Ads by Google Ads by Google

O OE O LO’U TAMA?

Fa’atalofa atu i le mamalu o le atunu’u, ae maise o le au faitau i lenei taeao fou, taeao manino, taeao toto’a, ua alafa’i mai ai i le manuia i le alofa ma le agalelei o le Atua. Malo le soifua, malo foi le onosa’i i faiva ma tiute o lenei vaiaso, ae alo maia, i le tatou Tala Puupuu e faai’u ai le tatou vaiaso.

************************************************* 

E vivini mai moa o le vaveao o le Aso Gafua, ae o le taimi lea ua leva ona tu tu le alii talavou o Ioane I luma o le fale a le tamaloa o Feleti ma lona to’alua o Maanaima.  Sa fa lo le ua o Ioane e tau autilo pe na te iloa atu seisi I totonu o le fale.  Ae o le taimi lea ua savali mai ai Feleti ma le salu lima i fafo o le faitoto’a e salu le polotito o lona fale.

“Faamolemole po o lau susuga le pule o le faleaiga?”

“Ioe,” o le tali atu lea a Feleti.  Ae o le taimi lea ua vaaia le savali mai i fafo o Maanaima, lona to’alua, ma tu i ona tafatafa

“Na faasino mai a’u e sa’u uo, fai mai e iai le potu I luga o lou fale, o lo’o saili se tagata nofo totogi,” o le tali atu lea a Ioane.

“Oi, ioe! O e sau I le potu?’ o le oso mai lea a Maanaima.

“Pe a mafai,” o le tali atu lea a Ioane.

Na liliu Maanaima ma toe agai I totonu o le fale ma valaau mai ia Ioane e mulimuli atu ia te ia.  Ae ua liliu Feleti e salu lana otaota ma faamapumapu I luma o le fale.  Na tu Ioane ma sioa atu ia Feleti, na tilotilo mai Feleti o lo’o faataupupula atu lava Ioane, ma sa ata mai ai le tamaloa o Feleti ma fai, “alu I totonu o le fale,” ma ia toe punou e fai lana galuega.

Ua savali I totonu Ioane ma agai atu I le mea o tu mai ai Maanaima.  Sa fiafia le loto o le loomatua o Maanaima ona o lea o le a maua sana two I masina uma mai ia Ioane.  Sa faapea atu ai loa Maanaima ia Ioane, “Ia sau tatou o e inu se tatou ti ona e alu lea e tapena mai ai mea totino”.

Na talia e Ioane ia le fa’aafe a Maanaima ma o la toe agai mai loa I lalo o le fale.  Na savali sa’o lava Maanaima I le umukuka o le fale, a’o mulimuli atu iai Ioane.  Na faasino e Maanaima le nofoa I le laulau ‘ai e saofai ai Ioane ae ua liliu le loomatua o Maanaima I gasesega aua se malu taeao a le aiga.

E gaioi lava Maanaima ma talatalanoa mai ia Ioane, ae o le taimi lea ia Ioane, na faasolo ai le matamata a Ioane i ata o le aiga o lo’o pipi’i  I le sima o le fale.  “E toafia ni ou uso ma ni ou tuafafine o iai?”  Na tali Ioane, “E na’o a’u le tama a o’u matua”.

“Oi Talofa e.  O soifua uma nai ou matua?” o le fesili tatao mai lea a Maanaima.  “E na’o lo’u tina o lo’o soifua mai.  Ae o si o’u tama, na maliu ae na’o le tasi o’u tausaga,” o le tali lea a Ioane. 

A’o faagasolo le talanoaga a Maanaima ma Ioane na faalogoina le pa’o mai o sitepu o le fale ma vaaia le suia o foliga o Maanaima I se foliga fiafia, ina ua ulufale mai I totonu o le umukuka si ana fanau to’atolu.  E to’atasi le teine ae to’alua tama. 

 “O mai, o mai,” o le valaau atu lea a Maanaima.  “Feiloai I si tama o Ioane, o ia lea la a nofo totogi I le potu pito I luga o le fale”.  

O Lorenzo le tama matua e 16 tausaga, o le tamaitai o Meritiana e 14 ona tausaga ia ma le ali’I laititi o Petelo e 12 ona tausaga. 

Sa faatonu e Maanaima ia le alii o Lorenzo e alu e valaau lona tama e sau loa e fai le latou meaai.  O se taumafataga fiafia le inuga ti a le aiga I lena taeao.  Ma sa faafiafiaina ai le mafaufau o le alii o Ioane.   I le mae’a o le inuga ti, na faatofa loa Lorenzo, Meritiana ma Petelo I o latou matua ma Ioane, ae aga’I atu loa I le aoga.

Ua pasi le 2 tausaga o nofo le alii o Ioane I le fale o Feleti ma Maanaima ma ua mafana foi le mafutaga, e le gata I le va o Feleti, Maanaima ma Ioane ae faapea foi le fanau ia Lorenzo, Meritiana ma Petelo.  Ua pei lava Ioane o leisi tagata moni o le aiga.

O’o i se tasi o aso, ua tapena le meaai o le afiafi a le aiga, ae e le’i o’o atu lava Ioane I le fale.  Ua amata ona popole Feleti ma Maanaima.  Ua fiu le aiga e tau saili solo Ioane ae e pei ua nimo I le vateatea.

Uma atu le vaiaso, te’a atu ma le masina, e le’I toe fo’I atu lava Ioane I le fale o Feleti ma Maanaima.

I se tasi o afiafi, na faate’ia le aiga I le tu’itu’I atu o le faitoto’a o le fale.  Ma le tatala atu, o se tamaloa, o laei sona peleue ma sana atopa’u e pei o atopa’u ia e masani ona feavea’i e tagata faigaluega i ofisa.

“O le maota lenei a Feleti ma Maanaima?” o le fesili a le tamaloa o lo’o tu I le faitoto’a.  “E mafai ona ou alu atu I totonu?”

Ua ulufale le tamaloa, ua taitai atu I le potu malolo ma ua nonofo uma I lalo I nofoa.  Ona tago lea o le tamaloa ua tatala lana atopa’u ma ia to mai I fafo ni pepa ma ia faapea atu Ia Feleti ma Maanaima.

“O a’u o le loia a Ioane.  Ma I lo’u agaga faanoanoa tele, ou te fa’ailoa atu, o Ioane ua maliu”.

E le’I uma mai le tala a le tamaloa ae alu a’e I luga siufofoga maofa o le aiga atoa.  Ua amata ona fetagisi leotetele Maanaima ma Meritiana.

“O le a le uiga o lau tala?” o le fesili tauanau atu lea a Feleti.

“O Ioane, o se atalii a se ulugalii mauoa I se aai e le mamao tele atu ma I’inei.  Sa feagai o ia ma se gasegase tuga, ua fiu e saili se fofo ae peitai, ua leai se fofo.  Ae e iai le mafuaaga na o’o mai ai Ioane iinei I le tou aiga.  Na sau Ioane e saili lona tama!”

“Auoi, e a?” o le te’I mai lea a Maanaima ma autilotilo atu ma ona foliga ua susu I loimata, I lona to’alua o Feleti.

Na liliu le alii loia ia Feleti ma faapea atu, “Sa e nofo I Amerika I se vaitaimi o lou olaga?”  “Ioe.  Na o’u aoga I se kolisi I Amerika,” o le tali lea a Feleti.  “Ae afai o e manatu o a’u le tama o Ioane, ua matua’I faaseseina lava oe”. 

Na tago le loia ma tu’uina atu ia Feleti se ata o ni alii talavou se to’alua ma ia faapea atu, “O lou ata lea?”  Na tilotilo Feleti I le ata ma ia faapea mai, “Ioe, o a’u ma la’u uo o Peteru.  Na ma aooga faatasi I Amerika.”

Na faapea atu le loia, “O le ata lenei sa feavea’i e Ioane ma I lona olaga atoa, sa faapea o ia, o Peteru lona tama ae peita’I, na faamaonia I se sueseuga faafalema’I e le o ia o le tama a Ioane.  Ae o le ata lea na tu’uina e le tina o Ioane ia Ioane a’o laititi o ia ma faapea iai, o le ata lea o lou tama.  O le mafuaaga lea na sau ai Ioane nofo I lou fale, o le sailiga o lona tama moni.”

IA MANUIA LE FAAIUGA O LE VAIASO!