aga’i i le faitoto’a o le fale, ma ia tagofia ai ona itutinosa i se auala e fa’amalie ai lagona tu’inanau sa ia te ia, e aunoa ma le malie i ai o lea tamaitai. 

I le tuana’i ai o aaso e 2 talu ona tula’i mai le faalavelave na ia una’i ai le tamaitai aga’i i le faitoto’a o le fale, na ia taofia faamalosi ai le tamaitai na a’afia e aunoa ma lona loto i ai, sa ia tagofia ona itutinosa atoa ai ma lona fa’amalosia o ia la te feusua’i.

I le aso na pu’e faapagota ai o ia e Leoleo, na maua ai e Leoleo se straw ua uma ona ta tipi tulimanu o lo o i ai vaega o le pauta faasaina o le aisa.

I le isi fa’alavelave, na ta’utino ai le ua molia i lona fa’aaoga fa’asolitulafono o se aupega mata’utia, e ala i lona tu’u i luma o foliga o le tama’ita’i na a’afia ina ia fa’afefe ai o ia. Na taua atili e le ua molia e fa’apea, o lana gaioiga sa faia na mafua mai i se taugaupu i le va o ia ma le tama’ita’i na a’afia.

Na faatoese le ua molia e tusa ai ma lana solitulafono, ma ia talosagaina ai se isi avanoa mo ia e fo’i atu ai i tua i lona aiga, atoa ai ma le fa’aauau pea lea ona galue i lana galuega ua silia i le 10 tausaga o galue ai.

Na taua e le ali’i loia fautua a le alii ua nofosala le salamo moni o le ali’i ua molia e tusa ai o lana solitulafono sa faia, ma ua ia lagona fo’i le leaga o le mea sa ia faia. 

Na talosaga le ali’i loia fautua i le fa’amasinoga mo se fa’asalaga fa’anofovaavaaia, ina ia mafai ai ona toe fo’i atu le ua molia i lona aiga i Samoa. Sa ia talosagaina fo’i le fa’amasinoga ina ia poloaina Taitiga e toe fo’i atu i lona aiga i Samoa, ona o tulaga fa’aletonu i ona pepa nofomau.

Na faailoa e le loia fautua a le ua molia i le fa’amasinoga e fa’apea, ua aoaoina e le ua molia se lesona taua mai le fa’alavelave ua ta’usala ai o ia, atoa ai ma le umi lea na taofia ai o ia i le toese, ma ua lava lea e fai ma suiga lelei i lona olaga. Sa ia talosagaina fo’i le fa’amasinoga ina ia aua ne’i toe i ai se isi fa’asalaga fa’a falepuipui e tuli e le ua molia, a ia fa’aaoga masina na taofia ai o ia talu mai le tausaga na te’a nei e avea ma ana fa’asalaga i lenei mataupu.

Na lagolagoina e le loia a le malo le talosaga a le itu tete’e mo se fa’asalaga fa’anofovaavaaia, atoa ai ma le poloaina e toe fa’afo’i atu ai o ia i Samoa. Na taua atili e le loia a le malo i le fa’amasinoga e fa’apea, e talitonu le malo, ua talafeagai fo’i le fa’aaoga o masina na taofia ai le ua molia i le falepuipui, e fai ma ana fa’asalaga i lenei mataupu. 

Na taua e le Faamasinoga e faapea, na ta’usala e le fa’amasinoga le ua molia i ni solitulafono e pito sili ona ogaoga ma mamafa, o ni solitulafono sa ia fa’atino fa’asaga i se tama’ita’i sa avea ma ana paaga mo le tele o tausaga. E to’a 4 le fanau a le ua molia ma le tamaitai na aafia, e ui e le i faaipoipo faaletulafono i laua.

“E matuia le gaioiga sa e faia i le tama’ita’i na a’afia,” o le saunoaga lea a le Faamasinoga i le alii ua nofosala nei, lea sa nofo i tafatafa o lana loia ma punou i lalo i le taimi atoa na lau ai lana fa’asalaga.

“Ua manatu le fa’amasinoga, o lau talosaga ina ia poloaina oe e tuua le teritori ae toe fo’i atu i Samoa, o se gaioiga ua e faia ma le fuafua lelei ina ia e sola ese ai mai le fa’atinoina o ou tiute fa’a Tama, e ala i le tausia o lana fanau na maua mai i le tama’ita’i na a’afia i lenei mataupu.”

Na faamanatu e le Faamasinoga i le ali’i ua molia tiute tauave o le Tama mo lana fanau, e aofia ai le tatau lea ona ia tausi ma fafaga ia tei latou. Ae o lana gaioiga ina ia toe fa’afo’i o ia i Samoa, ua atagia mai ai lona le manatu e fa’ataunu’u ona tiute fa’a Tama i lana fanau.

Na taua fo’i e le Faamasinoga i le ali’i ua molia le i ai o aafiaga o lana gaioiga sa faia, ae o lana gaioiga ina ia poloaina o ia e toe fo’i i Samoa, ua atagia mai ai lona naunau e sola ese mai nei mau aafiaga. E le i faailoa e le Faamasinoga i le ali’i ua mola poo a ia aafiaga.

Mo le solitulafono o le umia o vaega o fualaau faasaina o le aisa, e 5 tausaga ua manatu le Faamasinoga e faasala ai le ua molia. Ua manatu le Faamasinoga e faaagafua le tuliina o le 7 tausaga i le Toese, ae o le a nofovaavaaia ai le ua molia mo le umi e 7 tausaga i lalo o tuutuuga e ao ona ia usita’i i ai.

O ia tuutuuga e aofia ai lona tuliina o masina e 28 i le toese i Tafuna, a mae’a, ona poloaina loa lea o ia e tuua le teritori ma aumau ai i fafo atu mo le umi e 5 tausaga o lana nofovaavaaia.

O ia tuutuuga e aofia ai lona tuliina o masina e 28 i le toese i Tafuna, a mae’a, ona ia tuua lea o le teritori ae aumau ai i fafo atu mo le umi o lana fa’anofovaavaaia e 7 tausaga.

Mo le moliaga o le taofia faapagota o se tagata i se auala faasolitulafono,e 7 tausaga ua faasala ai le ua molia i le Toese i Tafuna. Ua manatu le Faamasinoga e faamalumalu le tuliina o lea faasalaga, ae nofovaavaaia le ua molia mo le 7 tausaga i lalo o tuutuuga e ao ona ia usita’i i ai. O ia tuutuuga e aofia ai lona tuliina o masina e 28 i le Toese.

O ia fa’asalaga uma o le a tuli fa’atasi, lona uiga, e na o le 28 lava masina o le a tuli e le ua molia i le toese i Tafuna, o se tasi lea o tuutuuga o lana nofovaavaaia e 7 tausaga. O le a faitau ai masina e 16 lea ua maea ona tuli e le ua molia talu mai le taimi na taofia ai o ia i le Toese.

O le mae’a ai ona ia tuliina o ia faasalaga, ua poloaina le alii ua nofosala na te tuua le atunuu ma aumau ai i fafo atu mo le umi o lana faanofovaavaaia.