VAEGA 129

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’igama le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai onao tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atule soso’oga o le tatou Fagogo, O OE O LOU TAMA?

*********************************

Sa gata mai le tatou Fagogo i le vaiaso ua mavae, ina ua mae’a ona faamatala uma e le tamaitai o Salome ia le la tala’aga ma si teine o Naomi, a’o la a’o’oga fa’atasi.

I le mafatia tele o le loto o le fafine o Eseta sa ia tula’i ese atu ai mai totonu o le potu malolo lea o lo’o to’otuli ai le fa’ato’esega a Salome, ona ua leai se tala e mafai ona ia gagana atu ai ia Salome, ina ia mae’a le faamatalaga a Salome.

Ae ua toe ai loa na’o le teine o Naomi ma le tamaloa o Alesana, ia ma le tamaitai o Salome i totonu o le potu malolo a le aiga o Alesana ma Eseta.

O le fiafia sa alo atu iai le aiga o Alesana ma Eseta, ona o le tala fiafia mai i le ofisa a leoleo, e uiga i le mataupu ia Alesana, ua galo atu.

Ae ua liua i le loto momomo ma le agaga faanoanoa, ina ua fa’alogologo atu Alesana ma Eseta i le faamatalaga a Salome, i vaitaimi sa ia sauaina ai si o la alo, o Naomi, a’o talavou o ia.

Ma e ui lava ina ua fai sina umi ona te’a atu na vaitaimi, ae o lo’o avea pea o se ata fa’asolo i mafaufau o Alesana ma Eseta, na vaitaimi, i le tulaga na feagai ma si a la tama.  

E sau tagi i le fale i le tele o aso, mai i le aoga.  O nisi o po ua le fia ‘ai.  O le tele o aso, e fealuai lava o ia e pei o iai se avega mamafa o ia amoina, ae le taitai gagana ai.

Ma ina ua fa’au’u Naomi ma tauanau ona matua e fia malaga ese atu i seisi atunu’u e saili ai sona lumanai, sa fa’afaigata lava i le ulugalii ona tu’u atu le ui’i o le la fanau, ae peitai, sa alu le ao ma le po o vina lava Naomi, ma i’u ai lava ina o la tu’uina atu o ia e alu.

O se vaila’au matua’i o’ona ua fologata e le tamaloa o Alesana ma le fafine o Eseta, ina ua o la malamalama i le mafua’aga o mafatiaga o si o la alo, i lona talavou.  Na mafua uma, ona o le tamaitai o Salome.

Ma ae e le’i tula’i ‘ese atu Alesana mai totonu o le potu malolo, sa ia faapea atu ai ia Salome, o le a tu’u atu i le faitalia a Naomi, le i’uga o le la mataupu, ae a mae’a, ona alu ese atu lea ma le fale, ma ia ‘aua ne’i ona toe fo’i mai.

Ona tula’i foi lea o Alesana ma alu atu i le la potu moe ma si ona toalua o Eseta.

“O le mea lea sa e mana’o iai?” o le fesili atu lea a Naomi ia Salome.  “I le tele o tausaga sa ou nanaina ai lenei mea mai o’u matua, aua sa ou mana’o e puipui i la’ua mai i lenei tiga.  Sa sili ia te a’u lo’u tiga, nai lo le fa’ailoa atu i o’u matua, aua ua ou iloa lelei lo la alofa faamaoni ia te a’u, ma a faalogo iai i faamatalaga i lou sauaina o a’u, o le a nutimomoia ai o latou loto.”

“Faamolemole Naomi, faamagalo mai a’u,” o le tagi tautalatala lea a Salome.

“Ua uma ona ou fai atu ia te oe, ou te le o toe mafaufau i na aso.  Ua mama a’u ma na mea.  O a nisi mea e tua mai iai, o le mea na a oe,” o le tala lea a Naomi.  “Ae o lea ua e toe faatiga mai ia te a’u, e ala i lou tata’eina o fatu a nai o’u matua?”

“E sili loa ona tula’i ma e alu ese atu mai i le matou fale.  Ou te le kea po o le a lau faaiuga e fai i lo’u tuagane,” o le tala mulimuli lea a Naomi ma ia tu loa i luga ma savali atu i lona potu.  Ae ua tu’u ai na’o Salome, o lo’o to’otuli pea i totonu o le latou potu malolo.

[E FAIA PEA]