Ads by Google Ads by Google

O OE O LOU TAMA


[ata: SN]

Vaega 143

Taeao Manuia.  Taeao Toto'a, i le mamalu o le tatou aufaitau nusipepa i lenei taeao fou.

Tatou te tau fai si'i le Vi'iga ma le Fa'amanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafa'i i luma o nu'u, ae le o tua o nu'u, i lenei taeao fou.  E fa'afeiloa'i atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa'au i le Lagi.

Ae saga'i mai loa, o le a toe soso'o atu le tatou Fagogo, "O OE O LO'U TAMA?" i lona vaega e 143.

************************************

E le’i o’o lelei le tamaloa o Semi Tagaloa i totonu o lona ofisa ae maulu atu ia le toeaina o Alesana ma lona atalii o Iakopo i totonu o le fale faigaluega ma faga sa’o atu lava Alesana i le ofisa a Semi.

E tau oso mai le alii faigaluega a Semi lea na pepeloa Alesana ma Iakopo i le taeao, e taofi Alesana, ae faalava atu ai ma le alii o Iakopo ma ia faapea atu, “E te tago loa i lo’u tama, tupu loa ma le faalavelave ia te oe.”

Na vave ai lava ona toe solomuli le alii faigaluega lea, ae o le taimi lea ua savali sa’o atu lava Alesana ma ulufale atu i totonu o le ofisa a Semi.

Na pei e va’ai Semi i se aitu ina ua tilotilo mai i le tatala atu o le faitoto’a o lona ofisa, ae tau mai lana va’ai ia Alesana.

“O ai na fa’atagaina oe ona e sau i totonu o lo’u ofisa?” o le fesili leotele mai lea a Semi i le tamaloa o Alesana.

‘E fa’asa ona ou sau i totonu o lou ofisa?” o le fesili lea a Alesana ma ia saofa’i ifo i lalo o le nofoa lea e fesaga’i ma le laulau a Semi.

“Vaai, e leai se ‘appointment’ e fa’ailoa mai ai o lea e tatau ona iai i totonu o le ofisa,” o le faamatalaga lea a Semi.  

“Sosefina, valaau leoleo!” O lana faatonuga lea i lana failautusi.

Ua ataata le tamaloa o Alesana ma ia faapea atu ia Semi, “E fetaui lava le taunu’u mai o leoleo ma le mae’a o le ta mataupu ma atonu e aoga foi le latou o mai, se’i o’u faamatala iai le mafuaaga ua ou o’o mai ai i lou ofisa i lenei aso.”

“Ou te le iloa po o le a le uiga o lau faamatalaga, ae ou te le masani ia te oe.  E le o oe o se tagata po o se pa’aga o la’u pisinisi.  E sili ai loa la ona e tala’a’ao atu i fafo,” o le toe faapea mai lea a Semi.

“O lea o le a ou alu, ae o la’u fesili ia te oe.  Aisea na e molimau pepelo ai?” o le tala mai lea a Alesana.

Na fa’ate’ia Semi i le fesili a Alesana ma na va’aia ai e Alesana le ‘alo o foliga a Semi ma i le atoa ai o le minute e le fai mai sana tala, sa ia toe faapea mai ai, “Ou te le iloa po o le a le uiga o lau fesili.”

“Sa tele se tupe na totogi ai oe?  Pe na faamata’u oe e seisi?” o le toe fesili mai lea a Alesana.

Ua le toe tautala Semi ae ua na ona faataupupula mai ia Alesana ma i’u ai lava ina ona faapea mai, “E te le malamalama i se mea e tasi.”

E FAIA PEA