VAEGA 140

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

*******************************************

Sa gata mai le tatou Fagogo i le vaiaso ua tuanai, ina ua toe fo'i le teine o Ruta ma si ona tuagane o Iakopo, ina ua alu le aso atoa, o nofonofo i luma o le pisinisi a le tamaloa o Semi Tagaloa, ina ia maua so la avanoa e talatalanoa ai ma ia, e tusa ai ma le mataupu lea o lo'o a'afia ai si o la tama, le tamaloa o Alesana.

Manatua foi, o Semi, o le molimau lea a le ulugalii mau'oa lea na ana le atalii lea sa maliu i se faalavelave na tupu a'o talavou i latou, lea na i'u ai ina loka ia Alesana i le falepuipui ma molia i le fasiotia o le atalii o le ulugalii mau'oa.

Ae o lo'o taofi ma finau Alesana, e le'o se fasioti tagata mafaufauina le faalavelave na tupu, ae sa ia taumafai e puipui lona ola mai i sauaga a le atalii o le ulugalii mau'oa, ma ana uo, lea e aofia ai ma le alii lenei o Semi, na mafua ai ona maliu le atalii o le ulugalii mau'oa.

Ma sa iloa lelei e Ruta ma Iakopo le mafua'aga na lafi mai ai le tamaloa o Semi mai ia i la'ua ina ua o la o atu i totonu o lona ofisa, faapea ai ma lona sola faalilolilo mai i le pito i tua o le fale lea o lo'o iai lona ofisa.  Ae ua alu le aso atoa o nofonofo Ruta ma Iakopo i le pito i luma o le fale ma maitau mai le taavale a le tamaloa.

E ave lava le taavale a Ruta i lena afiafi, e agai atu i le latou fale, ae ua matua'i ita lava.

Ma na atili ai ona ita le tamaitai, ina ua tatala mai e lona tama le faitoto'a o le latou fale, ma ona foliga fiafia, ae na toe suia ina ua faamatala atu iai e Ruta le mea sa tupu.

"O i'i e fa'amaonia ai le pepelo o le molimau a le tamaloa lea o Semi," o le tala lea a Ruta.  "E vaai nei la iai i la'u mea e fai ia te ia."

"Ia onosa'i loa lou loto i e ma'i," o le tau fa'amafanafana atu lea a le tuagane o Ruta, le alii o Iakopo.  "Taeao, ta te toe o ai ma e le sao mai le alii le la ia ta'ua taeao."

"Leai, taeao, malolo oe Ruta.  Ae sauni oe Iakopo e ta te o," o le tala lea a le tamaloa o Alesana.

"O le a le uiga o lau tala Dad?" o le fesili atu lea a Ruta.  "Ua galo ia oe, o a'u o lau loia.  A iai se mea e tupu, e tatau ona ou iai."

"Ioe, ua ou malamalama i le tulaga lena," o le tali mai lena a Alesana.  "Ae ua iai so'u lagona, e tatau ona ou alu e ma te feiloai ma Semi.  Atonu e tali leleia mai ai le tatou taumafaiga."

"Ou te le 'au i lou manatu Dad, ae o le a ou usita'i atu pea ia te oe," o le tala lea a Ruta.  "Ae a tupu se mea e ono afaina ai lou avanoa e toe fa'aleleia ai ou faamaumauga i le ofisa a leoleo, ua ou le fiafia loa ia oe."

[E FAIA PEA]