VAEGA 120

Taeao Manuia, Taeao Toto’a i le mamalu o le tatou aufaitaunusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lanatausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 120.

****************************

Ua malaga atu nei le ulugalii o Alesana ma Eseta ma le la tama teine o Ruta, lea e fai ma la loia, i le ofisa a leoleo.

O le fafine o Eseta, e alu lava ae e pei e tau puni le manava i le popole.  O lana lima ua le mamulu mai i le lima o le tamaloa o Alesana.

Ae o loimata e le matu i lana tagi.

“Ana iloa lava e fai atu e te nofo i le fale,” o le tala lea a Alesana i le fafine o Eseta.  “E pei o lea ta te o i se maliu ma lau tagi.”

Ua tago atu Eseta ma o’omi le lima a Alesana ma faapea atu, “Pau a la’u tala, ia sauni leoleo e loka faatasi ta’ua aua e le taitai toe mamulu lou lima mai la’u u’u,” o le tali mai lea a Eseta.

Ua taunuu le faigamalaga i le Ofisa a Leoleo, ona faatonu lea e Ruta ona matua, e faatali atu i le potu faatalitali a leoleo, ae se’i alu i totonu e talanoa ma le Kapeteni a Leoleo.

Na fai sina umi o alu i totonu ia le teine o Ruta ma ua avea ma tulaga ua toe alu a’e ai i luga le popole a le toeaina o Alesana.

Ae atili ai ona tagi le fafine o Eseta.

Ua la vaaia le toe savali mai o le teine o Ruta ma sa taumafai le ulugalii e saili i fofoga o le la tama teine pe o se tulaga fiafia po o se tulaga faanoanoa ua u’u iai le latou mataupu.

Ae peitai sa le’i iai ni foliga faaalia a Ruta.

Sa na’o na ia faapea mai, “O mai, la ua faatali mai le Kapeteni mo tatou.”

Ua tu tu lemu ifo i luga le ulugalii o Alesana ma Eseta ma mulimuli atu ia Ruta.

[E FAIA PEA]