VAEGA 63

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le tatou FAGOGO FOU lenei i le alii o Taki ma le sailiga o lona tama faapea le tamaloa o Tanielu ma lona toalua o Eseta ma le la fanau e to’atolu, o Iakopo, Ruta ma Naomi.

*************************

E le i taitai vivini toa o le vaveao, ae ua leva ona pa’o le umukuka a le tamaloa o Tanielu, ua amata ona gasese le ti o le taeao.   O Tanielu ma Eseta e fai se la tamai faleaiga i lo latou nu’u.  Na amata mai lava le la fale panikeke, o laiti si a la fanau e toatolu.  

O le ulumatua o le alii o Iakopo lea o lo tau su’e lava sona avanoa i totonu o le Iunivesite a le USP, e ui ina su’e faafia i suega ulufale i galuega fa’aofisa a le malo, ae e le toe faamanuiaina lava ana taumafaiga.  O le tamaitai e soso’o ai, o Ruta, lea ua avea nei ma se loia.  Ia ma le teine laititi o Naomi, e faigaluega o se Tausimai i le falemai tele a le malo.

Ma o nei tamaiti, na tausi mai lava e si tamaloa o Tanielu ma le tina ia Eseta, a o laiti i latou, ma fa’a’o’oga, lea ua matutua lava, ae o lo o tausi lava, i le fale panikeke a Tanielu ma Eseta.

Ina ua vaai atu Tanielu o le a tatafa mai ata o le taeao, ae e le i uma ona vela panikeke ma fai sanuisi o le la faleaiga, sa ia aapa atu loa i lana telefoni ma faatatagi le telefoni a le tina o Eseta la e taagulu lava i totonu o le potu.  Ua te’i ifo Eseta ma ia faatopetope atu i fafo i le la faleaiga, e fesoasoani i si tamaloa o Tanielu.

“E, sa ou musu lava e fafagu atu oe aua sa tuai na ta momoe anapo i le tapenaina o le faleaiga, ae ua ou vaai atu lava o le a alu a’e le mata o le la, ae lea e le i uma ona saka fuamoa,” o le tala ata lea a Tanielu.

“Ua manaia lava la ta moe,” o le tali mai lea a Eseta ma savali atu i le ogaumu e faauma ona falai panikeke.

“Ia, e leai se ta tupe e maua i lena mea o le moe,” o le toe fai atu lea a Tanielu.  Ma la talie ai lava lea ma si ona toalua, ma fai fiafia le la kuka.

E le i umi ae faapea atu Tanielu ia Eseta, “O lea o le a ou tago e tapena le ti a si a ta fanau.  Ai ua toeititi feala mai e sauni i galuega ia teineiti, ae fai ia suesuega a Iakopo.”

“Ua pei na tamaiti o ni tamaiti laiti, ae o lena ua matutua, toe o ni taitoalua.  Tu’u ia latou e o mai fai a latou meaai,” o le ote mai lea a Eseta ma liliu ana panikeke.

Ua na o le ataata o si tamaloa o Tanielu ma pisi lava e tapena le meaai mo si ana fanau.  E leai se alofa fa’a tama e tutusa ma le alofa o lenei tamaloa o Tanielu i si ana fanau toatolu.  Po o le a le pisi i fea o lona faleaiga, ae le mafai ona galo e lenei tama ona tapena muamua se meaai mo si ana fanau ma alu e momoli ia i latou i le aoga.

O se tulaga na mata’alia ai lenei tamaloa e faiaoga ma le pule o le aoga na a’o’oga ai lana fanau, ona e le misi se aso, e alu atu ai lava le kiliva meaai a Tanielu mo si ana fanau.  Lea lava la ua matutua nei tamaiti, ae le tu’ua ai lava le fa’aauau o lana galuega alofa, o le saunia o a latou meaai.

E FAIA PEA.