O OE O LOU TAMA
VAEGA 142
E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa. E fa'atalofa atu i le faaopoopoga fou o le tatou Fagogo i lenei tausaga fou 2025. E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.
Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?
Na gata mai le tatou FAGOGO i le vaiaso ua mavae ina ua o le tamaloa o Alesana ma lona atalii o Iakopo e tulituli ia le tamaloa o Semi Tagaloa, lea e manaomia i le mataupu a le tamaloa o Alesana i le ofisa a leoleo.
O le aso muamua na o mai ai le teine o Ruta, le afafine matua po o le loia foi, a Alesana ma lona tuagane o Iakopo.
Ae na alu le aso atoa o la nofonofo i luma o le fale faigaluega a Semi, ae sola Semi agai i tua o lana fale faigaluega.
O lea la ua tonu ai i le tamaloa o Alesana, o le a alu ia e tulituli Semi po o fea lava le mea e alu ai.
E ulufale atu la ia Alesana ma lona atalii i le ofisa a Semi, ae ua leva ona sauna mai le lauga a le alii faigaluega a Semi, e faailoa mai ia Alesana ma Iakopo, o Semi e le alu atu i le ofisa i le aso lea.
Ua ‘ata’ata ia Iakopo ma faapea atu i lona tama, “E mo’i lava e iai le mea lea e fefe ai le alii o Semi ma le solasola faapea.”
Sa fesili atu Alesana i le tama faigaluega, pe iai se numera e mafai ona maua ai Semi ma sa tu’uina ifo iai e le tama le numera telefoni.
Ua savavali mai nei i fafo ia Alesana ma Iakopo ona tago lea o Alesana i lana telefoni ma vili ai le numera lea sa tu’uina ifo e le tama faigaluega ia te ia. Ae peitai, na fiu Alesana e vili le numera, e na o le tatagi lava o le telefoni ae leai seisi e tali mai ai.
“O le a la le ta mea lea la’a fai?” o le fesili lea a Iakopo i lona tama.
“Ta o,” o le tali mai lea a Alesana i lona atalii.
Ua te’i Iakopo ina ua faailoa atu e lona tama ia te ia le mea o le a o iai. “Aisea?” o le fesili lea a Iakopo i lona tama.
“Ona o la ua maitau mai le ta taavale e le aufaigaluega,” o le tali atu lea a Alesana i lona atalii.
E pe a ma le afa itula talu ona o ese atu ia Alesana ma Iakopo, ae toe fo’i mai i seisi taavale ese. O le aikia lea a le tamaloa o Alesana, ua fai le la ‘rental’ ma lona atalii ina ia aua ai nei iloa mai la’ua e le aufaigaluega.
Ona faatonu lea e Alesana lona atalii ina ia aua ne’i o la paka tonu i luma o le fale faigaluega a Semi, ae ua la paka i luma o seisi fale faigaluega i autafa tonu lava ma le fale faigaluega a Semi, ona nofonofo ai loa lea o le tamaloa ma lona atalii ma mata’i mai le fale faigaluega a Semi.
O le afiafi ua latalata ina o le a manava ia tagata faigaluega, ae o la vaaia loa le sosolo mai o se taavale, ae oso mai ai i fafo ia Semi.
[E FAIA PEA]