Ads by Google Ads by Google

Nofovaavaaia le ali’i na ta’usala i le umia faasolitulafono o fualaau faasaina


[ata: SN]
ausage@samoanews.com

Pago Pago, AMERIKA SAMOA

 

E 5 tausaga lea ua nofo vaavaaia ai e le Fa’amasinoga le ali’i e 43 tausaga le matua mai Fogagogo, ina ua faamaonia tu’uaiga o lona umia faasolitulafono o fualaau faasaina faasaga ia te ia i le masina na te’a nei.

 

I le taimi na tuuina atu ai le faaiuga a le Fa’amasinoga faasaga i le susuga a Apelu Valoia, na fautuaina ai e ali’i Fa’amasino le ua molia, e le tatau ona ia fa’aaogaina lona Tina ma’i e fai ma alofaga mo se isi avanoa mo ia, ae tatau lava ona ia taumafai e sufi le finagalo o le Fa’amasinoga, e mafai ona suia lona olaga pe afai ae tu’u atu se isi avanoa mo ia e aunoa ma se faasalaga faa falepuipui.

 

E pei ona manino i faamaumauga a le Ofisa Nofovaavaaia, e faatolu ona faamaonia moliaga faasaga ia Valoia i le Fa’amasinoga Faaitumalo, ao lei oo i le mataupu e pei ona taofia faapagota ai o ia i le aso 29 o Aperila, 2020, ina ua pu’e faapagota o ia i le faatupu vevesi i nofoaga faitele ae maua ai e Leoleo ma fualaau faasaina i lona tino.

 

Na ulua’i molia e le malo ia Valoia i le moliaga e tasi o le umia faasolitulafono o vaega o le pauta faasaina o le aisa, faapea ai ma le moliaga e tasi o lona umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 tausaga e oo atu i le 20 tausaga, pe faasala foi i le salatupe e mafai ona oo atu i le $20,000, atoa ai ma moliaga mama e pei o le faatupu vevesi i nofoaga faitele, faaoolima i le tulaga tolu, atoa ai ma le faaleaga meatotino i le tulaga tolu.

 

Ae i lalo o se maliliega na sainia e le ua molia ma le malo, lea fo’i na talia e le Fa’amasinoga Maualuga, na malie ai Valoia e tali ioe i le moliaga o le umia faasolitulafono o vaega o le pauta faasaina o le aisa. O isi moliaga na totoe ai i le tagi a le malo na solofua e le Fa’amasinoga Maualuga, ina ia faamalieina ai tuutuuga o le maliliega a itu e lua.

 

I le tali ioe ai o Valoia i le moliaga e pei ona ta’usala ai o ia e le Fa’amasinoga, na ia ta’utino ai e faapea, i le afiafi o le aso 29 o Aperila o le tausaga na te’a nei, 2020, na ia umia faasolitulafono ai ni pepa iila se 3 sa i ai vaega o le pauta faasaina o le aisa ina ua pu’e faapagota e Leoleo o ia e mafua mai i se vevesi na aafia ai o ia ma ni ali’i se to’atolu i se vaega o Tafuna.

 

Na faatoese le ua molia e tusa ai o lana solitulafono sa faia, maia talosagaina ai se isi avanoa mo ia se’i fo’i atu ai i tua e tausi lona Tina ma le Tama o lona Tama ua 91 tausaga le matua o loo latou nonofo faatasi.

 

E ui i le fautuaga a le Ofisa Faanofovaavaaia ina ia faasala le ua molia i se faasalaga faa falepuipui, e ese mai i le 13 masina lea na taofia ai o ia i le Toese ao faatalitali ai se faaiuga o lana mataupu, na talosaga le ua molia ina ia lava masina e 13 ua mae’a ona ia tuliina e fai ma ana faasalaga i lenei mataupu, ae tu’u atu se avanoa mo ia se’i toe faaleleia ai mea ua faaletonu i lona olaga, ma saili se isi moemoe fou mo ia i le lumana’i. 

 

E umi se taimi o faamatala le tala a le ua molia i le Fa’amasinoga e tusa ai o lana tautua i totonu o lona aiga. E 7 tausaga talu ona la nonofo ma lona to’alua, ae sola ese lona le fafine ma toe fai le isi ona to’alua, ae tuua ai na o ia i le aiga. E leai se la fanau. 

 

Ina ua maliu lona Tama i le 2016, sa ia ta’utino ai loa, o le a galue malosi e tausi lona Tina ma lona grandfather, ma fesoasoani i le tausiga o nai ona tei laiti aemaise le aiga atoa. E galue malosi i lana galuega o le inisinia e maua ai tupe e tausi ai lona aiga. 

 

Ae na amata ona faaletonu lona olaga ina ua amata ona mafuta atu i ana uo inupia, seia oo lava i le taimi na ia fa’aaogaina ai loa ma fualaau faasaina. O le tele o taimi, ua alu ai lona totogi i le fa’atauina mai o fualaau faasaina ina ia faamalie ai lona mana’o seia oo lava ina le mafai ona toe vaoia le aafia o lona mafaufau i fualaau faasaina. 

 

Na ta’utino le ua molia i le Fa’amasinoga, ua ia lagona lona sese ma ua salamo fo’i e tusa ai o lana solitulafono sa faia. Sa ia ta’utino e faapea, afai ae toe maua se isi avanoa mai le Fa’amasinoga, o le a faamaoni e auai i aoaoga faufautua e fesoasoani ai i aafiaga o le ‘ava malosi ma fualaau faasaina, 

 

Na fa’aaoga fo’i e le ua molia le avanoa na ia maua mai le Fa’amasinoga e faatoese ai i lona aiga aemaise lava si ona Tina e aafia i le gasegase o le stroke, faapea ai ma lona grandfather ina ia faamagalo sona sese i le latou mafutaga.

 

Na talosaga le ali’i Loia Fautua na tula’i mo le ua molia i le Fa’amasinoga ina ia faasala le ua molia i se faasalaga faanofovaavaaia, e aunoa ma le toe tu’uina atu i ai o se isi faasalaga faa falepuipui ia te ia. Na taua e le Loia Fautua le salamo moni o le ua molia mai lana solitulafono sa faia, ma ia ia aoaoina fo’i se lesona taua i lona olaga.

 

Na lagolago e le loia a le malo le talosaga a le itu tete’e mo se faasalaga faanofovaavaaia mo le ua molia. Na taua e le loia a le malo e faapea, e ui i isi moliaga na ta’usala ai le ua molia i le Fa’amasinoga Faaitumalo, e talitonu le malo ua salamo le ua molia ma ua ia aoaoina fo’i se lesona taua mai le faalavelave ua mafua ai ona taofia faapagota o ia i le Toese mo le 13 masina.

 

A o le i tuuina atu le faaiuga a le Fa’amasinoga faasaga i lenei mataupu, na faamanatu e le Faamasinoga i le ali’i ua molia e faapea, o lea ua taumafai e fa’aaoga lona Tina ma’i ma lona grandfather matua e auala atu ai lana talosaga mo se isi avanoa, ae afai e vaavaai i le talaaga o lona olaga ma solitulafono na ta’usala ai o ia e le Fa’amasinoga Faaitumalo, sa tuu avanoa atu lava le Faamasinoga ia te ia i taimi uma e talosaga atu ai mo se avanoa.

 

Na saunoa atili le Fa’amasinoga e faapea, “o lea ua e talosaga mai mo se isi avanoa, ae a vaavaai i le solitulafono ua ta’usalaina ai o ia, e fai lava si matuia o le gaioiga sa e faia.”

 

“O lau lava filifiliga ua mafua ai ona e aafia i fualaau faasaina, o lau lava fo’i filifiliga ua mafua ai ona e aafia i nei ituaiga solitulafono mamafa, ao lea ua e tagi mai mo se isi avanoa e te toe fo’i atu ai i tua i lona aiga e tausi lona Tina ma lona grandfather, ao lea sa maua le avanoa e te tausia ai i laua, ae na e filifili e fa’amalie muamua lou faafitauli o le fa’aaogaina lea o fualaau faasaina,” o le saunoaga lea a le Fa’amasinoga.

 

“E fia faailoa atu e le Fa’amasinoga ia te ia, e 10 tausaga e mafai ona faasala ai oe i le Toese i Tafuna pe a fuafua atu i solitulafono ua ta’usala ai o ia.”

 

Na fesili le Fa’amasinoga i le ali’i ua molia, poo le a sana tala pe afai ae toe aafia o ia i fualaau faasaina pe afai ae tuu atu e le Faamasinoga se isi avanoa ia te ia. 

 

Na umi se taimi o punou le ua molia i lalo e le gagana, faatoa ea mai ai i luga ma ta’utino i le Fa’amasinoga, o le a taumafai i le mea sili e gata ai lona malosi e usita’i ai i poloaiga a le Fa’amasinoga, na te le toe tagofia fo’i fualaau faasaina.

 

E 5 tausaga na manatu le Fa’amasinoga e faasala ai le ua molia i le Toese i Tafuna, peita’i ua faamalumalu le tuliina o lea faasalaga faa falepuipui, ae laa nofovaavaaia le ua molia mole 5 tausaga i lalo o tuutuuga e ao ona ia usita’i i ai.

 

E 20 masina na te tuliina i le Toese i Tafuna e faitau atu ai ma masina e 13 lea na taofia ai o ia i le Toese ao faatali ai se faaiuga o lana mataupu. E le tatau ona ia toe tagofia le ‘ava malosi poo fualaau faasaina, o le a faia fo’i ni suega i lona tino e siaki ai poo ia usitaia tuutuuga a le Faamasinoga.

 

Ua lapataia e le Fa’amasinoga le ua molia, o le taimi lava na te solia ai se poloaiga a le Fa’amasinoga, o le a le toe i ai loa se isi avanoa mo ia, ae poloaina loa o ia e tuli le taimi o loo totoe o lana nofovaavaaia e 5 tausaga.