Pago Pago - AMERIKA SAMOA

E 7 tausaga lea ua nofovaavaaia ai se alii sa avea ma Leoleo o le malo, ina ua faamaonia e le Fa’amasinoga Maualuga le solitulafono o le susunu fale na tu’uaa ai o ia.

O le vaiaso nei na tula’i ai le susuga a Steven Tuato’o i luma o le afioga i le ali’i Fa’amasino Sili lagolago ia Elvis P. Patea mo le lauina o lona faasalaga. 

O afioga i ali’i Fa’amasino Lagolago ia Faamausili Pomele ma Paepae I. Faiai na lagolago ia Patea i le iloiloina o le faasalaga a le susuga a Tuatoo, lea na taofia mai lava i le masina o Setema o le tausaga na te’a nei ina ua faila e le malo le tagi faasaga ia te ia.

Na molia e le malo le susuga a Tuatoo i le moliga o le susunu fale i le tulaga muamua, o le solitulafono lava fo’i lea na tali ioe i ai o ia i lalo o se maliliega na latou sainia ma le malo, lea fo’i na talia e le Fa’amasinoga, o le vaega C lea o solitulafono mamafa, lea e mafai ona faasalaga ai se tasi i le Toese mo le umi e le silia i le 7 tausaga, pe faasala foi i le salatupe e le silia i le $5,000.

I le tali ioe ai o le susuga a Tuatoo i le moliga e pei ona ta’usala ai o ia e le malo, na ia ta’utino ai e faapea, i se taimi o le aso 27 o Iulai o le tausaga na te’a nei i lona aigai Alofau, sa ia susunuina ai lona fale ma tula’i mai ai lagona popole o tagata o le nu’u, ina ne’i aafia atu ai ma o latou fale i le taimi na sasao a’e ai le afi ma faatamaia ai lona fale.

Ina ua maua le avanoa o le susuga a Tuatoo mai le Fa’amasinoga, sa ia faatoese ai loa e tusa ai o lana solitulafono sa faia, ma ia talosagaina ai le Fa’amasinoga mo se isi avanoa e toe fo’i atu ai i tua e mafuta ma lona aiga.

Na taua e le susuga a Tuatoo e faapea, ua fai si umi o ona maitauina ni faafitauli tau i le mafaufau o loo tau aafia ai lona tagata, ma ua ia mana’omia le fesoasoani a le Fa’amasinoga sei tau fofo ai lenei faafitauli. Na ia taua fo’i e faapea, na te le o iloa poo fea e mafua mai ai faafitauli tau i le mafaufau o loo ia maitauina i lona tagata.

Na ia ta’utino e faapea, e moni lava sa ia tagofia fualaau faasaina i se taimi ua tuana’i, peita’i o le taimi nei, na te le o toe tagofia fualaau faasaina. 

Na faailoa e le susuga a Tuatoo i le Fa’amasinoga, le silia i le 5 tausaga talu ona valavala ma lona aiga, ma ua ia mana’omia lona toe fo’i atu i tua e mafuta ma lona aiga. 

Na talosaga lana loia fautua ia Michael White mo se avanoa e faasala ai le ua molia i se faasalaga faanofovaavaaia, e aunoa ma le toe tuuina atu i ai o se isi taimi na te tuli i le Toese i Tafuna. 

Na lagolago e le Loia a le malo ia Angela Drummond le talosaga a le itu tete’e, ma ia faailoa ai i le Fa’amasinoga tuutuuga o le maliliega na sainia e itu e 2, lea e aofia ai le tuuina atu o se faasalaga faanofovaavaaia mo le ua molia.

A o le i aga’i atu ali’i Fa’amasino mo le iloiloina o se faaiuga, na faamanatu e le afioga i le ali’i Fa’amasino ia Patea i loia a itu e lua, le mataupu o loo nofovaavaaia ai le susuga a Tuatoo i luma o le Fa’amasinoga Maualuga, e mafua mai i le mataupu lea na ta’usala ai o ia i lona umia faasolitulafono o vaega o fualaau faasaina o le aisa.

Na fia iloa e Patea le tulaga o loo taoto ai le mataupu a le susuga a Tuatoo e pei ona nofovaavaaia ai i luma o le Fa’amasino Sili.

Na taua e le alii loia fautua ia White, o le aso Faraile nei, o le aso lea, ua faatulaga e tula’i ai le susuga a Tuato’o i luma o le Faamasino Sili ia Michael Kruse mo le tuuina atu o le faaiuga a le Fa’amasinoga, e tusa ai o le mataupu e pei ona faamaonia ai lona le usitaia o tuutuuga o lana nofovaavaaia e 5 tausaga na tuuina atu i le 2020.

I le mae’a ai ona iloilo e le Fa’amasinoga o faafinauga a Loia, o le Ripoti o le Ofisa Nofovaavaaia, atoa ai ma le faatoesega a le susuga a Tuato’o, na manatu ai loa le Fa’amasinoga e talia fautuaga a Loia ina ia faasala le ua molia i se faasalaga Nofovaavaaia. 

E 7 tausaga na manatu le Fa’amasinoga e faasala ai le susuga a Tuatoo i le Toese i Tafuna, peita’i ua faamalumalu lona tuliina o lea faasalaga faa falepuipui, ae ua nofovaavaaia ai o ia mo le 7 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai le avea o ia ma tagatanu’u e tausisi i tulafono uma a le malo, aua ne’i toe tagofia le ‘ava malosi poo fualaau faasaina, ma ia tuuina atu lona tagata e faia i ai suega a le Ofisa Nofovaavaaia poo Leoleo fo’i ina ia faamaonia ai o lo o ia usitaia le tuutuuga o le aua nei toe tagofia le ‘ava malosi poo fualaau faasaina.

E 20 masina lea ua poloaina e le Fa’amasinoga le susuga a Tuatoo na te tuliina i le Toese i Tafuna. O le a aofia ai ma le umi e 404 aso lea na taofia ai o ia ao faatalitali ai se faaiuga o lana mataupu. O le umi o lo o totoe o lea faasalaga, o le a faamalumalu lona tuliina, ae o le a tatala o ia i tua i lalo o tuutuuga e pei ona tuuina atu e le Fa’amasinoga. 

E pei ona taua e le malo i le latou tagi e faapea, o le taeao o le aso 27 o Iulai o le tausaga na te’a nei, na logo ai e nisi o le afioaga o Alofau le Ofisa o Leoleo i Fagaitua mo se fesoasoani, i se fale o loo mu i le latou pito nu’u. 

Na taua e i latou na faafesootaiina le Ofisa o Leoleo lo latou. popole ina nei aafia atu ai ma latou fale i le fale o lo o mu. E le i umi se taimi ae taunu’u le Taavale Fuimu ma faatamaia loa le afi na aafia ai le fale na mu.

Na taua e se molimau i Leoleo e faapea, i le taeao o le aso e pei ona taua, sa ia faalogoina ai se tagata o Leoleoa ma laulau vavale i le latou pitonu’u. Na alu atu e siaki ma ia iloa ai, o le susuga a Tuatoo lea o loo leoleoa ma laulau vavale solo i le latou pitonu’u.

Na taumafai le molimau e faato’ato’a ma faufautua i le susuga a Tuatoo ina ia onosa’i ma fai fai lemu. E le i umi ona alu ese atu le susuga a Tuatoo ae faalogoina loa e le tagata lea le manogi mea mu, e foliga mai o se mea o loo susunu. E le’i umi ae vaaia loa le alu a’e o le afi i luga, ma ia faafesootaiina ai loa le Ofisa o Leoleo i Fagaitua mo se fesoasoani. 

E lei leva ae taunu’u le Loli Fuimu ma faatamaia ai loa le afi o le taimi foi lea o loo pisi ai Leoleo e tau saili le susuga a Tuatoo poo fea ua alu i ai. E lei umi ae vaaia e Leoleo le susuga a Tuatoo o loo auau i le sami.

Na aumai i luga o ia ma taumafai loa Leoleo e faatalanoa o ia i le mafua’aga o le faalavelave, peita’i na musu le susuga a Tuatoo e talanoa i Leoleo e tusa ai o lenei mataupu. 

O le tausaga e 2020 na nofovaavaaia ai Tuatoo mo le 5 tausaga, ina ua ta’usala o ia i le umia faasolitulafono o vaega o fualaau faasaina.

O fualaau faasaina na maua i le susuga a Tuatoo, na afua mai ina ua osofa’i e Leoleo ni nofoaga eseese se 3 i le taeao o le aso 9 o Novema 2019.

O nofoaga eseese e tolu na aga’i atu i ai Leoleo ma faatino ai le poloaiga a le Fa’amasinoga ina ia sailia nofoaga nei e aofia ai se fale i Taputimu, o le fale o Tuatoo i Alofau atoa ai ma le taavale a le susuga a Taisia Felise.

Na muamua osofa’i e Leoleo le fale i Taputimu ma pue faapagota mai ai le susuga a Cody Wood ina ua maua i ai e Leoleo fualaau faasaina atoa ai ma se tinoitupe tele i lona fale. Ua mae’a le mataupu a Wood ma ua nofovaavaaia o ia.

O le nofoaga lona lua na osofa’i o le fale o le susuga a Tuatoo i Alofau ma maua mai se vaega o fualaau faasaina, o a’upega ma pulufana.

O le mataupu lea o loo nofovaavaaia ai le susuga a Tuatoo i le taimi nei.

O le nofoaga lona tolu na pu’e faapagota mai ai le susuga a Taisia Felise ina ua taofi e Leoleo lana ta’avale ma maua i ai fualaau faasaina.

O le taimi nei ua mae’a ona lau le faasalaga a Felise ma o loo nofovaavaaia o ia i luma o le Fa’amasinoga.