Pago Pago - AMERIKA SAMOA

E 20 masina lea ua faatonu e le Faamasinoga le ali’i e 51 tausaga mai Tafuna e nofosala ai i le Toese, ina ua faamaonia le moliaga o le umia faasolitulafono o vaega o le fualaau faasaina o le aisa.

O le faasalaga faa falepuipui e pei ona tuu atu e le Faamasinoga ia Filemoni Alatau, o se tasi lea o tuutuuga o lana faasalaga nofovaavaaia e 5 tausaga.

O le vaiaso na te’a nei na tula’i ai i luma o le Faamasinoga le susuga a Alatau mo le lauina o lana fa’asalaga, i le mae’a ai lea ona ta’usala o ia i le solitulafono e pei ona ia ioeina i lalo o se maliliega aufaatasi na sainia ma le malo i le masina o Ianuari o le tausaga nei, lea fo’i na talia e le Fa’amasinoga. 

O le tamaitai loia sili lagolago ia Kristine Soule’ na tula’i mo le itu a le malo, ae o le ali’i loia fautua lagolago ia Rya Anderson na tula’i mo Alatau lea sa taofia i le Toese talu mai le aso na loka ai o ia e Leoleo, ina ua le mafai ona ia totogi le tupe e $5,000 sa fa’atulaga e le Fa’amasinoga Fa’aitumalo e tatala ai o ia i tua.

Na ulua’i tu’uaia e le malo ia Alatau i le moliaga mamafa o lona umia fa’asolitulafono o vaega o le pauta fa’asaina o le aisa, lea e mafai ona fa’asala ai se tasi i le toese mo le umi e le itiiti ifo i le 5 tausaga ae le sili atui le 10 tausaga, poo le fa’asala fo’i i le salatupe e le itiiti ifo i le $5,000 ae le sili atu i le $20,000, poo le fa’asala fo’i i fa’asalaga uma ia e lua.

Ae i lalo o le maliliega na sainia e le malo ma Alatau, lea fo’i na talia e le Fa’amasinoga Maualuga, na malie ai le malo latou te toe faia se teuteuga i le moliaga na ulua’i faia fa’asaga ia Alatau, ina ia faailoa ai le moliaga feololo o le umia fa’asolitulafono o vaega o le pauta faasaina o le aisa, o se solitulafono e mafai ona fa’asala ai se tasi i le toese mo le umi e le sili atu i le 5 tausaga, pe faasala i le salatupe e le sili atu i le $5,000, poo le faasala fo’i i fa’asalaga uma ia e lua.

I le tali ioe ai o Alatau i le moliaga e pei ona toe teuteu e le malo, sa ia ta’utino ai e fa’apea, i le aso 20 o Setema o le tausaga e 2020, na maua ai e Leoleo ia te ia se paipa tioata o lo o i ai vaega o le pauta fa’asaina o le aisa ina ua taofi e Leoleo lana ta’avale.

Na taua e le malo i le maliliega ma Alatau e fa’apea, i le aso e pei ona taua, na taofi ai e Leoleo le ta’avale na malaga atu ai Alatau ma se tasi o ali’i. O Alatau sa nofo i le nofoa o le pasese, ae o le ave ta’avale, o ia lea o Tana Neru, lea o lo o molia fo’i o ia i le mataupu e pei ona molia ai Alatau.

Na taofi e Leoleo le ta’avale a le au ali’i e to’alua lenei ina ua le usitaia tulafono i luga o le alatele. A o taumafai Leoleo e fa’atalatalanoa le ave ta’avale, sa vaaia e le isi Leoleo le susuga a Alatau o lo o minoi solo ona lima ma tau aapa i le nofoa pito i tua, e foliga mai o lo o i ai se mea o loo ia taumafai e nana.

Ina ua sailia e Leoleo le tino o Alatau, sa maua ai i le taga o lona ofu sa faia le paipa tioata o lo o i ai vaega o le pauta fa’asaina o le aisa. Na faia se suega i vaega o le pauta na maua i totonu o le paipa ma faamaonia ai, o vaega ia o le pauta fa’asaina o le aisa.

Ina ua maua le avanoa o Alatau mai le Fa’amasinoga Maualuga, sa ia fa’atoese ai loa e tusa ai o lana solitulafono, ma ia talosagaina ai se isi avanoa mo ia se’i toe fo’i atu ai i lona aiga e fai sona aiga.

Na taua e le ua molia e fa’apea, o le umi e silia i le 15 masina lea na taofia ai o ia i le Toese i Tafuna e fa’atalitali ai se fa’aiuga o lana mataupu, ua ia a’oa’oina ai se lesona taua mo lona olaga, ma ua ia iloa ai, e le o se nofoaga lelei le Toese mo ia.

Na talosaga le loia fautua a Alatau, le susuga ia Anderson i le Fa’amasinoga mo se fa’asalaga faanofovaavaaia mo le ua molia, ma ia aofia ai le umi e 5 ma le afa masina lea ua mae’a ona ia tuliina e oo mai i le taimi nei.

Na taua e le Loia Fautua i le Fa’amasinoga e faapea, talu mai le taimi na tula’i mai ai lenei fa’alavelave, ua lagona e Alatau lona salamo moni e tusa ai o lana solitulafono sa faia, ma ua ia manatu fo’i na te le toe faia lenei solitulafono i le lumana’i.

Na faatepa e le loia fautua le Fa’amasinoga i le olaga sa soifua ai Alatau a o le i tula’i mai lenei faalavelave. O ia o se tagata tausi aiga ae le o se tagata e fiafia i le ituaiga olaga e pei ona aafia ai o ia i le tulafono i le taimi nei.

O le fa’alavelave e pei ona tula’i mai i le aso lea na taofia ai Alatau i le Toese, o se fa’alavelave na tula’i mai lava i le aso lea, e le o se ituaiga olaga lea e masani ai Alatau. Na talosaga le loia fautua i le Fa’amasinoga ina ia fa’asala le ua molia i se fa’asalaga faanofovaavaaia, ma ia avea le 5 ma le afa masina lea ua mae’a ona ia tuliina i le Toese i Tafuna, e fai ma ana fa’asalaga i lenei mataupu.

Na lagolagoina e le loia a le malo le talosagaa le loia fautua a le itu tete’e, ma ia talosaga ai fo’i i le Fa’asalaga ina ia fa’asala le ua molia i se fa’asalaga faanofovaavaaia. Na taua e le loia a lemalo e fa’apea, i le vaavaai atu ai i mau faamaonia o lenei mataupu, e agava’a Alatau i se fa’asalaga nofovaavaaia, e aofia ai ma le umi lea ua mae’a ona ia tuliina, ae aua ne’i toe tuuina atu se isi taimi faa falepuipui na te tuliina.

Na faailoa e le itu a le malo e fa’apea, e tatau ona auai Alatau i aoaoga faa faufautua ina ia fesoasoani ai i aafiaga o lona tagofia o fualaau fa’asaina.

Na taua e le  Faamasinoga e fa’apea, a fua atu i vaega o le fualaau fa’asaina sa maua ia Alatau, ua lava lea e ta’u mai ai, e laititi lava le vaega o le fualaau fa’asaina sa maua ia te ia. 

Ae ui fo’i i faafinauga a loia fai mai e laititi vaega o fualaau fa’asaina sa maua ia Alatau na faamanatu i ai e Sunia e fa’apea, o lo o manino le tulafono, tusa lava poo le a le tele o le fualaau fa’asaina e maua i se tagata, fai mai le tulafono na pasia e le Fono Faitulafono, e tatau ona fa’asala lea tagata i le toese mo le umi e le itiiti ifo i le 5 tausaga ae le sili atu i le 10 tausaga.

Saunoa atili le Faamasinoga e fa’apea, na faateia le Fa’amasinoga i le ripoti a le Ofisa Faanofovaavaaia, lea o lo o taua ai le i ai o se agava’a faapitoa ia Alatau, o ia lea o se inisinia faapitoa mo totoga ma afi o va’a tetele.

O lenei ituaiga agava’a e pei ona saunoa le Faamasinoga, e seasea maua i Amerika Samoa. O le maua ai e Alatau o lenei agava’a faapitoa, ua atagia mai ai le taua tele o le galuega e moomia ona ia faia.

Na faatonu e Sunia ia Alatau, e le tatau ona toe faia ana galuega inisinia o loo fai i tua i lona aiga, ma le aafia ai o ia i tagata e tulei ma umia fualaau fa’asaina, ae sili ona alu e saili sana galuega i tele o va’a o lo o taula solo i le taulaga, atonu o loo latou mana’omia le ituaiga tagata e i ai o ia.

“Manaia fo’i pe afai e te asiasi i le va’a lea e malaga soo i Manu’a, lea e fai ma leaga i le tele o taimi, atonu o lo o mana’omia e le au va’a lea le ituaiga tomai o loo ia te oe,” o le saunoaga lea a le Faamasinoga ia Alatau, e fa’atatau i le va’a o le Manu’atele lea e malaga i Manu’a.

O nisi o tuutuuga o le nofovaavaaia a Alatau mo le 5 tausaga, o lona tuliina lea o masina e 20 i le Toese i Tafuna, peita’i ua manatu le Fa’amasinoga, ua lava masina e 15 na te tuliina, e faitau ai le umi lea ua mae’a ona ia tuliina i le Toese ao faatalitali ai se faaiuga o lana mataupu.

O masina e 5 o lo o totoe ai i lea fa’asalaga, o le a fa’amalumalu lona tuliina, se’i vagana ua toe tuuina atu se isi poloaiga a le Fa’amasinoga. O le aso lava lea na faatonu ai loa e le Fa’amasinoga le malo ina ia tatala Alatau i tua mai le Toese i Tafuna.

Ua fautuaina fo’i o ia e totogi le salatupe e $2,000, auai i aoaoga e fesoasoani ai i le leaga o le ‘ava malosi ma fualaau fa’asaina, ma ia avea o ia ma tagata nu’u lelei e tausi i tulafono e aofia ai ma le fa’asa lea ona ia toe tagofia le ava malosi poo fualaau fa’asaina.