Ads by Google Ads by Google

Nofovaavaaia le alii mai Samoa na ta’usala i le umia o fualaau faasaina


[ata: SN]
ausage@samoanews.com

Pago Pago, AMERIKA SAMOA

 

E 5 tausaga lea ua nofovaavaaia ai le alii mai Samoa na molia i lona umia faasolitulafono o fualaau faasaina, ina ua faamaonia e le Fa’amasinoga Maualuga tu’uaiga faasaga ia te ia, o lona umia faasolitulafono o fualaau faasaina, faapea ai ma lona tuta atu o fualaau faasaina i ni alii talavou la te umia ma toe faatau atu i tagata lautele.

 

O se tasi o poloaiga a le Faamasinoga Maualuga sa tuuina atu i le susuga a Reupena Toleafoa ina ua tuuina atu le faaiuga a le Faamasinoga faasaga i lenei mataupu i le vaiaso na te’a nei, o le tuua lea e Toleafoa o le atunu’u ae toe fo’i atu i Samoa ma aumau ai mo le umi o loo totoe o lana nofovaavaaia e 5 tausaga. 

 

Na ulua’i tu’uaia Toleafoa i le moliaga o le umia faasolitulafono o vaega o le laau faasaina o le mariuana, atoa ai ma le moliaga o le umia faasolitulafono o mairuana ma le faamoemoe e tulei ma faatau atu i isi tagata. Ae i lalo o le maliliega na sainia e le ua molia ma le malo, lea fo’i na talia e le Faamasinoga Maualuga i le masina na te’a nei, na tali ioe ai le ua molia i le moliaga na toe teuteu e le malo, le solitulafono o le umia faasolitulafono o vaega o le laau faasaina o le mariuana.

 

I le tali ioe ai o le ua molia i le moliaga e pei ona ta’usala ai o ia e le Fa’amasinoga, na ia tali ioe ai e faapea, i se taimi o le aso 16 o Mati o le tausaga na te’a nei, 2020, na ia faasolitulafono ai vaega o le laau faasaina o le aisa. Sa ia ta’utino atili fo’i e faapea, i le aso 12 o Mati, na ia ave ai i ni ali’i talavou se to’alua se pepa iila na tumu i lau mariuana ma le faamoemoe la te tulei ma faatau atu i nisi tagata.

 

Ina ua maua lona avanoa mai le Fa’amasinoga, na faatoese ai loa lenei alii e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e tausi lona aiga ma fa’aaoga aso o loo totoe o lona olaga e auauna ai mo nai ona matua, aemaise le tausiga o lona to’alua ma lana fanau.

 

Na taua e le ua molia ma loimata lona salamo moni e tusa ai o lana solitulafono, ma ua ia aoaoina fo’i se lesona taua mo lona olaga ao i ai i totonu o le Toese. Na ia ta’utino i le Fa’amasinoga lona lagona o le sese o le faaiuga sa ia faia, ma ua ia manatu ai, afai ae toe maua se isi avanoa mo ia, o le a ia fa’aaoga tatau loa lea avanoa.

 

Na talosaga le loia na tula’i mo le alii ua molia i le Fa’amasinoga ina ia toe tuu se isi avanoa mo lenei alii e aumau ai pea i Amerika Samoa, ma fa’aauau pea ona faanofovaavaaia. Na taua e le Loia Fautua le salamo moni o le alii ua molia mai lana solitulafono, ma ua ia aoaoina fo’i se lesona aoga talu mai masina e 15 na taofia ai o ia e faatali ai se faaiuga o lana mataupu.

 

Na finau le Loia a le ua molia e faapea, e le mafai ona fofo le faafitauli o le tagofia e le ua molia o le faaaoga o fualaau faasaina pe afai e toe ave foi o ia i le Toese e tuu ai. Pau le auala e mafai ai ona foia lea faafitauli, o le tuu lea o se avanoa e auai o ia i aoaoga faa faufautua ina ia fesoasoani ai i le faafitauli o lona tagofia o le ‘ava malosi.

 

Na talosaga le Loia a le malo ina ia tuu se isi avanoa i le alii ua molia e toe timata ai lona olaga ma alu ese mai ai i le faafitauli o le tagofia lea o fualaau faasaina. 

 

Saunoa le Faamasinoga e fa’apea, ina ua tula’i mai le mataupu fou faasaga i le alii ua molia, na maua ai loa le avanoa o le Laulau a Faamasino latou te toe vaavaai ai i mau faamaonia o lenei mataupu sa tuuina atu i le taimi na lau ai le faasalaga ai e le Faamasinoga i le ulua’i taimi na molia ai o ia i le ituaiga solitulafono lava lea i le 2012.

 

Sa latou vaavaai fo’i i tuutuuga o le maliliega sa sainia e le ua molia ma le malo, faapea ai ma mau faamaonia o le tagi a le malo sa faila faasaga ia te ia. O nei faamaumauga uma, ua tula’i mai ai se popolega i le finagalo o le Fa’amasinoga, ona o nisi o mafua’aga talafeagai.

 

Na taua e le Faamasinoga e fa’apea, o le ua molia na pu’e faapagota e Leoleo ma tu’uaia i le faalavelave lea na ia tuuina atu ai ni se pepa iila o loo i ai lau mariuana i ni alii talavou se to’alua ma le fa’amoemoe e tulei ma faatau atu e alii talavou nei fualaau faasaina i nisi tagata.

 

Na faailoa e alii talavou nei i Leoleo ina ua fesiligia i laua, e le ose taimi muamua lea ua avatu ai e le ua molia fualaau faasaina ia te i laua. O le tele o taimi e avatu ai mariuana ua uma ona taai, ona la tulei lea ma faatau atu i isi tagata i le ta’i $5 i le sikaleti mariuana e tasi.

 

Na taua e le Fa’amasinoga, e ui i le matuia o tu’uaiga faasaga i le alii ua molia, ae na manatu le Faamasinoga e tuu le avanoa ia te ia i le taimi na lau ai lana faasalaga, ma le talitonuga o le a ia savali i le ala sa’o ma aga’i atu ai i se olaga suia. E tele avanoa na tuu atu e le Faamasinoga i lenei ali’i ae foliga mai e le salamo o ia.

 

Na faamalumalu e le Famaasinoga lona tuliina o le 5 tausaga i le Toese, ae na nofovaavaaia ai o ia mo le 5 tausaga. E 20 masina na manatu le Faamasinoga e loka ai o ia i le Toese, ae na manatu fo’i le Faamasinoga e taofi lona tuliina o lea umi, ae fa’aaoga le 6 masina lea na taofia ai o ia i le Toese e faatali ai le faaiuga o lana mataupu, e fai ma ana faasalaga. 

 

Ae mae’a ona tuli lona faasalaga faa falepuipui, ona ia tuua lea o le atunu’u ae toe fo’i atu i Samoa ma nofomau ai mo le umi o loo totoe o lana faasalaga faanofovaavaaia. O le taimi lava e tatala ai femalagaaiga a vaalele i le va o Samoa ma Amerika Samoa, o le taimi fo’i lea e tatau ai loa ona tuua e le ua molia le atunuu. O le a galulue faatasi le malo ma le Ofisa Nofovaavaaia mo le faatulagaina o pepa malaga e aofia ai ma le totogiina o le pasese. Ua faatonuina fo’i le sponsor a Salu ina ia galulue ma le Ofisa Nofovaavaaia mo le faatinoina o manaoga uma e tusa ai o lenei poloaiga.

 

O le tagi faasaga i le alii ua molia na tulai mai i le masina o Mati o le tauasga na te’a nei ina ua maua ni alii talavou se to’alua e ta’i 17 tausaga le matutua o loo la umia fualaau faasaina ina ua aga’i atu Leoleo e faato’a filemu se vevesi na tula’i mai i Malaeimi i le po o le aso 16 o Mati, 2020.

 

Na suesue e Leoleo alii aoga nei e to’alua ma faamaonia ai, o le sikaleti mariuana na la ulaina na avatu lea i le susuga a Toleafoa.

 

Ina ua fesiligia e Leoleo le alii ua molia e tusa ai o lenei mataupu, ma ia faamaonia ai lona tuuina atu o se pepa iila o loo tumu i lau mamago o le mariuana ma le faamoemoe e tulei ma faatau atu i nisi tagata. Na ta’utino le ua molia, sa ia maua mai se vaega tupe mai alii talavou nei e to’alua mai sikaleti mariuana na tulei ma faatau atu. 

 

Na ta’utino atili le ua molia, ina ua avatu e le au alii talavou le tupe ia te ia, na ia toe tuu loa i ai sikaleti mariuana e 2 e ta’itasi mo i  laua, o le totogi lea o le galuega sa la faia.