VAEGA 139

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 139.

******************************************

Ua nofonofo nei le teine o Ruta ma si ona tuagane o Iakopo i totonu o le la taavale ma faatalitali pe sau i fafo le tamaloa lea na la talatalanoa iai.  Aua ua la talitonu, o le tagata tonu lava lea o lo’o la sailia, o le tamaloa o Semi Tagaloa.

O le alii lea sa fai ma molimau a le ulugalii mau’oa lea na faasino le lima i le tamaloa o Alesana, o ia lea na maliu ai le atalii a le ulugalii mau’oa, a’o talavou i latou.

Ua iai se talitonuga a Ruta, a mafai ona suia le molimau a le tamaloa lenei o Semi, o le a mafai ona toe fa’amamaina fa’amaumauga o lo latou tama i le faamasinoga, ma ave’esea ai moliaga o lo’o faasaga ia te ia.

Sa umi lava se taimi o nofonofo Ruta ma Iakopo i totonu o le la taavale ma na i’u ina toe oso i fafo ia Ruta ma toe savali atu i le fale fai ta’avale lea na latou fetaui ai ma le tamaloa o Semi.

Ae fai ifo iai le tama faigaluega, o Semi ua leva na malaga ese atu ma le fale faigaluega.

Ua matua’i fa’ate’ia Ruta i lea faamatalaga aua, o la sa nofonofo i le pito i luma o le fale faigaluega, ae la te le’i va’ai mai lava o alu atu se taavale.

Ae faapea ifo iai ia le alii faigaluega, “Na oso atu i le matou faitoto’a pito i tua, ia lana taavale.  E le masani ona ui atu i luma ia Semi.”

Ua matua’i le fiafia lava ia Ruta ma ia savali atu i le la taavale o lo’o faatalitali mai ai ia Iakopo ma fai atu i lona tuagane, “Ua sola le alii o Semi.  Ou te iloa lava, ua na iloa ta’ua ma le mafuaaga na ta o mai ai.”

“Ae na faafefea ona alu ae lea na ta matamata atu i luma o lona fale faigaluega?” o le fesili lea a Iakopo.

“Sa oso atu i tua,” o le tali mai lea a Ruta ma le le fiafia tele.  “Vaai ai i le pala’ai.”

“O le a la le ta mea o le a fai?” o le toe fesili atu lea a Iakopo.

“E ta te toe o mai foi taeao.  E ta te o mai lava i aso uma, se’ia o’o ina ioe le alii lea e talanoa mai ia ta’ua,” o le tali lea a Ruta.

Ua toe fa’au loa le la ta’avale agai i le latou fale ma toe fo’i atu loa Ruta ma lona tuagane.

[E FAIA PEA]