VAEGA 128

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 128.

*****************************************************

E mae’a ifo le faamatalaga a le tamaitai o Salome, ae o le taimi lea ua le toe iai seisi e toe pisa, ae ua na o le fa’alologo o taliga a le tamaloa o Alesana ma lona toalua o Eseta faapea le la fanau teine, o Ruta ma Naomi.

O le tamaloa o Alesana, ua na le iloa pe oso atu e kiki faapolo soka i fafo ia Salome, pe opo mai si ona afafine o Naomi, i le momomo o lona loto i le tulaga na feagai ma si ona afafine a’o talavou o ia.

O le fafine foi o Eseta, ua na o le te te atu o ona mata ia Salome ua le mafai na tautala, ae o le maligi o ona loimata, ua pei se timu to.

Ua tepa atu Eseta ia Naomi ma taumafai e fesili atu iai, pe moni ma faamaoni le faamatalaga a Salome, ae ua le gagana le fafine, i le maoa’e o le tala sa faamatalaina e Salome, i lona sauaina o le teine o Naomi, a’o la a’o’oga faatasi.

Ua tu a’e i luga ia le fafine o Eseta ma savali tautevateva atu i lo la potu moe.  Ae o le taimi lea, ua tamo’e faatopetope atu Ruta ma taitai atu lona tina i totonu o le potu.

“O le a la le uiga o lau to’otuli lea ua fai?” o le fesili mai lea a Alesana ia Salome.  “Ua e mana’o e fa’amagalo atu oe e Naomi, ina ia mafai ai ona tumau le lua mafutaga ma Iakopo?”

“E leai, ou te iloa, o le a le mafai ona fa’aauau le ma faigauo ma Iakopo ae peitai, ua ou sau pea, ina ia mafai ona faamagalo mai Naomi ia te a’u.  Ina ia mafai ona ea lo’u pologa o lo’o tau’aveina, e o’o mai i le taimi nei,” o le tali atu lea a Salome i le tamaloa o Alesana.

“O le a tu’u atu ia Naomi, e fai atu lana tala.  Ae a mae’a le tali atu a Naomi, ou te mana’o e te tu’ua lo matou fale, ma aua ne’i e toe fo’i mai,” o le tala lea a Alesana.

Ona ia tula’i lea ma savali atu foi i le la potu moe ma lona to’alua, o Eseta, ae tu’ua ai na’o Salome ma Naomi, i le potu malolo.

[E FAIA PEA]