Pago Pago - AMERIKA SAMOA

E 5 tausaga lea ua faanofovaavaaia ai e le Fa’amasinoga Maualuga ni ali’i se to’alua, ina ua ta’usala i laua i le solitulafono o le umia faasolitulafono lea o vaega o le pauta faasaina o le aisa. 

O lea solitulafono na alia’e mai ina ua taofi e Leoleo le ta’avale na malaga ai alii nei e to’alua i le masina o Setema o le tausaga na te’a nei i le soona alu saoasaoa i luga o le alatele, ae maua ai o loo umia faasolitulafono e i laua nei vaega o fualaau faasaina o le aisa.

O alii e to’alua ua ta’usala e le Fa’amasinoga e aofia ai Sekone Leota ma lona tausoga o Lemisio Sosaiete. O alii nei e nonofo i Amerika ae na malaga asiasi mai i o la aiga i Amerika Samoa nei i le tausaga na te’a nei ma le fa’amoemoe a mae’a le faamanatuina o le aso fanau o le la grandmother i se vaega o Tafuna, ona toe fo’i atu lea i Amerika i le nofoaga o loo aumau ai.

O le vaiaso na te’a nei na tutula’i ai i laua nei i luma o le Fa’amasinoga mo le lauina o le la faasalaga. 

Na ulua’i tu’uaia Leota ma Sosaiete i le moliaga mamafa o le umia faasolitulafono o vaega o le pauta faasaina o le aisa, o se solitulafono e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e le silia i le $20,000. 

Ae i lalo o se maliliega na sainia e le malo ma le au uso lenei, na malilie ai i laua e tali ioe i le solitulafono o le umia faasolitulafono o vaega o le pauta faasaina o le aisa, o le solitulafono mamafa e mafai ona faasala ai se tasi i le Toese e oo atui le 5 tausaga, pe faasala i le salatupe e mafai ona oo atu i le $5,000, pe faasala fo’i i faasalaga uma ia e lua.

I le tali ioe ai o Leota ma Sosaiete i le solitulafono ua ta’usala ai i laua, na la ta’utino ai e fa’apea, i se taimi o le aso 23 o Setema i le tausaga na te’a nei i Amerika Samoa, na la umia faasolitulafono ai vaega o le pauta faasaina o le aisa.

Na ioe Leota e faapea, ina ua sailia e Leoleo lona tino i le aso e pei ona taua, na latou maua ai se paipa tioata o loo i ai vaega o le pauta faasaina o le aisa, atoa ai ma se tama’i pepa iila laititi sa maua i le isi taga o lona ofu sa i ai foi vaega o le pauta faasaina o le aisa. 

Na tautino fo’i lona tausoga o Sosaiete i le Fa’amasinoga e fa’apea, ina ua sailia e Leoleo lona tino i le aso e pei ona taua, na latou maua ni tama’i pepa iila se 2 o lo o i ai vaega o le pauta faasaina o le aisa.

O fualaau faasaina na maua i le au alii lenei, sa la tautino i le Faamasinoga Maualuga e fa’apea, o mea sa faamoemoe e fa’aaoga mo i laua lava.

Talu mai le aso na pu’e faapagota ai e Leoleo ia Leota ma Sosaiete, na taofia ai pea i laua i le Toese i Tafuna e le i tatalaina i tua, ina ua le mafai ona la totogi le tupe e $5,000 a le tagata e to’atasi na faatulaga e tatala ai i laua i tua.

Ae ina ua mae’a ona talia e le Fa’amasinoga le maliliega na sainia e i laua nei ma le malo i le masina o Setema o le tausaga nei, na talosaga ai loa le loia fautua sa tula’i mo i laua nei i le Fa’amasinoga, mo se poloaiga e tatala ai i tua alii nei e to’alua e faatali ai le aso e lau ai le la faasalaga.

Na taua e le loia fautua i le Fa’amasinoga e faapea, o alii nei e to’alua, na malaga asiasi mai i le masina o Setema o le tausaga na te’a nei, ma le faamoemoe e toe taliu atu i Hawaii i le masina o Ianuari, peita’i, ua avea le faalavelave e pei ona molia ai i laua ua tuai ai ona toe fo’i atu i lo la aiga. 

Na talia e le Fa’amasinoga le talosaga a le itu tete’e, ma faia ai loa le poloaiga ina ia tatala le susuga a Leota ma Sosaiete i tua e aunoa ma se tupe la te totogiina, e faatali ai le aso e lau ai le la faasalaga i le vaiaso na te’a nei. 

Na fautuaina foi e le Faamasinoga i laua nei, e le tatau ona la toe tagofia fualaau faasaina, e tatau fo’i ona faia ni suega i o la tino e faamaonia ai, la te le o toe tagofie fualaau fa’asaina.

Ina ua maua le avanoa o alii nei e to’alua mai le Faamasinoga i le vaiaso na te’a nei, na la faatoese ai loa e tusa ai o le solitulafono sa laua faia, ma la talosagaina ai se avanoa e toe foi atu ai i Hawaii i lo la aiga.

Na faafetaia le susuga a Leota i le Faamasinoga e tusa ai o le taimi na taofia ai o ia i le Toese i Tafuna, lea ua mafai ai ona faapupula e le Atua lana vaai ma ia iloa ai le leaga o le solitulafono. Sa ia taua fo’i lona maua o se lesona taua mai le taimi na nofo ai i le Falepuipui,lea ua mafai ai ona ia faavasega le lelei ma le leaga. 

Na ia faatoese i le Faamasinoga mo lana solitulafono, ma talosaga i ai mo se avanoa e toe fo’i atu ai i lona aiga. O le talosaga lava fo’i lea e tasi ma faaleo e le alii o Sosaiete ina ua maua lona avanoa e faatoese ai i le Fa’amasinoga.

Na saunoa Sosaiete e fa’apea, e ui e laititi se taimi na faaalu e nofo ai i le Toese, ae ua ia iloa ai le tele o mea aoga sa ia misia i lona olaga faapea ai lona aiga. E le gata ua ia misia le faatasi atu i le faamanatuina o le aso soifua a lona grandmother, ae ua tuai ai fo’i ona toe fo’i atu i lona aiga i Hawaii aemaise ai lana galuega.

Na talosaga le la loia fautua mo se faasalaga mama e aunoa ma le toe tuuina atu o se isi taimi e faaopoopo e tuli e i laua nei i le Toese i Tafuna. Na faamatala e le loia fautua i le Fa’amasinoga e fa’apea, o le filifilia sese na faia e alii nei e to’alua, ua mafua ai ona tele aso ua taofia ai i laua i totonu o le teritori.

O le faanaunauga o le au alii lenei e pei ona taua e le alii loia fautua e pei ona ia faailoa i le Fa’amasinoga, o le toe fo’i atu lea o Leota ma Sosaiete i Hawaii ma toe faaauau le soifuaga manuia o loo ola ai i fafo, e le gata i galuega ae o aoaoga fo’i. O ni ali’i e lelei lo la a’oa’oina e pei ona taua e le alii loia fautua i le Fa’amasinoga.

Na lagolago e le loia a le malo le talosaga a le itu tete’e, ma ia finau ai ina ia faasala i laua ua molia i se faasalaga faanofovaavaaia, pe afai e finagalo i ai le Fa’amasinoga.

A o le i tuuina atu le faaiuga a le Fa’amasinoga, na fesili le Faamasinoga i alii nei e to’alua la te faamanino le mataupu e faatatau i le la toe fo’i atu i fafo, pe manatu e nonofo mau i Amerika Samoa. Na tali alii nei e to’alua, o laua e toe fo’i atu i fafo mo le faaauauina o aoaoga aemaise ai galuega.

Saunoa le Fa’amasinoga e fa’apea, e ui e i ai vaega o le malo tele o Amerika e faataga ai ona fa’aaoga le mariuana mo togafitiga o nisi o tagata, peita’i e leai se vaega o le malo tele e fa’ataga ai le pauta o le aisa.

Ua manatu le Faamasinoga e faamalumalu le tuuina atu o sana faasalaga mo i laua ua nofosala i totonu o le 5 tausaga. O nisi o poloaiga ua tuuina atu mo Leota ma Sosaiete e tatau ona usita’i i ai, e aofia ai le faasa lea ona la toe latalata i le nofoaga o loo faatau ai fualaau faasaina, Le Filifili, poo isi fo’i nofoaga o loo feofeoa’i ma feiloa’i ai i latou o loo tagofia fualaau fa’asaina.

A o i ai i laua i Amerika Samoa e faatali ai le aso e toe malaga atu ai i fafo pe a toe tatala femalagaaiga a va’alele, e tatau ona la asiasi i le Ofisa Nofovaavaaia i masina taitasi, e le tatau fo’i ona la toe tagofia le ‘ava malosi poo fualaau fa’asaina.  Na fautua malosi le Faamasinoga i alii nei e to’alua, afai la te le usitaia le poloaiga o le nofo mama mai fualaau faasaina poo le ‘ava malosi, e ono mafai ona faasala i laua e le Fa’amasinoga i se fasalaga faa falepuipui e sili atu ona umi nai lo le 90 aso.